Жеңілмеген жауынгер Шавкат батыр

Шежірені шиырлап тарата алам,

Тусақ, туған шығармыз әр атадан.

Өзіңді өзің сүйрелеп, қатарға қос,

Ей, қазақтың баласы қара табан.

Жүрсін Ерманның «Қазақ баласын қайрау» атты өлеңінің осы қатары талай қазақтың баласына шабыт беретіні сөзсіз. Өмірден лайықты орнын тауып, талайға үлгі болып, жастардың жанарына додада жеңілмеудің ұстанымын дәлелдеп жүрген жігіттер жетерлік. Соңы бар жалғанның таусылмас армандары әр қазақ баласының бойынан табылады. Рухы өр, намысы биік қазақ жігіттерінің қоғамдағы рөлін кімдер сомдап жүр? Біз лайықты тұлғаларды ұлықтап жүрміз бе? Айналадан тек жамандық көріп, қоғамды үмітсіздікке үйретіп жүрген адамдарға айтарымыз бар. Қазақтың жігіттері ұсақталып, деңгейі «Мариана щұңғымасының түбіне түсіп кеткен» деп жүргендерге өз жауабымызды берейік.

Ел беделін көтеретін ерлер екенін естен шығара қойған жоқпыз. Тарих тақтасында түрлі оқиғаны жазып кеткен де еркектер. Қазақтың тарихына үңілсек, батырлардың үлкен ордасына соғамыз. Орданы тұрақ еткен батырлардың санаулыларын ғана халыққа айтып жүрміз, қаншама мыңдары, миллиондары жаратқанға ғана белгілі. Ел тәуелсіздігінің бесігін рухымен жасап, тарихқа ерлікті қанмен жазған бабаларымыздың қазіргі қоғамдағы бейнесі спортшы батырларымыз. Ел шетіне жау келсе, сол батырлардың алдыңғы қатарда тұратынына күмәніміз жоқ. Талай шетелдіктің назарын қазақ халқына аудартып жүрген батырларымызды білеміз бе?

Бүкіл әлемді өздеріне қаратып, лайықты қолдау тауып отырған спорт түрі ережесіз жекпе-жек. Біздің елімізде де ережесіз жекпе-жекке қызығатын жастар саны артып келеді. Адамға ретсіз қол көтерудің дінде де, заңда да дұрыс еместігін барлығы біледі. Алайда спорт ретінде қарар болсақ, спортшы үшін жетістікке жетудің керемет мүмкіндігі осы жекпе-жек. Ел ішінде ұйым­дастырылатын жарыстар күн санап артуда, спортшылардың саны да көбеюде. Қазақтың туын көтеріп, намысын жыртып жүрген спортшылардың бірі, ережесіз жекпе-жектен әлемді аузына қаратқан батырымыз – Шавкат Рахмонов. Аты алғаш шыға бастаған шағында ел пікірі екіге жарылып, бірі қазақ, бірі өзбек десе, сөз шешімінің нүктесін Шавкаттың өзі қойды. Кезекті жекпе-жегінен кейін өзінің қазақ екендігін, Кіші жүздің баласы екендігін айтып өтті. Түбі Сыр өңіріне тірелетінін, ата-бабасының Арал аумағының перзенттері екенін сұқбаттарында баяндады. M-1 Global лигасында чемпион болып, әлемдік ЮФС лигасына тікелей жолдама алды. 2020 жылы 12-0 рекордымен ЮФС-де дебютін жасаған Шавкатқа әлем назар аудара бастады. Барлық қарсыласын мерзімінен бұрын жеңетін спортшының болашағын бол­жап, осындай рекордының сырын білмек­ке ұмтылған спорт жанкүйерлерінің қарасы көбейді. Шавкаттың әйгілі спорт лигасындағы жолы осылай басталды. Қазақ халқын ұйқысынан ерте оятатын бокс аңызы Геннадий Головкиннен енді ережесіз жекпе-жек жауынгері Шавкатқа өтті. Шавкаттың бұл лигадағы бесінші жекпе-жегі наурыздың бесі күні болды. Жартылай орта салмақ рейтингінде 9-орында орналасқан Шавкат рейтинтің 7-нөмірлі жауынгері Джефф Нилмен күш сынасты. 3 раундтық айқастың 3-раундында қарсыласынан күшінің басым екенін көрсетіп, мерзімінен бұрын жеңіске қол жеткізді.  Шавкаттың жалпы рекорды 17-0. «Кеш жекпе-жегі» жүлдесіне ие болды. Айбарлы айқас шетелдік жанкүйерлердің көңілінен шығып, Шавкаттың танымалдығы одан сайын арта түсті. Ережесіз жекпе-жек жұлдыздары Шавкат туралы пікір білдіріп, ақпарат құралдары да жарыса жазды. Әлеуметтік желі қолданушылары Шавкатқа жылы лебіздерін білдіріп, жеңісті жолын жалғастыруына тілекші екендерін айтты.

Бір өкініштісі, әлемнің танымал лигасында өнер көрсететін жауынгеріміздің жекпе-жегін ешқандай телеарналар эфирден көрсетпеді. Пиратты сайттарды жағалап, жекпе-жекті ыңғайсыз форматта көрді ел. Еліміздің атын әлемге танытып жүрген спортшымызды осы бастан халыққа танытып қолдау көрсетпесек, жеңістің тұғырына шығып, беліне ЮФС белдігін таққанда мән беріп қажет емес шығар. Онсыз да көк жәшікті жаулап алған шетелдік бағдарламалар, телесериалдар жетіп артылады. Жауынгеріміздің жылына 2-3 рет қана шығатын жекпе-жегін көрсете алмағанымыз өкінішті.

Шавкат батырдың нағыз айқасы енді басталады. Рейтингте асықпай, жоғарылап келе жатқан Шавкаттың келесі қарсыластары – ТОП 5-тің жауынгерлері. Алдағы айқастарында топ жарып, қарсыластарының жауырынын жерге тигізсе, тарихтаға ЮФС-дің алғашқы чемпион қазақ жауынгері болады. Ол күн де алыс емес, биылғы жылдың соңы немесе келесі жылдың ортасына қарай Шавкатты чемпиондық белбеумен көруіміз әбден мүмкін.

Қай сала болмасын, әр қазақтың перзенті туған жерге, туған елге белсене қызмет етсе, еліміздің айы оңынан туып, дамыған мемлекеттермен тереземізді тең ұстар едік. Бүгінгі мақаламыздың кейіпкері де елінің алға басуы үшін, соның ішінде жекпе-жек өнерінің дамуына үлесі зор. Әлемнің бір бұрышында Қазақстан секілді мемлекет барын, батырларының бейнесін лайықты көрсетіп жүрген Шавкат Рахмоновқа тілеріміз тек жеңіс.

Қ.ӨТЕБАЙ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған