«Әр қазақ баспаналы болсын» деген тілекті жиі естіп жүрміз. Қазіргі тәуелсіз елімізде жалдамалы пәтер иелеріне тәуелді болып жүрген халықтың саны баршылық. Еліміздің басты шешуге тиісті мәселесінің бірі тұрғын үйлермен қамтамасыз ету. Қалалық жерлерде халық санының артуына байланысты пәтер жалдап жан бағып жүрген жастарымыз көп. Жалақысын жалдамалы пәтерге беріп, «бұйырған кетпейді» деп, мемлекеттің беретін баспанасынан үміттері де бар. Мемлекеттің қаржысы есебінде салынып жатқан үйлердің саны артпаса, кеміген емес. Бірақ сол тұрғын үйлер нағыз мұқтаж адамдардың қолына жетіп жатыр ма? «Өз үйім өлең төсегім» деген сөз қалдырған Жиренше шешеннің өзі өз үйінде ғана өктем сөйлеп, жеке үйінің жанға рахат сыйлап жадырататынын айтып кеткендей.
Тұрғын үймен қамтамасыз етуден Қызылорда өңірі де құр алақан емес. Халықтың қажеттілігін өтеп, халық қалауын басты назарға қоятын өңір басшылығының істерін көзбен көріп жүрміз. Тұрғын үйге байланысты аймақ басшысы Нұрлыбек Нәлібаев және қала әкімі Асылбек Шәменов ел ағаларымен бірге 40 пәтерлі сол жағалаудан соғылған жаңа көпқабатты тұрғын үйді баспаналары апатты жағдайда қалған тұрғындарға табыстады.
— Кейінгі жылдары Сыр өңірінде тұрғын үй құрылысы қарқынды дамып, қала аумағы әлдеқайда ұлғайды. Мемлекет басшысы Қасым-Жомарт Кемелұлының Сыр еліне деген қолдауымен аймақта берекелі істер атқарылуда. Облыс орталығында қаланы көріктендіріп, ажарын айшықтай түсетін бірқатар зәулім ғимараттың іргетасы қаланып, әлеуметтік нысандарды салу сәтті жүзеге асуда. Барлық құрылыстар ел игілігіне табысталатын болады, – деді аймақ басшысы Н.Нәлібаев.
Биылғы жылы қаламыздың көркеюі үшін мемлекет тарапынан қомақты қаражат бөлінуде. Айтар болсақ, Бейбарыс сұлтан көшесінің Назарбаев даңғылынан «Қызылорда-Құмкөл» трассасына дейінгі бөлігі өзгеріске ұшырап, кеңейтіліп, халық игілігіне берілмек. «Қазақстан темір жолы» басшылығы темір жол вокзалының ғимараты мен перронын қайтадан көрік алып, жаңғыруы үшін қаражат бөлмек. Құны 800 миллион теңгені құрайтын инвестор қаржысына Сырдарияның сол жағалауына жаңа автовокзал салу жоспарлану үстінде. Заманауи үлгідегі Оқушылар сарайының жобасы «ҚазГерМұнай» компаниясының басшылығымен келісім нәтижесінде бастау алды. Шілде айының қарсаңында құны 1,6 миллиард теңгені құрайтын Неке сарайы ғимараты пайдалануға берілмек. 1000 орындықтан тұратын құны 3,7 миллиард теңге көлеміндегі Өнер орталығы Желтоқсан айында, қаланың сол жағалауындағы құны 2,7 миллиард теңге болатын Қан орталығы 2024 жылы халық игілігіне берілмек.
Өткізілген іс-шарада Сырдария ауданының Құрметті азаматы Әбдіғаппар Әмірғалиев жиналған жұртқа ақ батасын берді. Зейнеткер Әлима Әбішева тұрғындар атынан алғыс білдіріп, наурыз мерекесімен құттықтады.
692 мың шаршы метрден тұратын тұрғын үй биылғы қаржыландырудың нәтижесінен өңір тұрғындарына берілмек. 982 пәтерден тұратын 23 тұрғын үйдің құрылысы облыстық бюджеттен бөлінген 2,7 миллиард теңгенің есебінен салынуда. Ал, 462 пәтерлі 12 тұрғын үй сатып алу құқығынсыз жалға беріледі. Қызылорда қаласында 520 пәтерден тұратын 11 тұрғын үй несиелі тұрғын үй құрылысы бойынша пайдалануға берілмек. Сонымен қатар Сырдария өзенінің сол жағалауында 84 пәтерлі 7 қабаттан тұратын 6 тұрғын үйдің құрылысы жүзеге асады деп күтілуде.
Баспаналы болуды басты мақсат еткен адамдар үшін бұл жаңалық қуанышты хабар дей аламыз. Мемлекетіміздің барлық тұрғындары біреудің есігін сығалап, өзгенің қас-қабағына қарамай, түгел дерлік баспаналы болуы үшін билік өкілдерінің тұрғын үй жобасын сапалы әрі жылдам жүзеге асыруы тиіс. Сыр өңірі де осы бағыттан таймай, тұрғын үйді қажет етіп жүрген Сыр халқын баспанамен қамтамасыз етуді жалғастырады деген үміттеміз.
Қазақбай Әндеш
