Қызылорда облысында бірнеше күнге созылған дауылды желдің әсерінен көптеген нысандарға зақым келгені туралы тиісті орындар түсінік берген болатын. Алайда күн тәртібінен түскен жоқ. Үкімет отырысынан кейін облыс әкімі Нұрлыбек Нәлібаев дауылдан болған мәселелерді күн тәртібінен тыс қарады.
Облыс аумағында 1-2 сәуір күндері екпіні 24-28 метр секундты құрайтын шаңды дауыл тұрып, көптеген үйлердің шатырларының ұшуы, электр сымдары үзілуінің себебінен жарықсыз қалу тіркелген болатын. Жалпы 24 нысанға зақым келгендігі туралы облыстық төтенше жағдайлар департаментінің бастығы Руслан Қайрақбаев айтып өтті. Шатыр ұшу жағдайының 22 оқиғасы тіркеліп, бір үйдің терезесі сынған және 1 жылу беру нысанының мұржасы құлағандығы туралы ақпарат берілді. Атап айтар болсақ, облыс бойынша Қазалы ауданында 2, Қармақшы ауданында 1, Жалағаш ауданында 2, Сырдария ауданында 2, Шиелі ауданында 9, Жаңақорған ауданында 1, Қызылорда қаласында 7 нысан зақымданып, барлығы 24 жағдай тіркелген. 7 білім беру ұйымы (6 мектеп, 1 колледж), 3 ауылдық мәдениет үйі, 9 мемлекеттік мекеме, көпқабатты 2 тұрғын үй және 3 жеке тұрғын үй зақымданған.
Қала және аудан әкімдері шұғыл түрде облыстық білім, мәдениет және спорт, энергетика және тұрғын үй коммуналдық шаруашылық басқармасымен бірлесе отырып, жұмыс комиссияларын құруды облыс әкімі тарапынан тапсырылды. Құрылған комиссия оқиғаның жай-жапсарын анықтап, келген залалдың әсерінен болған шығындарды есептеп, қалпына келтіру жұмыстары үшін қаржы көзін реттеп, нақты ұсыныс беруге тиіс.
– Екі аптаның ішінде залал келген нысандардың барлығы қалпына келтірілуі керек. Оған бюджеттен бір тиын да қаражат бөлінбейді. Салынғанына елу жыл болған ғимарат болса түсінікті, ал кейінгі үш-төрт жылда пайдалануға берілген нысанның шатыры бір желге шыдас бермесе, оған бюджет қаражаты жұмсалмайды, – деді аймақ басшысы.
Қ.ӨТЕБАЙ
