Шынын айтуымыз керек, Қызылорда қаласы күннен күнге жаңарып, жасарып барады. Қала әкімінің жүйелі жоспарының арқасында ел игілігі үшін қолға алынған жұмыстар кезең-кезеңмен жүзеге асуда. Қаладағы құрылыс, жол жөндеу жұмыстарымен қатар әлеуметтік мәселелер де назардан тыс қалмауы тиіс. Осы жайды ескерген қала әкімінің орынбасары Жанмұрат Сейілов жақында қаладағы бірқатар әлеуметтік нысандарды аралап, жұмыс барысымен танысты.
Жанмұрат Жақсымұратұлы аралау жұмыстарын мүгедектігі бар адамдарға арналған компьютерлік орталығынан бастады. Қазіргі таңда орталық қызметін «Мүгедектігі бар адамдар мен жеке көмекшілер үшін компьютерлік сауаттылыққа оқытуды ұйымдастыру» әлеуметтік жобасы аясында «Жігер» Қызылорда облысының мүгедектерінің қоғамдық бірлестігі үйлестіріп келеді. Жоба аясында мүгедектігі бар адамдар мен жеке көмекшілер компьютерлік базалық дағдыларға бейімделуде. Соның нәтижесінде жыл басынан бері барлығы 421 адам әлеуметтік қызметтер алып, 192 адам компьютерлік оқу курстарына қатысқан.
«Қазақ саңыраулар қоғамының» Қызылорда облыстық филиалы ғимаратына барған қала әкімінің орынбасары орталықта жасап жатқан жұмыстармен танысты. Орталық есту және сөйлеу қабілеті бұзылған мүгедектігі бар адамдарға оңалтудың жеке бағдарламасы негізінде кәсіби сурдоаударма жасау бойынша ымдау тілі мамандарының қызметтерін жүзеге асырады. Қала бойынша естуінен мүгедектігі бар 184 адамға 17 ымдау тілі мамандары қызмет ұсынуда.
Одан кейін Жанмұрат Жақсымұратұлы «Қазақ соқырлар қоғамы» қоғамдық бірлестігінің Қызылорда облыстық филиалына табан тіреп, көзі нашар көретін мүгедектігі бар адамдарды қолдау қызметімен танысты. Аталған оқу-өндірістік кәсіпорын 1990 жылдан бастап тігінмен айналысып келеді. Мұнда 21 қоғамдық қызметкер қызмет етуде.
Қала әкімінің орынбасары «Қызылорда қалалық мүгедектер қоғамы» қоғамдық бірлестігі ғимаратында да болып, мүгедектігі бар адамдарға қызмет көрсету бойынша жасалып жатқан жұмыстармен танысты. Жанмұрат Жақсымұратұлы мүгедектігі бар жандарды қолдау әрі қоғамға бейімдеу мақсатында орталыққа кәсіпкердің демеушілігімен екі тігін машинасын табыс етті.
Кездесу барысында Жанмұрат Жақсымұратұлы ой-пікірлер мен ұсыныстарға құлақ тосты. Мекеме қызметкерлерінің мүгедектерге арналған тұрақ белгісін орнату, қажетті құрал-жабдықтарды алу және ғимаратқа жөндеу жұмыстарын жүргізу бойынша берілген ұсыныстары тыңдалып, мәселелерге орай нақты шаралар қабылданатын болды.
А.Сырлыбай
