Адам бойындағы бар игі қасиет мектеп қабырғасында қаланады. Сондықтан еліміздің ертеңгі ұлт тізгінін ұстар жастарымыздың білімі мен тәрбиесіне аса мән беру — басты мақсат. Осы мақсатты жүзеге асыру бағытында жұмыс жасап жатқан білім ошақтарының бірі – Шиелі ауданындағы Жеңіскүл Аманбайқызы Рыспембетова басқаратын №244 Ы.Жақаев атындағы орта мектебі.
Осыдан 49 жыл бұрын, 1974 жылдың 1 қыркүйегінде Шиелі қыстағының батыс жағынан жергілікті тұрғындардың өтініші бойынша сегіз жылдық орыс-қазақ мектебі болып ашылған мектептің алғашқы директоры Сейтхан Әлтаев. Алғаш мектепте 25 мұғалім, 205 оқушы қамтылған. 59 орындық жатақхана ғимараты есебінде ашылып, 3 ауысымда оқытылған. Көп ұзамай, 1982 жылы білім ордасы қазақ мектебі болып, дала академигі Ыбырай Жақаев есімімен аталған. Бүгінгі таңға дейін мектеп қабырғасынан екі жарым мыңға жуық түлек бітіріп, өмірдің әр саласында еңбек етуде. Мектеп 20 «Алтын медаль», 6 «Күміс медаль», 35 ерекше үлгідегі «Үздік аттестат» иегерлері шыққан ордалы оқу орны.
Білім беру саласында еңбектері еленіп «Қазақ ССР-ның халық ағарту ісінің үздігі» белгісімен марапатталған ардагер ұстаздар қатарында С.Әлтаев, М.Ақылбаев, М.Жүсіпбекова, Б.Қалтаева, К.Маханова, А.Әбуов, К.Бектасова. Н.Кенбаева, Х.Әнәпияевалар, ал аға мұғалім атағын алған Б.Еңсебаева, К.Жұмаділдаева және Қазақстан Білім министрлігінің мақтау қағазымен марапатталған К.Жакенова, С.Ақылбаева, А.Сахановалар бар.
Мектеп 2009 жылы жаңа ғимаратқа көшірілді. Қазірде мектепте 1068 бала білім алуда. 46 сынып комплектісі, 5 мектеп алды даярлық топтары жасақталған. Мектепте 138 мұғалім жұмыс жасайды. Білім ордасы талантты шәкірттерімен талай асуларды бағындырып келеді. Ұжым 2011 жылы жыл қорытындысы бойынша «Үздік тағылым» номинациясымен марапатталған.
50 жылдық тарихы бар білім ордасында 2022-2023 оқу жылында қол жеткізген нәтижелер көңіл қуантарлық. Жүлделі орын тұғырынан көріну — шәкіртін баптаған ұстаздың да, жүзі балбұл жанып шаттанған оқушының да арманы.
— Қазіргі таңда республика көлемінде төрт жоба қарқынды жұмыс жасап жатыр. Біздің мектепте де «Мектеп театры», «Ұшқыр ой» дебат алаңы, «Парламент» тынысы, «Оқуға құштар» мектеп жобасының жұмыстары жолға қойылған. Аудандық білім бөлімінің жоспарына сай мектебімізде «Ұшқыр ой алаңы» дебат клубтары жұмыстарын жандандыру, дебат қозғалысын дамыту, дебат ойындарының оқушылар мен мұғалімдер арасында трендке айналуын насихаттау мақсатында «Пікірсайыс — озық ойлы тұлға тәрбиелеудің кепілі» атты дебат клубы жетекшілерінің аудандық семинары болып өтті.
Семинардың екінші практикалық бөлімінде мектебіміздің үшінші қабатында арнайы жасақталынған «Жалынды жастар» дебат клубы бұрышының ашылу салтанатымен басталды. Ашылу салтанатына Шиелі ауданы бойынша білім бөлімінің басшысы Жібек Баймұратова қатысып, ізгі тілегін білдіріп, дебат клубы бұрышының қызыл лентасын қиды. Және семинарға қатысушыларға арнайы сөз сөйлеп, дебат жұмыстарының қарқынды жүргізілуіне сенім білдіретінін айтты. Мектебіміздің арнайы тілек кітабына ыстық ықыласы мен тілектерін жазып, өз қолтаңбасын қалдырды,- дейді мектеп директоры Жеңіскүл Аманбайқызы.
Қызылорда қаласында мектеп оқушылары арасында өткен «Айбын – 2023» әскери-патриоттық жастар жиынының облыстық жарысына Шиелі ауданының құрама командасы атсалысты. Команда құрамында №244 Ы.Жақаев атындағы орта мектебінің 11 сынып оқушысы Тұрат Маржан қатысып, жүлделі орын иеленді. Жекелей есепте 10 метр пневматикалық винтовка ату №8 мишень сайысы бойынша қыз балалар арасында ІІ орын жеңіп алды. Әскерилендірілген эстафета жарысында І орынды жеңіп алды. Маржанның жетекшісі АӘТД пәні мұғалімі Қайрат Ысқақов.
Көркем еңбек пәнінің мұғалімі Гүлзина Базарбаеваның шәкірті 7 сынып оқушысы Эмелья Төлебай аудандық сайыста «Күймелі арба» жұмысын қорғап 1-орын иеленді. Облыстық «Қыран елім — Қазақстаным» тақырыбындағы сурет байқауы бойынша қатыстырған бастауыш сынып оқушылары арасынан 1-сынып оқушылары Мұстафа Абатхан, Айкөркем Сейтхан, Раяна Қыдырбай 1-орын; 3-сынып оқушысы Жарқынбек Айша 2-орын, 4-сынып оқушылары Бекарыс Төлепберген, Нұрдәулет Бахытбайұлы, Ерболат Әділхан 3-орын иеленді. Қылқаламнан бояулар сырын ұғына білген шәкірттер талабына орай Гүлзина Хайруллақызы тапсырманы түрлендіріп, сабағын өте тартымды ұйымдастырды.
«Өрлеу» біліктілік арттыру ұлттық орталығы» АҚ филиалы Қызылорда облысы бойынша кәсіби даму институтының ұйымдастыруымен КСРО білім беру ісінің үздігі С.Нұртаев атындағы 9-10 сынып оқушыларына арналған республикалық олимпиадада мектептің 10-сынып оқушысы Бейбіт Нұрәли аудандық кезеңнен 1-орын алып, облыс кезеңнен жүлдемен оралды. Нұрәлидің жетекшісі Шолпан Сүлейменова Алғыс хатпен марапатталды.
«Менің Отаным — Қазақстан» туристік экспедициялық жасақтардың республикалық слетінің аудандық кезеңіне «Туризм — спорт, денсаулық, демалыс» бағыты бойынша қатысып, І орынмен облысқа жолдама алған мектептің 8-сынып оқушысы Нұрдана Нұрболатқызы облыстық кезеңде ІІ орын иеленді. Нұрдананың ізденімпаздылығы мен талабына жетекшісі Ақбаян Абдухаликова биік белестерді бағындырып, мектебіміздің жақсы атын шығаратын шәкірт болатынына сенімді.
«Үздік бастауыш сыныптағы жаратылыстану пән мұғалімі — 2022» кәсіби байқауында аудандық кезеңге 2-сынып мұғалімі Фариза Маханова қатысып, бас жүлдеге ие болып, мектеп мерейін көтеріп қайтты.
«Функционалдық сауаттылық – білім беру саласын жақсартудың негізгі шарты» атты магниттік мектептер арасында өткізілген тәжірибе алаңында мектеп театрының даярлық сыныптар арасында «Әтеш, мысық, түлкі» орыс халық ертегісін Г.Қозыбай мен Г.Мұхаммеджанова балалар арасында қойылымды қуыршақ және көлеңкелі театр ретінде ұйымдастырып көрсетті. Сонымен қатар бастауыш сынып мұғалімі Ф.Маханова «Су. Ол қандай екен?» тақырыбында жаратылыстану пәнінен өз тәжірибесінен практикалық ашық сабақ көрсетіп, аудандық білім бөлімінің арнайы дипломымен марапатталған.
2-7 сынып оқушыларының «Зерде» республикалық зерттеу жобалары конкурсының аудандық кезеңінде Еркежан Дәуренқызы бас жүлдемен, Сезім Төлебай І орынмен, Айару Алтай І орынмен марапатталып, облыстық кезеңде аталған оқушылар ІІІ дәрежелі дипломдарға ие болған.
Қылқаламы қолынан түспеген, бояулар әлемінің ханшайымы, қиялы ұшқыр әріптесіміз Мейраш Мырзағали Тараз қаласында өткен «Тараз жауһарлары» көркем еңбек пәні мұғалімдерінің, кәсіби суретшілер мен қолөнер шеберлерінің ІV Халықаралық симпозиумына қатысып, өзіндік талантымен таң қалдырып келді. Ұлттық құндылықтарымызды дәріптеген симпозиум барысында суретшілер сол жерде берілген тақырып бойынша сурет салып, өз қолтаңбаларының ерекшелігін көрсеткен. Әріптесіміз «Ең үздік пленэр туындысы» үшін дипломымен марапатталып, керемет көңіл-күймен, ерекше әсермен оралды. Сондай-ақ, «Бояулар құпиясы» жас суретшілер байқауының аудандық кезеңінен І орын иеленіп, облыстың кезеңге жолдама алған талабы таудай шәкірті Гүлфайруз Ұзақбай облыстық кезеңде 3 дәрежелі дипломмен марапатталған.
Жас мамандардың кәсіби шеберлігін арттыру мақсатында аудандық информатика пәнінен ұйымдастырылған «Үздік жас маман-2023» байқауына қатысқан әріптесіміз Табиғат Жұманов жиған тәжірибесімен, жаңашыл әдіс-тәсілдерімен, бойындағы бар өнерімен топ жарып, бас жүлде иеленіп, облыстық байқауға жолдама алып,
«Шын талант өз биігінде көрінеді» демекші, мектебіміздің 8-сынып оқушысы Әлмат Бақдаулет талантымен талайдың таңдайын қақтырып келе жатқан, арманына қол созған жас. Бақдаулет Қызылорда қаласында өткен жасөспірімдердің облыстық «Таңшолпан» эстрадалық телебайқауында ән бағыты бойынша өнер көрсетіп, ІІ орын иеленді. Керемет дауыс иесі музыкалық білімді Дәурен Беркімбаевтан алады. 300 адам бақ сынаған байқау нәтижесімен жүлделі оралған Сырдың жарық жұлдызы Бақдаулеттің «Ата, сенің атыңды бәріне таныстырамын» дейтін 7 жастағы жігерлі сөзі шындыққа айналды.
2023 жылдың 28 маусым — 2 шілде күндері Астана қаласында өткен Қазақстан Республикасының чемпионатында ойын көрсеткен Қызылорда қаласы Шиелі ауданының жасөспірім қыздар командасы 3-орынды қанжығаға байлап қайтты.
Мектебіміздің әдістемелік жұмыс жоспарына сәйкес әріптестер арасында әдіс-тәсіл алмасу мақсатындағы «Ең тиімді әдіс-тәсілдер, үздік идеялар марафоны» тақырыбында керемет шара ұйымдастырылып тұрады. Әдіс-тәсілдер алаңын жаңашылдықпен өткізуді жоспарлаған директордың оқу ісі жөніндегі орынбасары Гүлмира Амантайқызының ойын бастауыш сынып пән бірлестігі керемет ашып, шара мазмұнды өтті.
Әрбір білім беру ұйымының қызметі сондағы білім алушылардың білім сапасымен анықталатыны сөзсіз. Ол тікелей педагог кадрлардың кәсіби біліктілігіне байланысты. Бүгінде №244 Ы.Жақаев атындағы орта мектебінде 38 педагог-зерттеуші, 43 педагог-сарапшы, 25 педагог-модератор маман бар. Педагог кадрлардың кәсіби біліктілігінің артуына сәйкес оқушылардың білім сапасы да жылдан жылға өсіп отыр. Өткен оқу жылында 11-сыныпты 41 оқушы бітіріп, оның 35-і ҰБТ-ке қатысқан. Нәтижесінде мектептің жалпы орта балы 84-ті құраған. 2022-2023 оқу жылындағы 1068 оқушының білім сапасы 57%-ды көрсетіп отыр. Білім сапасын арттыру мақсатында үздіктер тәрбиелеп отырған білім ордасы үздіксіз жұмыстарын жалғастыра беретініне сенімдіміз.
Қ.Әндешұлы,
Шиелі ауданы
