Өткен жұмада кешкілік Қызылорда көшелері жасарып шыға келді. Сырдың жалынды жастары қала күні мерекесінің шымылдығын жастық жігермен, отты қуатпен ашып берді. Сыр сағасында салтанат құрған, дәуірлер көшін тарихымен сабақтастырған, бүгіннің рух бесігіне айналған, ежелден жырдың елі атанған, Сыр елінің салтанат шырайы — күріші, мұнайы, ауыл шаруашылығы өрістеп, келбеті күн сайын жайнаған Қызылорданың төл мерекесін атап өту дәстүрлі «Жастар карнавалымен» басталды. Білім мен ғылым, өнер мен мәдениет, денсаулық пен спорт, кәсіпкерлік пен технология саласында болашақ маман иелері болуға ұмтылған жасампаз жастардың шеруі қызылордалықтарға серпін берді.
Темір жол вокзалы маңынан басталған жастардың думанды шеруі қаланың орталық көшелерін әнге бөлеп, қала тұрғындарына шаттық сыйлап, Достық үйі ғимаратының алдына шабыттана келді. Облыс орталығында орналасқан жоғары және арнаулы оқу ордаларынан 400-ге жуық студент қамтылған ерекше кешке арнайы қатысқан қала әкімі Асылбек Шаменов қызылордалықтарды Қызылорда қалсының 205 жылдығымен қатар келген облыстың 85 жылдығымен құттықтады.
«Жастар қашанда қоғамның жаңа леп сыйлайтын қозғаушы күші, серпіліс қуаты. Сондықтан алдағы бір ай көлемінде өтетін шаралар да жоғары деңгейде, көңілді нотада түйінделеді деп сенемін» деген шаһар басшысы Асылбек Өмірбекұлы қаламыздағы қарқынды жұмыстар жөнінде тілге тиек етті.
Карнавалға қатысқан жастар көшелерде топпен жүруден бөлек, Достық үйі ғимараты алдында арнайы дайындалған тақырыптық қойылымдарын көрсетіп, қала тұрғындарына ерекше көңіл-күй сыйлады.
Дәстүрлі байқау нәтижесінде М.Мәметова атындағы Қызылорда педагогикалық жоғары колледжі бас жүлдені жеңіп алды. Байқауда педагогикалық жоғары колледжі жастары аймағымыздың ырысы саналған күрішті бейнелеп, шеруде өнер, білім, креативті ұшқыр ойларын паш етіп, ерекше дараланған болатын.
І орынды бірігіп өнер көрсеткен болашақ дәрігерлер Қызылорда медициналық жоғары колледжі, «Өркениет» медицина колледжі және «Авиценна» медицина колледжі иеленді. И.Әбдікәрімов атындағы Қызылорда аграрлық техникалық колледжі мен Қызылорда экономикалық гуманитарлық колледжі ІІ орынды өзара бөлісті. Жүлделі ІІІ орынға Қазанғап атындағы Қызылорда музыкалық жоғары колледжі, Абылайхан атындағы колледжі және М.Ықсанов атындағы политехникалық колледжі лайық деп танылды. Сондай-ақ, үздік өнер көрсеткен қызылордалық спортшылар мен С.Ысқақов атындағы құрылыс және бизнес колледжі арнайы номинациялармен марапатталды. Барлық жүлдегерлер мен жеңімпаздарға қаржылай сыйлықтар табысталды.
Қызылорда қаласы күні мерекесі алдағы бір ай көлемінде қаламызды думанға бөлейтін шаралармен жалғасатын болады. Әр күннің өз ерекшелігі болады.
Қ.Әндешұлы
