Белгілі балалар ақыны, ұлағатты ұстаз, ғибратты ғалым Рахат Наурызбаева 80 жасқа келуіне орай облыс әкімі Нұрлыбек Нәлібаев мерейтойымен құттықтады.
«Бүгін ақын, ұлағатты ұстаз, ғалым, Қазақстан Жазушылар Одағының мүшесі, педагогика ғылымдарының докторы Наурызбаева Рахат Наурызбайқызы мерейлі 80 жасқа толды. Кез келген кемелденген өркениетті мемлекет өз әдебиетін, мәдениетін, тарихын қастерлеп, оны жас ұрпақтың санасына сіңіруге күш жұмсайды. Қазақ әдебиетінің маңызды тармағы балалар әдебиетіне өз үлесін қосып, кішкентай оқырмандардың қызығып оқитын авторына айналған Рахат Наурызбайқызы апамыздың шоқтығы биік» деді», – деді Нұрлыбек Машбекұлы.
Жиында қоғам қайраткерлері Биғали Қаюпов, Алмагүл Божанова, Мәдениет қайраткері Шәкизада Әбдікәрімов, Қазақстан Жазушылар одағы облыстық филиалының төрағасы Қаршыға Есімсейітова мерейтой иесін құттықтады.
Расында, Рахат апай сөйлескен адамын баурап алады. Оның әдебиетке де, білім саласына да, ғылымға да қосқан үлесі орасан зор. Жасым келді деп, үйінде тыныш отырған емес, қайбір шаралардан қалмай, ойлы сөз сөйлеп, ортаны қыздырады. Қолынан қаламы түскен емес, шығармашылықтан қол үзген жоқ.
Бірде қазақтың белгілі классик жазушысы Әбдіжәміл Нұрпейісов Қызылордаға келген бір сапарында: «Сендер менің кітабымды оқыдыңдар ма?» деп сұрады. Ешкім үн қатпағаннан кейін: «Оқыған жоқсыңдар, себебі сендер ет жеп, сүйек мүжіп, қарын тойдырғаннан басқа ешнәрсе білмейсіңдер!» деп, ащы сөз айтып, Қ.Көшербаев бастаған әкім-қаралардың аузына құм құйғанда, әкімнің орынбасары Р.Кенжеханұлы тызақтап, сөйлейтін адам таба алмай, залды олай да бұлай кезіп кеткенде ортаға тайсалмай Рахат Наурызбаева шығып, сөз сөйлеп, өзінің кітаптарын ұсынған еді. Осылайша әкімдерді бір құтқарып қалғанын көзіміз көрген. Міне, қазақтың батыл қызы, ақын қызы Рахат Наурызбайқызына жасы сексенге толғанда құрмет көрсетілді.
Р.Наурызбаева 1944 жылы 25 қаңтарда Қазалы ауданында дүниеге келген. Саналы ғұмырының 56 жылын еліміздің білім саласының өркендеуіне жұмсаған. Шәкірттерге тәлім-тәрбие беруде өлшеусіз еңбек сіңірген ұлағатты ұстаз. 2009 жылы Қазан университетінің педагогика кафедрасында педагогика ғылымдарының докторы атағын қорғады. Рахат Наурызбайқызы 4 монографияның, 5 жыр жинағы мен 10 оқу-әдістемелік құралының, 200 радиохабардың авторы. Балаларға арнап «Бастау», «Ақ қозы», «Сергек Серік» атты жыр жинақтарын, «Үй ішімізбен қазақша үйренейік» оқу құралын және 100-ден аса ән жазған. ҚР Білім министрлігінің «Ыбырай Алтынсарин» төсбелгісі, Ресейдің Халықаралық Бейбітшілік және келісім қорының «Білім берудегі еңбегі үшін» медалі және өзге де марапаттардың иегері.
Біз білетін Рахат апай шаршадым демейді. Редакцияларға өз шығармаларын жолдап, мазалап отырады. Жан-жағына жанашыр көзбен қарайтын жанның жазған дүниелерінен де жылылық сезіледі. Біз де Рахат Наурызбайқызын мерейлі жасымен құттықтап, шығармашылық шабыт, ғибратты ғұмыр тілейміз.
Н.Көбегенұлы
