Биыл «Ұстаз мәртебесі» газетінің жарыққа шыққанына 13 жыл. Қазақы жыл қайырумен бейнелесек, бір мүшелді толтырдық. 2011 жылдың 18 наурызы күні Ұлыстың ұлы күні қарсаңында алғашқы нөмірі оқырманға жол тартып, тілектес жандарға қуаныш сыйлаған күн болған еді. Міне, содан бері талай өзгерісті басынан өткерді. Бүгін оқырмандардың қолына газеттің 496 нөмірі тигеді. Осы күні дәстүрімізден жаңылмай, жыл үздіктерін марапаттадық.
Газеттің шығармашылық ұжымы жылдағы дәстүрінен жаңылмай, басылыммен етене байланысып, әрі оқырман, әрі автор ретінде көзге түскен жанды «Ойлы оқырман» номинациясымен марапаттады. Оған ҚР Журналистер одағының мүшесі, белгілі ғалым, арда азамат Бауыржан Тажмағанбетұлы лайықты деп танылды.
Екінші диплом басылым тарихында өткір материалдар жазып, оқырманның көзайымына айналған газет тілшісіне беріледі. Бұл марапатқа «Ұстаз мәртебесі» газетінің алғашқы тілшісі, талай өзекті мәселелер көтеріп, оқырманды жедел ақпаратпен қамтамасыз еткен Дәулет Тұрсынханұлы ие болды.
Газет редакциясында өткен марапаттау рәсіміне басылымнан түлеп ұшқан шәкірттермен қатар «Сыр медиа» ЖШС директорының орынбасары Айжан Жұмабекқызы қатысып, газеттің туған күніне ыстық лебізін білдіріп, марапат иелерін құттықтады. Ал, Бауыржан Тажмағанбетұлы өзінің «Көктем келді» өлеңін нақышына келтіріп оқып берді.
Біз де газет оқырмандарын бүгінгі басылымның туған күнімен және Ұлыстың ұлы күні Наурыз мерекесімен құттықтаймыз. Шаңырақтарыңыз шаттыққа, ырыс-берекеге толып, «Ұстаз мәртебесі» отбасының сүйікті газетіне айнала берсін!
Құрметті оқырман! Осы уақыт ішінде бізбен бірге болып, әрбір жазылған ақпарат пен мақалаға ой білдіріп, редакцияның ұжымына тілектес болғаныңыз үшін рақметімізді айтамыз. Алдағы уақытта да газеттен қол үзбей, бізбен байланысыңыз нығая беретініне сенеміз.
«Ұстаз мәртебесі» газетінің шығармашылық ұжымы
