Мектепке дейінгі балалардың шығармашылық қабілетін театрландырылған ойын түрлерін қолдану арқылы балалардың тілін дамыту, сөйлеу мәдениеті мен ой-өрісін, дүниетанымын жетілдіруде үлкен нәтиже беретіні сөзсіз.
Білім мен тәрбие бастауын жас жеткіншектер ең алдымен балабақшадан алады. Бүгінгі таңда қоғамымыздың даму бағытында мектепке дейінгі тәрбие беру саласы мамандарының алдында жан-жақты дамыған, сауатты, саналы, өзіндік орны бар үлкенге құрмет көрсетіп, кішіге қамқор бола білетін азаматты тәрбиелеу мәселесі жүктеліп отыр. Бүлдіршіндердің білімді, білікті, саналы болуында ойынның алатын орны ерекше. Осы мақсатты «Бал бала Орда» бөбекжай-бақша мекемесі базасында «Заманауи театр түрлері арқылы балалардың коммуникативтік дағдыларын дамыту» тақырыбында аймақтық әдістемелік күн болып өтті. Балалардың дүниетанымын арттыруға арналған семинарға тәрбиешілердің тиянақты дайындалып келгені байқалды. Әр баламен жұмыс жасау, тілін табу, олардың адамдармен қарым-қатынаста болудағы ерекшелігіне сай әрекет етуде тәрбиешілер аянып қалған жоқ.
Семинарға облысты оқу орталығы (әдістемелік кабинет) мектепке дейінгі білім беру ұйымының әдіскері Айжан Өтегенова, қалалық білім бөлімінің мектепке дейінгі ұйым әдіскері Динара Әбдіқалықова қатысып, өз ойларымен бөлісті.
Е.Асан
