Жұлдызды мектептің жетістігі

Сыр өңірі білім беру саласында айрықша маңызы бар №101 мектеп-лицейінің негізгі ғимараты 2004 жылы ашылған. Жиырма жылға жуық тарихында мектеп ұжымы әрбір жадыраған жазда қанат қаққан қарлығаштарын шығарып салып, қоңыр күзде мол үміт­пен бүлдіршіндерді қарсы алады.

Мектеп ұжымы үшін биылғы оқу жылы ерекше басталды. Ел президенті Қ.Тоқаевтың қол­дауымен қосымша ғимарат пайдалануға беріліп, екі ауысымдық тәртіпке көшті. Заманауи ғимаратта оқу мәртебесін иеленген оқушы мен ата-ана, ұстаздар қауымының қуанышында шек жоқ.

«Қуанышты бөліссең еселенеді» дегендей, қуаныш қуанышқа ұласып, жыл қорытындысы бо­йынша мектеп «Орта білім беретін үздік ұйым» марапатын иеленіп, 34 миллион грант ұтып алды. Бұл марапат неше жылғы төккен тер мен ерен еңбекпен келген марапат екені даусыз.

«Білімді бала – жарқын бола­шақтың кепілі, ел ертеңі» деп, мектеп ұжымы білім мен ғылымды дамытуға өзіндік үлесін қосып келеді. Жаңашыл білім ордасы «Жасыл мектеп» жобасымен жұмыс жасап, республика бойынша Экология министрлігі ұйымдастырған І ұлттық «Үздік экологиялық білім беру» конкурсының 1-орын иеленген бірегей мектеп. Мектеп директоры Айгүл Алтынбекқызы Өткелбаеваның ұстанған қағидасы – әр күні бір жаңа нәрсе үйрену, үнемі ізденісте болу, жаңа жобалар мен идеялар ойлап табу. Осы ұстаныммен мектеп ұжымын қанаттандырып, мұғалімдердің кәсіби біліктілігін арттырып, креативті жобалар мен озық идеялардың жаршысына айналдырған. Осы ұстанымы өзінің Беларусь еліндегі «Экологиялық білім және тұрақты даму: халықаралық серіктестіктің келешегі» тақырыбындағы тағылымдамадан өтуіне себеп болса керек. Өз мектебінің тәжірибесінде жаңа жобаның тұсауы кесіліп, республика көлемінде айтулы конфе­ренциялар, өзекті тақырыптағы семинар мен вебинарлар өткізіледі.

– Экологиялық тақырыптағы жүргізілген жұмыстардың бәрі бала бойында экологиялық таза орта қалыптастыру, баланы үнемшілдікке, тазалыққа, жауапкершілікке, ізденіс жұмыстарына бау­лып, ғылым негіздерін үйретуге әкеледі. Еңбекқорлық пен ізденіс, жауапкершіліктің негізінде облыс­тық, республикалық, халықаралық білім додаларына қатысып, «жүзден жүйрік, мыңнан тұлпар» шыққан оқушылар аз емес. 2022-2023 оқу жылында облыстық пән олимпиадасында, халықаралық ғылыми жобалар байқауларында да оқушылар жүлделі орын иеленді. Екі оқушымыз АҚШ мемлекетінде бір жылға тегін білім алуға мүмкіндік алып, грант иеленді. ҰБТ нәтижесі бойынша жыл сайын оқушылар жоғары нәтиже көрсетіп, мемлекеттік грант иегерлерінің саны артуда,- дейді мектеп директоры Айгүл Алтынбекқызы.

Білім саласындағы қажырлы еңбектерінің арқасында бәсекеге қабілетті, жаңашыл, ұлағатты ұстаздар қатарынан екі жыл «Үздік педагог» номинациясын иеленіп, жекелеген пәндер бойынша 10 мұғалім «Жыл үздігі» атанды. Сонымен қатар, республикалық «Алтын тұғыр» олимпиадасы, халық­аралық «Преподавание без границ» конкурсы, халықаралық «Айбын-2023», облыстық «Сыр үміті» конкурстарынан да жүлдегерлер бар. Ұжымына үлгі бола білген А.Алтынбекқызының өзі де республикалық «Мектеп бас­шыларының конкурсы», I республикалық мектеп басшыларының дебат турнирінің жеңімпазы.

Көреген көшбасшы, білім саласының маңмаңгері Әли Мүсілімұлының жұлдызды мектебі әлемдік өркениетке жетуде уақыт сынынан сүрінбей өтіп, жас ұрпаққа сапалы білім мен саналы тәрбиені сіңіре бермек.

Н.Меңдібай

Пікір үстеу

Э-пошта мекенжайыңыз жарияланбайды. Міндетті өрістер * таңбаланған