Білім үйлерінің бедері мен беделі биік болмақ

Қазір демалыс уақыты болғанымен, көзді ашып-жұмғанша оқу жылы басталады. Қыркүйек келіп, күз түскенде оқушылар асқақ арманмен, үкілі үмітпен білім алу мақсатында алтын ұяға беттейді. Бұл күнде ата-аналар жаңа оқу жылына жаппай қам жасап, балаларының керек-жарақтарын түгендеу үстінде екені белгілі. Расында да әлемдік білім бәсекесіндегі қабілеттілік бүгінгі бүлдіршіндерден бастау алады. Ал, балғындар дер кезінде лайықты білім алып, бағытын айқындап алса, бағындырар биік те алыс емес.

Жаңа оқу жылы жақындаған сайын ата-аналардың да, ұстаздардың да жауапкершілігі күшейе түсетіні анық. Бұл жергілікті биліктің де назарынан тыс қалмайтын мәселе. Дегенмен, қызылордалықтар жаңа оқу жылына дайын ба? Білім ошақтарының бүгінгі жай-күйі қандай деген мәселе басты назарда болғаны дұрыс.

Осыны ескерген шаһар басшысы Асылбек Шаменов қала аумағындағы білім бөліміне қарасты бірқатар мекемелерді аралады. Басты мақсат, айтып өткеніміздей, білім ордаларының жаңа оқу жылына дайындығын тексеру, қадағалау.

Қала әкімі алдымен Б.Құлтекенов көшесіндегі жеке кәсіпкердің қаражаты есебінен салынып жатқан, облыста әзірге баламасы жоқ 1500 орындық мектептің құрылысымен танысты.

«Байтерек Скул KZ» ЖШС-нің жауапкершілігіндегі жеке білім ұясы барлық заманауи құрылғылармен жарақталып, бір мезгілде 1500 оқушыны қабылдай алады. Ең бастысы жеке мектеп болса да, білім беру ақысыз негізде жүргізіледі. Бұндай сыйымдылықтағы мектеп салу қажеттілігі өңірдегі 3 ауысымдық оқуды болдырмаудан туындап отыр.

Мектепті аралап шыққан қала әкімі Асылбек Шаменов мердігер мекеме басшысына балалардың еш алаңсыз білім алуына қажетті жағдай жасалуын, олардың қауіпсіздігі қамтамасыз етілуін тапсырды.

Содан соң шаһар басшысы Ы.Алтынсарин атындағы №10 мектеп-лицейге жүргізіліп жатқан күрделі жөндеу жұмыстарымен танысты. Мұнда жауапты мердігер мекеме «SCS-Инжиниринг» ЖШС-не тиесілі жұмыстар – мектептің қасбеті, терезелері, ішкі қабырғалары мен едендері және есіктері, электр желілері мен кәріз жүйесін жаңартып, мектеп ауласын асфальттау. Сәуір айында басталған күрделі жөндеудің қазіргі таңда 60 пайызы ғана орындалған екен.

Қала әкімі мердігер мекеменің директорына оқушылардың жаңа оқу жылын өз білім ұясында жалғастыруы үшін жұмысты жылдамдатуды, сондай-ақ сапалы түрде мектеп басшылығына өткізуді тапсырып, барлығы өзінің қатаң бақылауында болатынын айтты.

А.СЫРЛЫБАЙ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған