Биыл М.Мәметова атындағы Қызылорда педагогикалық жоғары колледжінің құрылғанына 90 жыл және қазақтың қайсар қызы Мәншүк Мәметованың туғанына 100 жыл толып отыр. Осы орайда, ұлағат ұясы мен батыр мерейтойы республика көлемінде аталып өтіледі. Жоспарға сәйкес, мамыр айының 5-і күні «Жастық жалынымыз – сүйікті Отанымызға» тақырыбында жастардың патриоттық форумы өтіледі.
«Ұстаз мәртебесі» газеті басылымның кезекті санын осы қос мерейтойға арнап отыр. Форумға қатысушылар колледж қабырғасында түрлі тақырыптық алаңдарда тәжірибе алмасып, секция жұмыстарына тартылады. Мәртебелі қонақтарколледждің материалдық-техникалық базасымен, атап айтар болсақ, «Мектепке дейінгі тәрбие және оқыту» мамандығының «Дуальді оқыту» кабинетімен, «Білім нұры» – колледждің педагогикалық даму тарихын айқындайтын галереямен және педагогикалық мамандықтар бойынша«Құзыреттілік орталығымен», «MM handmade Studio» үйірмесінің жұмыстарымен, сонымен бірге Кеңес Одағының Батыры Мәншүк Мәметоваға арналған «Ерлікке тағзым» залымен танысады. Республикалық форумға Білім және ғылым вице-министріШолпан Каринова, Қазақстан халқы Ассамблеясының Аналар кеңесінің төрайымы Н.Ыдырысқызы және тағы да басқа мәртебелі меймандар келеді деп күтілуде.
Осы күні «Достық үйінде» «Жаңа Қазақстан: болашаққа үміт, жастарға сенім» форумның пленарлық мәжілісі өтеді. Форумға қатысушылар Т.Әліпқали мен А.Мәметованыңкітабының желісі бойынша Н.Бекежанов атындағы Қызылорда облыстық қазақ академиялық музыкалық драма театрында сахналанатын«Моншақ. «Мәңгілікке маздаған қыршын ғұмыр»театрландырылғанмюзиклын тамашалай алады.
