«Мұғалімдердің үздіксіз кәсіби дамуы өмірді өзгертеді» семинары педагогтердің кәсіби құзыреттілігін дамытуға арналды

Адам баласын байланыстыратын – сөз, сөйлесу. Қазақ халқы көркем сөйлеп, шешендік өнерді жанына серік еткен ұлттардың бірі. Бірақ жаһанда тек бір ғана ұлт жоқ. Әр ұлттың бір-бірімен байланыстырушы өз тілі болады. Қазіргі таңда дамушы мемлекеттердің таңдауы – ағылшын тілі. Көркем әдебиет те, кино да, тіпті ғылым да ағылшын тілінде сөйлейді. Бұл дегеніміз ағылшын тілінің әлеуетінің жоғары екендігін көрсетеді. Жаһандану процесінде өз тілімен ғана шектеліп, әлемді сөйлеткен тілде сөйлеу артықтық етпейді. Себебі, шет мемлекеттерге туристік сапармен, кейде іссапармен барсаңыз да, тіл қуаты көмекке келеді.

Мемлекетіміз де білім саласына баса назар аударатыны белгілі. Ағылшын тілінің алға шыққандығы біздің елімізді де ойландырмай қоймайды. Келешек ұрпақтың елімізге келген туристермен болсын, шет елдегі байланыстарын нығайту үшін, ғылым саласында үлкен нәтижеге қол жеткізу мақсатында ағылшын тілін үйрену керектігін білім ордасының ұстаздары ескертеді. Ағылшын тілі тақырыбына байланысты Абай атындағы үш тілде оқытатын дарынды балаларға арналған арнайы мамандандырылған сыныптары бар мектеп базасында Қызылорда қаласы бойынша білім бөлімінің ұйымдастыру жұмыстары нәтижесінде «Continuing professional development of teachers will change lives» («Мұғалімдердің үздіксіз кәсіби дамуы өмірді өзгертеді») тақырыбында облыстық семинар ағылшын тілі пәні мұғалімдердің қатысуымен болып өтті.

Қалалық білім бөлімінің әдіскері Ғалия Ермағанбетқызы ағылшын тілі пәнінің мұғалімдері аталған семинарға қатысты. Ұстаздардың тәжірибе алмасуы арқылы жаңашылдықты қалыптастыру, білім беру ұйымдарының арасындағы әріптестік қатынастарды дамыту, кәсіби тәжірибені жаңарту, педагогтердің кәсіби құзыреттілігін дамыту, жаңалықтарды қабылдау мен меңгерту шараның басты мақсаттары тізімінде.

Семинар барысында Ә.Мүсілімов атындағы №101 мектеп-лицейінің ағылшын тілі пәні мұғалімі Д.Садырбаева «My way of making my dream come true” тақырыбында «Үздік педагог бағдарламасымен», С.Толыбаев атындағы атындағы №3 мектеп-лицейінің ағылшын тілі пәні мұғалімдері М.Ердібек, Б.Мнажев «Болашақ» бағдарламасымен, Т.Есетов атындағы №264 мектеп-лицейінің ағылшын тілі пәні мұғалімі А.Амангелді «Fulbright tea» бағдарламасымен және №144 мектептің ағылшын тілі пәні мұғалімі Ұ.Рысмағамбет «Ағылшын тілін оңай үйрену лайфхактары» тақырыбында ортаға шығып, өз тәжірибелерімен бөлісті.

Семинар «IELTS» тест орталығының ашылу салтанатымен жалғасын тауып, тест орталығының жұмыс барысы келген қонақтарға таныстырылды. Облыстық оқу орталығының әдіскері Сәуле Асылбек­қызы және қалалық білім бөлімінің әдіс­кері Ғалия Ермағанбетқызы семинар соңында қорытынды сөз сөйлеп, болған шараның жоғары дәрежеде өткеніне тоқталды. Жас ұстаздардың жасап жүрген еңбектерінің дұрыс екендігін, оларға дейін еңбек еткен ұстаздардың озық ойлары мен еңбектерінен хабардар етіп, семинарға қатысушы мұғалімдерді сертификаттармен марапаттады. Семинарға қатысушы ұстаздар да өткен шарадан әсерлерімен бөлісіп, алғыстарын айтты.

Тіл – байланыстырушы, тіл – үнемі қозғалыс­та болуы керек құрал. Егер шет тілінде үнемі өзге адамдармен байланысып отырмасаңыз, тілдің тіршілік етуі де өледі. Қазіргі кейінгі жас-жеткіншектердің ағылшын тіліне әуес болуы қуантарлық жағдай. Білімі дамуын тоқтатпаған елдер өмір сүруін де тоқтатпайды. Қадыр Мырзалиевтің «Өзге тілдің бәрін біл, өз тіліңді құрметте» дегені секілді, ана тіліміздің абыройын да естен шығармағанымыз жөн.

Қазақбай ӘНДЕШ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған