Қызылорда қаласындағы «Orda» жоғары колледжінде еркін форматта «Халықаралық тәжірибе колледж кеңістігінде» тақырыбында пресс-конференция болды. Тақырып та бекер қойылып отырған жоқ. Мемлекет басшысы Қасым-Жомарт Тоқаев қазіргі заманда бәсекеге қабілеттіліктің басты факторының бірі барынша цифрландыру екеніне назар аударып: «Елімізге жас, білімді әрі ынталы мамандар керек. Цифрландыру жөніндегі ұлттық жобаның аясында кемінде 100 мың жоғары білікті ІТ маман даярлау қажет»,- деген сөзін іске асыруды жолға қойған секілді. Түлектерін кәсіби біліктілікпен, сапалы біліммен еңбек нарығына шығаруды көздеп, алға жүйелі жоспар құрған жаңашыл білім ордасы бүгінде IT саласының білім бағдарламасы бойынша 400-ден астам болашақ маманға, логистика саласы бойынша 300-ге жуық балаға білім беруде. «Егер осы қарқынымызды арттырар болсақ, студенттердің әлемде қалыптасқан озық технологиялармен танысу арқылы жоғары білікті маман ретінде кез келген маңызды міндетті шешулеріне мүмкіндік берері сөзсіз» дейді колледж ұстаздары.
Колледждің стратегиялық бағыттарының бірі – халықаралық ынтымақтастықты дамыту. Бүгінгі күні Германия және Швейцария мемлекеттерінің IT және логистика мамандарын даярлайтын жетекші кәсіпорындарымен, студенттермен, оқытушылар және зерттеушілермен өзара тәжірибе алмасу, екіжақты ғылыми-зерттеу жобаларына қолдау көрсету іс-шаралары жүзеге асырылуда. Колледж әлемдік білім беру кеңістігіне қосылу жолында ілгері қадам жасауда. Білім беруді әлемдік стандарттық деңгейге көтеру, бәсекеге қабілетті жаңа буын қалыптастыру, білім беру қызметі нарығынан орын алу, жетекші отандық және шетелдік білім беру мекемелерімен тең дәрежеде қарым-қатынас орнату мақсатында халықаралық ынтымақтастық аймағын кеңейту бойынша алыс, жақын шет елдердің оқу орындарымен, өндіріс орындарының мамандарымен байланыс орнатуға көшкен. Осы орайда «SES Senior Experten Service» әлемдік сараптама қызметін ұйымдастыру мекемесімен меморандум жасау жоспарланған. Меморандум аясында Швейцариядан ІТ саласының маманы Вальтер Шмуц және Германиядан автокөлік жөндеу саласының маманы Манфред Циглер арнайы шақыртылып, қазіргі уақытта оқытушыларға дәріс беруде.
Басқосуда Вальтер Шмуц Қазақстанға бірінші рет келгенін, Қазақстанның табиғатына және адамдардың өзіне деген мәдениеттілігіне дән риза екенін айтты. Ол Қазақстандағы IT саласына үлес қосқысы келетінін жеткізді. Орда колледжінің арнайы жабдықтандырылған IT кабинеттерімен танысып, Қазақстанның жоғары дәрежеге жеткеніне қуанышты екенін білдірді. Шетелдік мырза колледж оқытушыларының балаларға сабақ өткеніне риза болыпты. «Ұстаз бен шәкірт арасындағы ауызбіршілік пен сыйластықтың мол екеніне көзім жетті» дейді. Ал, Манфред Циглер өзінің көлік саласында қызмет жасап келе жатқанын және қарапайым мотоциклден бастап үлкен салмақтағы көліктерді жөндеп, олардың қыр-сырын білетінін әңгімелеп берді. Германиялық мырза қазақтардың жылы құшақ жайғанына, сый құрмет көрсеткеніне ризашылығын білдірді. Ол колледжде көлік логистика саласы бойынша мамандардың мықты екендігіне көзі жеткенін айтты. Басқосу барысында шетелдік мамандар колледж студенттері мен ұстаздарының қойған сұрағына жауап берді, студенттердің сауалдарды ағылшын тілінде жеткізгендеріне риза болды.
Шетелдік компанияның Қазақстандағы «SES Senior Experten Service» әлемдік сараптама қызметін ұйымдастыру мекемесінің қызметкерлері Мадина Тулепова және Жанат Сапаржанова Германияда болған сапарларымен және ол жақта жұмыстың қалай қарқынды жүріп жатқанын түсіндірді.
Конференция қорытындысында колледж директоры қонақтарға алғыс айтып, алдағы уақытта тығыз байланыста болатынын жеткізді.
Бауыржан Нұржанұлы
