Сапалы білім – жарқын болашақтың кепілі

Білім – адам болашағының жарқын болуының негізгі құралы. Сапалы білімді бойына дарытқан шәкірттің келешекте өз жетістіктерінің себепкері ғана емес, елдің дамуына да үлесін қосатын ықпалды адам екендігі анық. Мемлекетіміздің білім саласына баса назар аударып жатқаны да құптарлық іс. Себебі бүгінгі шәкірттің ертеңгі мемлекет қызметкері болуы – уақыт еншісінде. Адамзат қазіргі таңда бір орында тұрақтап қалуды дұрыс көрмейді. Зымыраған уақыт жылдам шешімдерге әкелетіні де – бәсекелестіктің көрінісі. Келешегін ойлаған ел басшылары өз мемлекетінің қабырғасының құламай, әлемге өзінің бағыт-бағдары, ұстанымы бар екендігін көрсетуі үшін білімді дамытуға үлкен жауапкершілікпен қарайды. Қазіргі білім беру жүйесінің бұрынғыға ұқсамайтыны да қалыпты жағдай. ХХІ ғасыр ақпарат пен технологиялар кезеңі. Қолға қару ұстаған дәуірдің ескілікте қалып, қазіргі мемлекеттердің негізгі қаруы білім, қорғанышы ғылым деңгейінің күштілігі екенін заманның өзі де көрсетіп тұр. Әлемде болып жатқан түрлі тарихи жағдайлар, барлық мемлекеттің бәсекеге қабілетті ел болуына итермелейтіндей. Ықпалды державаның аяққа енді тұра бастаған мемлекеттерге үлгі болуы да соның себебі. Пайдалы қазбаға емес, үлкен жаңалықтарды дүниеге әкелу – мемлекет болашағының мәңгілікке мықты болып қалыптасуының кепілдігі.

Біздің еліміз де әлемдік додада біліммен оза шабуды көздейді. Еліміздің әрбір өңірі білімнің дамуына өздерінің үлесін қосуда. Қызылорда облысы да оқушылардың сапалы білім алуына жағдай жасап отыр. Байқоңыр қаласында №277 мектеп-лицейінде «Мектепті тиімді басқару: тәжірибе, ізденіс, нәтиже» атты кездесу болып өтті. Облыс көлеміндегі бұл жиын мектеп туралы ақпараттар, жұмыс жасаудағы бағыттары туралы, мектепшілік жобалардың тиімді тәжірибесіне негізделді. Іс-шараға білім саласында жауапты қызмет атқарып жүрген аза­маттар қатысты. Қызылорда облыстық білім басқармасына қарасты оқу орталығының директоры С.Асқаров, Қармақшы ауданының білім бөлімінің басшысы Г.Абдазиева, аудан­дық әдістемелік кабинет меңгерушісі Ш.Наукебаева және облыстық мектептердің директорлары, білім саласының басқа да қызметкерлері қонақтар арасынан табылды. Шараға көрік берген барабаншылар мен оркестрдің шығармашылығын тамашалаған қонақтар әсерленіп, ризашылықпен қол соқты.

Алғашқылардың бірі болып сөз алған білім бөлімінің басшысы Г.Абдазиева облыстық көлемдегі бұл шараның маңыздылығына тоқталып, тәжірибе алмасудағы рөлін айтса, Ж.Тлеугабылова мектеп ұжымының жұмыстарына сәттілік тілеп, келген қонақтарға алғыс білдірді. Бейнероликтен мектептің тарихы, жетістіктері туралы ақпараттар қонақтарымыз­ға көрсетілді. Мектеп жанынан құрылған халықаралық байқаулардан орын алып жүрген «Робототехника» үйірмесі таныстырылды. Тәжірибелік бұл кездесуде 2022-2023 оқу жылының соңында ашылған «Обсерватория» кабинетімен танысу жиынның маңызды бөлігі болатын. Заман талабына сай құрал-жабдықтар, білім алушыларды астрономияға қызықтыратын кабинеттің бары, телескоп көмегімен аспан әлемімен танысып білуге көмектесетін бұл кабинет қонақтардың көңілінен шықты. Дебат орталығының мүшелері ұйымдастырған дебат ойындарын, мектеп театрының ағылшын тіліндегі «Harry Potter» қойылымын тамашалап, пікір білдірді. Байқоңыр қаласында орналасқан «В.Челомей атындағы Мәскеу ғарыш мектеп-лицейімен» бірлесе жасаған «Ракета ұшыру» жобасы аясында бірлестіктің нәтижесін көрсету мақсатында кездесудің соңында оқушылардың өздері еңбектене жасаған ракеталар ұшырылды.

Жиынның қорытынды сөзін Қызылорда облыстық оқу орталығының директоры Сырым Асқаров сөйледі. Ол «Бүгінгі куә болып отырған сан түрлі жұмыс бір күннің емес, бірнеше жылдардың жемісі мен нәтижесі» деп пікірін білдіре келе оқушылардың қабілетін ерекше атап, ұжымның еңбегін жоғары бағалады.

Әлемдегі барлық технология­лық жетістіктердің иесі – шетел азаматтары. Өздерінің жасаған жаңалықтары арқылы өз отанының дамуына септігін тигізіп отыр­ған бұл азаматтар – мектептен шыққан қарапайым оқушылар. Білімге құштарлық, тоқтаусыз ізденістердің арқасында заман талабына сай құралдарды әлемдік нарыққа шығарып отырған жайы бар. Осындай жетістіктерді зерттеп қарасаңыз, сапалы білімнің нәтижесін көресіз. Біздің оқушыларымыздан да технократтардың шығатынына сеніміміз мол. Оқушылардың қабілетін байқап, шәкірттерінің жаңалықтарын білім саласындағы қызметкерлерге дәріптеу мемлекет тарапынан қолдау жасалуына үлкен септігін тигізеді. «Болар баланың бетін қақпа белін бу» демекші, жаңалыққа жаны құштар жастарға мүмкіндік берілгені дұрыс. «Бұлақ көрсең көзін аш» деп, оқушылардың ішінде тұншыққан қабілетін біліммен жарастырып, жарыққа шығару керек. Байқоңыр қаласында өткен бұл жиынның да түйіні осы болды.

Қазақбай ӘНДЕШҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған