Шығармашыл жастар «Кәусарда» бас қосты

Өткен жұмада «Ұстаз мәртебесі» газетінің жыл басында жас дарындыларды қолдау мақсатында қолға алған «Кәусар» жобасының оқушылармен кезекті кездесуі болды. Басылымның бас редакторы Нұрлан Көбегенұлы, газет тілшісі, жас ақын Қазақбай Әндешұлы Ғани Мұратбаев атындағы №171 орта мектебінде «Кәусардың» ақпан айындағы отырысына қатысты. Мектеп директоры, жастардың жанашыры Бекзат Ибраев сөз алып, оқушыларға шабыт бере сөйлеп, келген қонақтарға алғысын білдірді.

Қазақтың қасиетті домбырасымен орындалған «Балбырауын» күйі жиналғандарды бір серпілтіп алды. Содан кейін шығармашыл оқушылар өз өлеңдерін, шығармаларын оқыды. Мектептің 10-сынып оқушысы Жанел Кәрім «Мен – қазақтың қызымын», «Туған жер», 7-сынып оқушысы Адина Серік «Ғани атаға арнау», 11-сынып оқушысы Салима Усенова «Ұлттық сезім» өлеңдерін мәнеріне келтіріп оқып берді. Ал, Абайдың қара сөздері, Мұхтар Шахановтың өлеңдерін оқыған оқушылар кездесуге қатысқандардың ризашылығына бөленді.

Оқушылардың шығармаларына Нұрлан Көбегенұлы мен Қазақбай Әндешұлы пікір білдіріп, өз ойларымен бөлісті. Оқушылар да кідіріп қалмай, мектепте жасырынып өлең жазатындар барын айтып, жариялау­ға ұялатынын жасырмады. Тіпті кей оқушылардың тек жыр додаларына арнап өлең жазатынын білдік

Н.Көбегенұлына «Ұстаз мәртебесі» газетінің алғашқы нөмірі туралы сұрақтар қойылды. Ол өткен күндердің қызықты сәттерін есіне алып сұрақтарға жауап берді.

Қ.Әндешұлы да қарап қалмай, өз өлеңдерін оқып, оқушыларға өз кеңесін айтты. Ұстаздар келген қонақтарға рақметін айтып, «келесі жолы ауқымды етіп жыр сайыстарын ұйымдастырайық» деп, өз ұсыныстарын жеткізді.

Оқушылар мен редакция қызметкерлері арасында қызықты диалог өрбіп, шығармашыл жастар үшін пайдалы кездесу кеші болды. Газеттің бас редакторы оқушыларға жаңа туындыларын газетке жариялау үшін редакцияға келіп, кеңес алуға болатынын айтты.

«Кәусардың» келесі отырысы, шығармашыл оқушылармен кездесу наурыз айының аяғында болмақ.

З.Қонысжан

Пікір үстеу

Э-пошта мекенжайыңыз жарияланбайды. Міндетті өрістер * таңбаланған