СЫР ЕЛІНІҢ ТҮЛЕГІМІЗ, ЖАРҚЫН БОЛАШАҚ ТІРЕГІМІЗ

Мәншүк Мәметова атындағы жоғары педагогикалық колледжінде «Сыр елінің түлегіміз, жарқын болашақ тірегіміз» атты колледж бітірушілеріне арналған диплом тапсыру кеші өтті. Шарада 12 біліктілік бойынша 18 топтан 378 студент маман құжатын иеленіп, жаңа өмірге жолдама алды.

Бітіру кеші әр түрлі мамандық иеленіп, еліміздің түкпір-түкпіріндегі дарынды шәкірттердің қатарын толықтырғалы тұрған бітіруші түлектеріміздің жұлдызды шеруімен басталды. Салтанатты жиында облыстық білім басқармасы техникалық және кәсіптік білім беру бөлімінің басшысы Б.Есенбаев, колледж директоры Ж.Тоғанова бітіруші студенттерге ақжолтай тілегін жолдап, үздік дипломдарды табыстады. Әлеуметтік әріптестер атынан «Жастар ресурстық орталығы» мекемесінің басшысы Әліби Басаров ЭЕТ-Е-19 тобының білім алушысы Гүлназ Аманқызына жұмыс орнына жолдама ұсынды. Биылғы бітіруші түлектердің ата-аналары атынан «Қазақстан Республикасы колледждерінің үздік 100 студенті» республикалық конкурс жеңімпазы, үздік диплом иегері Гүлжан Мұстафаеваның әкесі Әкімжан Мусилимов сөз алып, түлектерге жылы лебізін білдірді.

Жарқын студенттік сәттер, мол мүмкіндіктер және колледж ұжымына сапалы білім мен тағылымды тәрбие үшін бітіруші түлектер атынан алғыс айтылып, ата-аналар зор ризашылық білдірді.

Колледжде білім алумен қатар шығармашылық қабілетін көрсете білген, қоғамдық жұмыстарда белсенділік танытқан, жетістіктер мен табыстарға жеткен бір топ бітіруші жастардың ата-аналары колледж директорының «Алғысымен» марапатталды. Жылдың қорытынды шарасында түлектер біліммен қатар тәрбиені де үйреткен оқытушыларына жылы тілектерін білдіріп, әрі қарай шағын концерт және студент жастарға арналған шоу бағдарламаға ұласты.

Еліміздің жасампаз перзенттері, батыр Мәншүктің ізбасарлары өздері оқыған білім ордасының мерейін асырып, әрдайым жетістіктер биігінен көрінетініне сенімдіміз.

З.АХМЕТ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған