ҚЫЗЫЛОРДАЛЫҚ ЖУРНАЛИСТЕР ҚҰРМЕТКЕ ИЕ БОЛДЫ

Журналистика басқаға ұқсамайтын, өзгелерден айырмашылығы бар мамандық. Журналист өз шығармашылығы арқылы қоғамға, адамзатқа қызмет етеді. Ол әр кезде жаңаны жақтаушы, жақсылықты қолдаушы. Редакция жұмысында бірінші шығармашылықпен, екінші редакцияның хат қоржынына келіп түскен хаттарды әдеби өңдеумен, үшінші ұйымдастырушылықпен айналысады, яғни көптің алдында өз ойын бүкпесіз, шынайы жеткізе алуы тиіс. Ол үшін журналистке білім мен қабілет керек. Оған қоса өмірдегі құбылыстардың мәнін түсіне білу, оны сезініп, ой елегінде қорыта білу де үлкен қасиет. Қандай оқиғаны болсын, тапқырлықпен, сенімді түрде, көз жеткізіп барып жазу журналистке тән. Ал, өмір жайлы толғап айта білу үшін тіл, сөз байлығын орнымен қолдану қажет.

Осы қасиеттерді бойына сіңірген журналист қоғамдық қайраткер бола алады. Ол уақыт, заман ағымын жақсы түсінуі тиіс. Идеяға толы материалдар жазып, көпшіліктің назарын аударып, қоғам дамуына серпін бере алуы керек. Журналистің тағы бір қасиеті, оның саяси-әлеуметтік сауаттылығына, дүниеге деген көзқарасына, өзіндік позициясына байланысты. Ол үшін журналистке жан-жақты білім мен саяси тұрғыдан өсу, өз өмірін халық болашағы үшін арнайтын азаматтық ұстанымы болуы керек. Әрбір журналист өз елінің шын патриоты болумен бірге, сол мемлекеттегі және жер жүзіндегі оқиғалар мен құбылыстарға сергектікпен қарап, жедел жариялап отыруы міндет.

Қызылордалық журналистер осы айтылған талаптарға, сынға жауап беріп келеді. Бүгінде облыстың медиа кеңістігінде 148 бұқаралық ақпарат құралы жұмыс жасауда. Оның 13-і мемлекеттік болса, 135-і тәуелсіз. Олардың ішінде 120-сы газет, 25-і интернет-сайт пен ақпараттық агенттіктер, 3-еуі телеарна. Аумақтық жағынан айтар болсақ, 137 БАҚ облыстық, 2-еуі қалалық, 9-ы аудандық деңгейде ақпарат таратады.

Биылғы кәсіби мерекеде, бұқаралық ақпарат құралдары қызметкерлері күніне арналған «Қанатты қалам-2023» мерекелік салтанатты шарасында жергілікті журналистер бас қосты. Аймақ басшысы Нұрлыбек Нәлібаев қалам иелерін төл мерекемен құттықтап, ақжарма тілегін арнады. Аймақ басшысы ақпарат ағынынан қалмай, өз оқырмандары мен көрермендеріне адал қызмет етіп, мамандығын қадір тұтқан журналистердің қоғамдағы алар орнына тоқталды.

– Еліміздің Президенті Қасым-Жомарт Кемелұлы Тоқаев «Әділетті Қазақстан – Адал азамат» тақырыбында Түркістанда өткен Ұлттық құрылтайдың екінші отырысында: «Масс-медиа – елімізді жаңғырту ісіне ерекше ықпал ететін сала. Сондай-ақ, билік пен қоғам арасындағы пәрменді байланыс құралы. Ақпарат құралдарында түрлі көзқарастар тоғысады. Оны қоғам тынысының барометрі деуге болады. Осы саладағы өзекті мәселелерді шешу үшін ақпарат саясатын түбегейлі қайта қарау қажет, – деп айтқанын білесіздер. Бүгінде «Масс-медиа» деп аталатын жаңа заң қоғамда кеңінен талқылануда. Бұл жобаның БАҚ өкілдері үшін маңызы зор болмақ.

Сыр өңірінен шыққан жүздеген журналист әлемнің түкпір-түкпірінде, еліміздің әр өңірінде, өз өлкемізде абыройлы қызмет етуде. Олар ел өміріндегі әр жетістікті өз жетістігіндей көреді. Қиындықты жүрегімен қабылдап, әр сәтті қалт жібермеуге тырысады. Барша баспасөз, теледидар, радио, интернет басылымдары қызметкерлерінің еңбегіне шығармашылық табыс, дендеріңізге саулық, шаңырақтарыңызға құт-береке, амандық тілейміз, – деді Нұрлыбек Машбекұлы.

Салтанатты шарада аймақтың ақпарат саласының дамуына елеулі үлес қосқан бірқатар БАҚ өкілі облыс әкімінің арнайы марапатына ие болып, құрмет төрінен көрінді. Қызылорда қоғамдық телеарнасының құрылтайшысы, ақын Шәһизада Әбдікәрімов Қызылорда облысының Құрметті азаматы атанды. Бірқатар БАҚ қызметкеріне облыс әкімінің, ҚР Ақпарат және қоғамдық даму министрлігінің марапаттары табысталды. Мұнан бөлек, 20 БАҚ өкіліне түрлі номинация, 10 сала ардагеріне шипажайға жолдама берілді. С.Бермағанбетов атындағы жас журналистер байқауының жеңімпаздары да арнайы марапат алды.

Журналистика бүкіл әлемде құрметке ие және елдің көз алдында бақылауда болатындықтан да, сынға көп ұшырайтын мамандық. Себебі, олардың жазғандары мен айтқандарын миллиондаған адам тыңдап, көріп, оқып отырады. Бізге үлгі-өнегені алыстан іздеудің қажеті жоқ. Кешегі Алаш азаматтары нағыз идеал болуға әбден лайық. Олар халыққа қалтқысыз қызмет етудің нағыз үлгісін көрсетті. Қазақ журналистикасы, ең алдымен, халықтың білім-білігін, талғамын арттыруға қызмет еткені жөн. Айналып келгенде, қоғам дамуында журналистің ролі зор болуы тиіс.

Тоталитарлық тәртіп тұсында “Билік – БАҚ – халық” бірыңғай жоғарыдан төменге дейін әмір беретін әкімшілік сипатта болды. Ал, демократиялық қоғамда керісінше, халық билікке бұқаралық ақпарат құралдары арқылы ықпал етеді. Өз кезегінде мемлекет БАҚ арқылы өз нұсқауларын халыққа жеткізіп отырады. Сондықтан бүгінгі қазақ журналистикасының қоғамдық-саяси ортадағы орны, қоғамдық-әлеуметтік белсенділігі өзі өмір сүріп отырған қоғамның дамуына айтарлықтай әсер етіп отырғанын ешкім жоққа шығармайды.

Н.КӨБЕГЕНҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған