ТАҒЫЛЫМЫ ТЕРЕҢ БІЛІМ ОРДАСЫ

«Мектеп – кеме, білім – теңіз» дейді халқымыздың біртуар ақыны Қасым Аманжолов. Олай болса, білім теңізіне шығып, өз жолаушыларын мақсатына жеткізіп келе жатқан алып кеме – ауданымыздағы 70 жылдық тарихы бар №47 М.В.Ломоносов атындағы мектеп-лицейі бүгінгі күнде білім саласындағы «100 үздік мектеп» рейтінгісіне енген көшбасшы мектептердің бірі. Қазіргі таңда сыйымдылығы 1200 орындық мектепте 47 сынып комплектісі мен мектепалды топта 1091 оқушы білім алуда.

Мектеп-лицейде 142 ұстаз қызмет етсе, олардың ішінде 1 педагог-шебер, 18 педагог-зерттеуші, 40 педагог-сарапшы, 40 педагог-модератор бар. Табысты мектептегі ең мықты құрал ол – мектеп ұстаздары десек, түрлі байқаулар мен сайыстарда мектеп ұстаздары үлкен жетістіктерге жету үстінде. Атап айтсақ, аудандық «Үздік әдіс-тәсілдер – 2023» байқауына бастауыш сынып мұғалімі Құралай Оразбек қатысып, І орын иемденді. «Көп тілді меңгерген ұстаз – 2023» байқауына ағылшын тілі мұғалімі Сания Шалбаева қатысып, жүлделі І орын иегері атанды. «Үздік бастауыш сыныптағы математика пән мұғалімі -2023» байқауына бастауыш сынып мұғалімі Зәуре Жақыпқызы қатысып, жүлделі ІІІ орын иегері атанды. «Үздік тарих пәнінің мұғалімі – 2023» байқауына тарих пәні мұғалімі Айсара Алдабергенова қатысып, жүлделі ІІ орын иегері атанды. «Үздік бастауыш сынып қазақ тілі пәнінің мұғалімі-2022» байқауына бастауыш сынып мұғалімі Айгерім Абишева қатысып, жүлделі I орын иегері атанды. «Үздік бастауыш сыныптағы жаратылыстану пәнінің мұғалімі – 2022» байқауына бастауыш сынып мұғалімі Динара Құрманбекова қатысып, жүлделі І орын иегері атанды. «Үздік қоғамдық-гуманитарлық бағыттағы пәндердің бірлестік жетекшісі – 2022» байқауына мектеп-лицейдің «SMART» ағылшын тілі қоғамдастығының жетекшісі Ақерке Нұрымбетова қатысып, жүлделі ІІ орын иегері атанды. Облыстық «Үздік тәрбие бірлестігінің жетекшісі – 2022» байқауына бастауыш сынып мұғалімі, тәрбие бірлестігінің жетекшісі Ләйлә Сәрсенбаева қатысып, жүлделі ІІ орын иегері атанды.

Ұлттық құндылықтар мен ел ішіндегі өнер иелерін түрлі шаралар арқылы насихаттау мақсатында өткен «Сыр елі: бір туынды тарихы» атты байқауда өнер иелерінің өнегелі өмірі және шығармалары бойынша нәтижелі жұмыс жасағаны үшін мектеп-лицей тәлімгері Гүлназ Шерімбетова бас жүлдемен марапатталды. Аудандық «Үздік аудармашы – 2023» байқауына ағылшын тілі пәні мұғалімі Шынар Зейнуллаева қатысып, жүлделі ІІ орынды иеленді. Қызылорда қаласында Асқар Жұмаділдаевтың жүлдесіне арналған халықаралық жас математиктер байқауына Рабиға Салықова қатысып, ІІІ орынмен марапатталды. «Үздік педагог-психолог-2022» байқауында Қалдан Сейдахметова қатысып, облыстық кезеңнен ІІІ орын, республикалық кезеңнен ІІ орын иеленді. «Облыстық тәжірибе алаңына 20 жыл» аясында өткізілген «Үздік коучинг – 2023» байқауына бастауыш сынып мұғалімі Гүлжаухар Нәлібаева қатысып, жүлделі ІІІ дәрежелі дипломмен марапатталды. Қазақ тілі мен әдебиеті пән мұғалімі Райхан Қилыбаева жыл қорытындысы бойынша арнайы «Жыл үздігі – 2022» номинациясымен марапатталды. Қызылорда облыстық оқу орталығының ұйымдастыруымен директордың оқу ісі жөніндегі орынбасарларына арналған «Халықаралық зерттеулер бойынша үздік мектеп үйлестіруші – 2022» байқауына Меруерт Исаева қатысып, ІІ орын иемденді. Педагогикалық шеберлік орталығының Қызылорда қаласындағы филиалының ұйымдастыруымен «Жас ұстаз – 2022» облыстық командалық байқауына «NEW STARS» жас маман командасы қатысып, «Креативті таныстырылым» номинация­сымен марапатталды. Сонымен қатар жыл қорытындысы бойынша «Озық идеялар мен технологиялар ордасы» номинациясы және музыкалық орталық сыйлығымен марапатталды.

Қатысқан сайыстардан жеңіс туын желбіретіп жүрген ұлағаты мол дара ұстаздар мен білімді де білікті жас мамандардың алғыр, зерек білім алушылардың жетістігі де аз емес. Атап айтатын болсақ, 5-сынып білім алушысы Шахназ Журахан жалпы білім беретін пәндер бойынша өткізілген республикалық олимпиаданың облыстық кезеңінде жаратылыстану пәні бойынша І орын алса, республикалық кезеңнен ІІ орын жеңімпазы атанды. Физика пәні бойынша 8-сынып білім алушысы Ғазиза Есболатова ІІ орын, қазақ тілі мен әдебиеті пәні бойынша 6-сынып білім алушысы Мадина Бауыржанқызы мен 10-сынып білім алушысы Ерке Әшімхан, Қазақстан тарихы пәні бойынша 11-сынып білім алушысы Ибраһим Иманғали алғыс хатпен марапатталды. Облыстық юниорлық олимпадасында 8-сынып білім алушылары химия пәні бойынша Гүлназым Болатова ІІ орын, география пәні бойынша Әйгерім Ербай ІІ орын, математика пәні бойынша Элиза Жаңабатырова ІІІ орын және биология пәні бойынша Думан Әбдіәкім ІІІ орындарды қанжығасына байлады. Республикалық «ProEco» экологиялық жобалар байқауына облыстың атынан қатысқан 7-сынып білім алушысы Бибайша Жұмахмет ІІ орын, 6- сынып білім алушысы Жанель Төрехан ІІІ орынды иемденді. Қызылорда облыстық «Жайдарман» ойынының финалдық сайысында «47 Қырандары» өнегелі ойын көрсетіп, жүлделі ІІ орын және Түркістан қаласына жолдама алды. «Бояулар құпиясы» атты республикалық сурет байқауында үздік нәтиже көрсетіп, шығармашылық дарынымен ерекше көзге түскен 5-сынып білім алушысы Алтынай Бейсенбек І дәрежелі дипломмен марапатталды.

«Зерделі» ақыл-ой дамыту мектебінің ұйымдастыруымен өткізілген «Алтын сақа» математикалық олимпиадасына мектеп-лицейдің бастауыш сынып білім алушылары қатысып, облыстық кезеңнен 5 білім алушы ІІ-ІІІ жүлделі орындарға ие болды. Жалпы білім беретін пәндер бойынша республикалық ғылыми жоба байқауының облыстық кезеңіне 9-сынып білім алушылары Мұхаммедәлі Баймахан ІІ орын, Қарақат Сейтомар ІІ орын, 10-сынып білім алушылары Айбек Уәлиханов пен Жазира Сыздық грамотамен марапатталды. «Мамандықтар әлемін ашамыз» республикалық форумына 7-сынып білім алушысы Сымбат Бимағанбет қатысып, ІІІ орын иемденді. Республикалық «Зерде» ғылыми жоба сайысының облыс­тық кезеңіне мектеп-лицейдің 2-7 білім алушылары қатысып, І, ІІ, ІІІ  жүлделі орындарға ие болды. Қызылорда облысының білім басқармасының «Дарын» облыстық қосымша білім беру орталығының ұйымдастыруымен 8-11 сынып білім алушыларының арасында «Ақберен» IX республикалық өнер байқауының облыстық кезеңіне 11-сынып білім алушысы Жәния Әлібаева «Эссе жазу» номинациясы бойынша жүлделі ІІІ орынға ие болды. Алматы қаласында өткен «Жас лидер» академиясының республикалық форумына 6-10 сынып білім алушылары қатысып, жеке және топтық жұмыстарда белсенділік танытып, грамотамен марапатталды.

Әрине, ұстаздың да, шәкірттің де тынымсыз еңбегі мен табысты жемісін жалғастырып кете беруге болады. Ұстаздар қауымы – білім беруде ғана емес, қоғамның дамуында, спорт пен мәдениетте, түрлі рухани шараларда өзіндік үлесі бар, ұлт пен ұрпақты тәрбиелеудегі қасиетті мамандық иелері. Олай болса, №47 М.В.Ломоносов атындағы мектеп-лицейінің алдағы уақытта да атқарар қызметі мен еліміздің болашағы үшін берер жемісі толастамақ емес. «Білім биігінде бірге жарқырайық, жанайық! Міне, бұл – біздің мектеп-лицей! Біздің ұжым!» деп, алға нақты жоспар құрған білім ордасына сәттіліктер тілейміз.

Қ.Әндешұлы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған