ҚР Білім беруді және ғылымды дамытудың 2020-2025 жылдарға арналған мемлекеттік бағдарламасының мақсаты – қазақстандық білім мен ғылымның жаһандық бәсекеге қабілеттілігін арттыру және жалпыадамзаттық құндылықтар негізінде тұлғаны тәрбиелеу және оқыту. Ол үшін алға міндеттер қойылды. Соның бірі – білім беру ұйымдарын цифрлық инфрақұрылыммен және қазіргі заманғы материалдық-техникалық базамен жарақтандыру.
Арал ауданы орталығындағы Жарасқан Әбдірашов атындағы №62 мектеп-лицейінің материалдық-техникалық базасы заман талабына сай толық жаңартылды. Ізгілікті іс мемлекет басшысының бастамасымен құрылған «Қазақстан халқына» қоғамдық қорының қаржыландыруымен жүзеге асырылып отыр. «Ауылдық жерлердегі тірек мектептерінің әлеуетін арттыру» қайырымдылық жобасы білім ұясына жаңаша рең берді. Енді тірек мектептің орта мектептен айырмашылығы қандай? Оқушылар үшін оқу ордасында қандай мүмкіндіктер қарастырылды? Өңірдегі өзге аудандарда бұл жоба жүзеге асады ма? Осы сауалдарға жауап іздеп көрдік.
Жарасқан Әбдірашов атындағы №62 мектеп-лицейі осыдан 37 жыл бұрын пайдалануға берілген. Содан бері жөндеу жұмыстары жүргізілгенімен материалдық-техникалық базасы жаңартылмапты. Осыны ескерген «Қазақстан халқына» қоғамдық қорының үйлестірушілері дереу іске кіріскен. Қазір мұндағы пәндік кабинеттер толықтай соңғы үлгідегі құрал-жабдықтармен қамтылды.
Тірек мектептің тиімді тұстары көп. Оқу ордасында оқушылар үшін барлық жағдай жасалған. Соның бірі, робототехника сыныбы. Мұнда оқушылар техниканың тілін меңгеруге машықтанады. Солардың бірі 6 сынып оқушысы Ернар Алтынбеков. Ол құлтемір құрастыруға қызығушылығы оянған жастың бірі. Ол осыған дейін аудан орталығындағы оқушылар үйіне барып, шеберлігін шыңдап келген. Енді сыртқа сабылмай қиялындағы роботты өз мектебінде құрастыратынына дән риза.
— Мен ғаламтордан көптеген адамдардың робот құрастырғанын көрдім және менің де робот құрастырып, үйренгім келді. Содан оқушылар үйіне барып, шеберлігімді шыңдадым. Ол жақта екі айдай робот құрастыруды үйретті. Соның нәтижесінде, аудандық жарысқа барып, суммо роботын құрастырып, өзімнің жасаған жұмысым екінші орын алды. Енді, мұндай мүмкіндік өз мектебімізде туғанына қуаныштымын,– дейді 6 сынып оқушысы Ернар Алтынбеков.
Тәуелсіздіктің бастауы болған желтоқсан оқиғасының тұсында қабырғасы қаланған білім ордасының бұған дейін қыздар шеберханасында керектіге құрал-жабдықтар болмаған. Енді тірек жобасы жүзеге асқаннан кейін мұндағы сынып 100 пайыз құрал-жабдықтармен толық қамтылған. Шеберханада қыздарға кесте тоқып, құрақ құруды үйрету мақсатында 11 тігін машинасы әкелінген. Мұнан бөлек, тағам әзірлеуді үйрету үшін ас үй жабдықтарымен қамтылған.
Ертең ел қорғаны болатын азаматтар бүгіннен бастап әр іске машықтанғаны жөн. Сондықтан ерлер шеберханасында да балаларды еңбекке баулу бастамасы жолға қойылған.
Мектепте 1994 жылдан бері жұмыс істеп келемін. Ер балаларды еңбекке баулу үшін керекті құрал-жабдықтар қолға түсе бермейтін. Станогтардың бағасы қымбат еді. Тірек мектеп жобасы бойынша ұлдар шеберханасы да заман талабына сай жаңарып, жаңғырған. Мұнда ер балаларды еңбекке баулу үшін бұрғылау, жону, кесу, қайрау, дәнекерлеу сынды станоктары бар. Балалар дән риза. Құлшыныстары артып, шығармашылықпен айналысуға ден қойып отыр, – дейді көркемдік пән мұғалімі Ғалым Тлепов.
Жалпы, мектеп-лицейде шеберханалардан бөлек, СТЕМ – зертханасы ашылып, 30- тан аса сыныбы тірек мектеп жобасы бойынша жаңарған. Бұл жұмыстарға «Қазақстан халқына» қоры 250 миллион теңге қаржы бағыттаған. Мұғалімдері де біліктілігін арттыру мақсатында зияткерлік мектептердің мамандарымен тәжірибе алмасуда.
– Тірек мектеп болмас бұрын оқушылар құрал-жабдықтарды өздері алып келетін. Ал, қазір әр сынып құрал-жабдықтармен толық қамтамасыз етілген. Сондықтан орта мектептен айырмашылық өте үлкен. Біздер, ұстаздар, тәжірибе алмасу, біліктілігімізді жетілдіру мақсатында Түркістан облысындағы зияткерлік мектебіне арнайы барып, семинарларға қатысып келдік,– дейді бейнелеу өнері пәнінің мұғалімі Гүлсезім Жақсылықова.
Тірек мектептің тағы бір ерекшелігі, басқа да мектеп оқушылары осы оқу ордасында шығармашылығын арттыруға мүмкіндік алады. Ал, аудан орталығындағы өзге білім ошақтарының мұғалімдеріне тірек мектеп жобасы бойынша Жарасқан Әбдірашов атындағы №62 мектеп-лицейінің ұстаздары тәжірибесімен бөліседі.
— Бұл жоба аясында ұстаздарымыз педагогикалық шеберлік орталығында, зияткерлік мектептерінде өз біліктіліктерін арттыруға, семинарларға қатысуға, тәжірибе алмасуға өте үлкен мүмкіндіктер туды. Қараша айында біздің 107 педагог зияткерлік мектептеріне барып, біліктілік алмасып, семинар-сабақтарға қатысып қайтты. Алдағы үш жылда біліктілігін арттырып отыруға мүмкіндік қарастырылған. Қазіргі таңда сол ұстаздарымыз алған тәжірибе алмасуларын өз мектебімізде балаларға білім беру мақсатында жалғастырып жатыр. Сондай-ақ, аудандағы магниттік мектептің мұғалімдеріне тәжірибелерімен бөлісуде. Ал, өзге мектептің оқушылары біздің білім ошаққа келіп, шығармашылығын арттыруға мүмкіндік алып отыр,– дейді мектеп-лицей директоры Жасұлан Айтжанов.
Айта кетейік, биылғы жылы облыста тағы екі оқу ошағының тірек мектеп жобасы бойынша материалдық-техникалық базасы жаңаратын болады. Бұл жөнінде жоба менеджері Аслан Айтахметов айтып берді.
— Біріншісі Қармақшы ауданында, Жосалы ауылындағы №250 мектеп «Тірек мектеп» жобасы бойынша жаңғырады. Ал, екіншісі Жаңақорған кентіндегі мектеп. Бұл екі мектептің биылғы жылы техникалық базасы жаңаратын болады. Айта кетейін, мектептерді таңдау принципі ол мектеп аудан орталығында болуы керек. Өйткені болашақта бұл мектептер өзінің алған тәжірибесін жанындағы магниттік мектептерге трансляция жасай алу мүмкіндігі болуы маңызды, – дейді жоба менеджері Аслан Айтахметов.
Білімге жұмсалған қаржы – ең қайтарымды инвестиция. Сондықтан аталмыш қор осы бағытқа басымдық беріп отыр. Биыл 2 мектеп заман талабына сай жаңғыртылса, келер жылы 4 ауданның білім ошақтары түрлене түспек.
Е.ЕРБОЛҰЛЫ
