«Жайлы мектеп » ұлттық жобасы қалай жүзеге асады?

Мемлекет басшысының бас­тамасымен елімізде 2025 жылға дейін 800 мың баланың заманауи мектепте білім алуына жағдай жасау үшін «Жайлы мектеп» ұлттық жобасы қолға алынған болатын. Тапсырмаға сәйкес, алдағы 3 жылда Қызылорда облысында 15100 орынға арналған 21 заманауи мектеп салынады деп жоспарлануда. Жобаның жалпы құны – 100 млрд. теңге. Атап айтқанда, Қызылордада 8, Аралда 4, Қазалыда 2, Қармақшыда 2, Жалағашта 1, Сырдарияда 1, Шиеліде 1 және Жаңақорған ауданында 1 мектеп бой көтереді. Жаңа білім ордаларында бастауыш және жоғары сынып оқушылары мектеп ғимаратының жекелеген блоктарында оқиды. Сәйкесінше, олардың әрқайсының өз оқу кабинеттері, әжетханалары, спортзалдары болады. Сондай-ақ, бейнебақылау, дыбыстық дабыл сияқты қауіпсіздік құрылғылары орнатылады, физика, химия, биология, робототехника сияқты заманауи кабинеттермен қамтамасыз етіледі. Арнайы білім беруді қажет ететін балалар үшін барлық жағдай жасалады.

Осыған орай облыс әкімінің орынбасары Серік Қожаниязовтың төрағалығымен өткен мәжілісте «Жайлы мектеп» ұлттық пилоттық жобасын іске асыру барысы қаралды. Жиынға Сыр өңіріне арнайы жұмыс сапарымен келген «Samruk-Kazyna Construction» акционерлік қоғамының басқарма төрағасы Мәулен Айманбетов, GR жөніндегі тобының басшысы Бауыржан Сәрсембеков және жобалау бөлімінің басшысы Әлібек Қарауылбеков қатысты.

«Samruk-Kazyna Construction» акционерлік қоғамы Мемлекет басшысының тапсырмасы бойынша жүзеге асырылатын жобаның орта білім беру ұйымдары объектілерінің нысаналы құрылысы жөніндегі дирекциясы ретінде айқындалған.

Серік Қожаниязов «Жайлы мектеп» ұлттық жобасының маңызы мен өңірде атқарылатын жұмыс­тар жүйесі жайлы толық айтып берсе, облыстық құрылыс, сәулет және қала құрылысы басқармасының басшысы Ерлан Төралиев ұлттық жобаның өңірдегі іске асырылу барысын баяндады. Жоба аясында 2025 жылға дейін Қызылорда облысында жаңа құрылыс стандарттарымен 21 мектеп салу жоспарланған. Биыл 10 мектептің құрылысы басталады. Қазіргі таңда олардың жер телімдері рәсімделіп, сметалық құжаттары дайындалған.

«Samruk-Kazyna Construction» АҚ басқарма төрағасы Мәулен Айманбетов ұлттық жобаны нәтижелі іске асыру бойынша ұсыныс-пікірлерімен бөлісті. Жиын соңында облыс әкімінің орынбасары С.Қожаниязов мәжілістегі ұсыныс-пікірлер, берілген тапсыр­малар хаттамаға енгізіліп, жауапты мекемелерге жолданатынын айтты.

З.Қонысжан

Пікір үстеу

Э-пошта мекенжайыңыз жарияланбайды. Міндетті өрістер * таңбаланған