Апта басында Қазақстан Республикасы Президенті Әкімшілігі және Арал аудандық мәслихатының келісімдері негізінде облыс әкімінің өкімімен Арал ауданының әкімі лауазымына Аманжол Сақыпұлы Оңғарбаев тағайындалды. Аралда өткен актив жиналысында облыс әкімі Нұрлыбек Нәлібаев: «Аманжол Сақыпұлы — өңірдің әлеуметтік-экономикалық ахуалымен жақсы таныс, аймақтың рухани-мәдени дамуы жолында аянбай еңбек еткен азаматтардың бірі. Аудан әкімі ретінде Мемлекет басшысының тапсырмалары мен алға қойған міндеттерді жоғарғы деңгейде жүзеге асырып, өздеріңізбен бірге туған жерін өркендету жолында аянбай жұмыс жасайды деп сенемін. Арал топырағынан түлеген азамат ретінде Аманжол Сақыпұлына халықтың сенімі мен жауапкершілік жүгі еселеп артатын болады. Бұған дейін де басшылық лауазымдарда мол тәжірибе жинаған маман ретінде аудандағы ресурстарды барынша пайдалану керек», — деп, жаңа басшыға бағасын бере келе сенім артты.
Расында, Аманжол Сақыпұлы қоғамда өз орны, айтары, салмағы бар азамат. Студент кезінен қоғамдық-саяси істерге араласып, шешілуіне мұрындық болғанын білеміз. Сол кезден бастап есімі көптің ішінен ерекше аталып, өмір тәжірибесімен ысылып, беделі артып келеді. Өмір жолына қарасаңыз, қарапайым жұмысшы болудан бастаған ол маңдай тер еңбегімен осы күнге үлкен беделге ие боп, қайраткерлікке қол жеткізіп отыр. Еңбек жолына зер салсақ, облыстық тіл басқармасының бірінші категориялы маманы, Ұлт саясаты жөніндегі облыстық комитеттің жетекші маманы, облыстық «Ақмешіт апталығы» газеті бас редакторының орынбасары лауазымдарында еңбек еткенін көресіз. 2000-2010 жылдары «АСУ» баспа үйі» жауапкершілігі шектеулі серіктестігінің бас директоры, «Халық» газетінің бас редакторы, директоры лауазымдарында абыройлы қызмет жасап, ақпарат құралы арқылы қарапайым халықтың сөзін билікке жеткізуде үлкен роль атқарды. 2010 жылдан бері құрамына 3 облыстық, 1 қалалық және 7 аудандық редакция, ақпараттық агенттіктерді біріктірген «Сыр медиа» жауапкершілігі шектеулі серіктестігінің бас директоры қызметін атқарып келді.
Аралдың тумасы А.Сақыпұлы Қорқыт ата атындағы Қызылорда педагогикалық институтын «Қазақ тілі мен әдебиеті», «Болашақ» университетін «Қаржы және несие», Қазақ гуманитарлық Заң университетін «Заңтану» мамандықтары бойынша бітірген. Филология ғылымдарының кандидаты. Қызылорда облыстық мәслихатының V, VII, VIII шақырылымдарының депутаты ретінде өңірдің және осы ауданның өзекті мәселелерін көтеріп, шешілуіне атсалысқан. Міне, осы жетістіктері, ролі таразыға салынып, аудан әкіміне лайықты тұлға ретінде таңдалып отыр.
Бұған дейін ауданның жетістіктерімен мақтанып, мәселесін мінберде көтеріп келе жатқан Аманжол Сақыпұлы ауданға әкім болып келгеннен кейін алғышқы мәжілісін өткізді. Оған аудан әкімінің орынбасарлары, дербес бөлім мен мекеме басшылары, қала, кент және ауылдық округ әкімдері қатысты.
Аудан әкімі мәжілісте алғашқы сөзін қоғамдық саяси-ахуалды тұрақтандыру бойынша шараларды жүйелендіру қажет екендігіне тоқталды. Бүгінгі күннің түйткілді мәселесін тамыршыдай дөп баса білген А.Сақыпұлы: «Аудандағы қоғамдық-саяси ахуалды тұрақтандыру — біздің басты мақсатымыз. Ақпараттық технологиялар дамыған заманда кез келген жарияланымдар мен түрлі сипаттағы оқиғалар резонанстық сипатта бұрмаланып, халық арасында дүрбелең тудыруы ықтимал. Сондықтан аудандағы қоғамдық-саяси ахуалды тұрақтандыру бағытындағы жұмыстарды күшейуді тапсырамын»,-деді.
Ауданда атқарылмай тұрған жұмыстар да бар. Келу бойына сол жұмыстар жайында қозғаған аудан басшысы өңірде жүзеге асырылып жатқан құрылыстар жұмыстарын аудан әкімдігі ұдайы бақылауда ұстау қажеттігін айтты. Мұнымен қатар, жұмысы аяқталмаған 3 денсаулық сақтау нысанының бу қазандықтарын қайта жаңғырту жобаларын жақын арада аяқтау қажеттігін жауапты бөлімдерге жүктеді.
Сонымен бірге ауданның барлық макроэкономикалық көрсеткіштер бойынша ай сайынғы өсімді қалыптастыру бағытында біршама міндеттерге тоқталды. Салық базасын ұлғайту мақсатында әрбір елді мекендердегі тұрғын үйлердің, кәсіпкерлік, мүлік, жер салықтарына зерделеу, түгендеу жұмыстарын іске асыруды және елді мекендегі тіркелмей кәсіп жасап отырған жеке тұлғаларды анықтап, салықтандыру жұмыстарын жүргізуді тапсырды. Кәсіпкерлік саласын терең меңгерген басшы бұл тұрғыда да ауданның жайына қанық. Сондықтан кәсіпкерлік субъектілерін қолданыстағы заңнамалар аясында өндірістік жобаларға бағыттауға басымдық беру шараларын атқару мен шағын және орта кәсіпкерліктің дамуына мейлінше мүмкіндіктер жолын кеңейту қажеттігін ескертті.
Әкімдік мәжілісінде әр кезде жасалынған жұмыстарға сыни көзбен қарап, баға беретін А.Сақыпұлы санитарлық тазалық мәселесін де қозғап, тазалық шараларын жанашырлықпен жүргізіп, кеткен кемшіліктерді дер кезінде жоюды тапсырды.
Жан-жағын бақылап, әлеуметтік желілерден қарап отырған көпшілік Арал ауданы әкімінің алғашқы қадамына ризашылығын білдіріп, сәттілік тіледі. Біз де туған өлкесіне әкім болып, жауапты қызметке белсене кіріскен Аманжол Сақыпұлына абырой, жұмысына табыс тілейміз.
Н.Көбегенұлы
