«Тазалық – саулық негізі, саулық – байлық негізі» деген секілді, әлемде тіршілік етіп жатқан барлық адамдар өзі жүрген, өзі өмір сүретін ортасының тазалығына мән беруі керек. Бала кезден үйдегі ата-анасы балаға ескерту жасап, киімдерін таза ұстауға үйрету арқылы болашақ тазалыққа жаны құмар тұлғаны өсіріп шығарады. Көйлегінің жағасын кірлетпеген баланың адамның көңілін де кірлетпейді деуге негіз бар. Тән тазалығы бар жерде жанның да таза болары анық. Қазіргі қоғамда көше тәртібіне бағынбай, жүрген жерін шашып, өзінен кейін келетін адамдарға ыңғайсыз жағдай туғызатын жандар баршылық. Тіпті балаларға деп соғылған ойын алаңдарында, шекілдеуік қабықтарын бейберекет тастап, сусындардың ыдысын лақтырып кететін жастар да азаймай тұр. Тәрбие тал бесіктен, ата- ана отбасының тәртібін нықтап, көше мәдениетін, қоғамдық орындарда балаларына жүріп-тұруды үйреткендері дұрыс.
Қоқыс тастау жәшігіне жетпей, қоқысты көшеге лақтыра салатын адамдарға қолданатын шаралар күшеюі тиіс. Көшеде жатқан қоқыстың не екендігін білмекке ұмтылған кішкентай баланың денсаулығына зиян тигізіп алуымыз мүмкін. Топтасып демалып жүретін жолдастардың демалу орындарында тазалықпен жолдас болмайтынын әлеуметтік желідегі фотолардан, таралған ақпараттардан көруге болады. Ескертулер жасалып жүрген күннің өзінде ессіздікке салынып, жасаған ісін қайталайтын жандарға қомақты айыппұл салған дұрыс болар еді.
Туған өлкенің әр тасын, әр гүлін аялап ұстау – тұрғындардың міндеті. Өздері тұратын тұрғын үйлердің ауласының тазалығына мән беріп, ойынға шығатын балаларына көпшілік пайдаланатын орындықтарды ластамай, қадірлеп ұстау керектігін ұқтырған жөн. Қабаттарға көтерілетін басқыштардың да таза болуы тұрғындардың тазалығына байланысты мәселе. Қызылорда халқын тазалыққа шақырып, қаланың, аудандардың тұрғындарына тазалықты үндейтін ұсыныс жобалар айтылып жүр. Осы орайда облыс әкімі Нұрлыбек Нәлібаевтың төрағалығымен өткен мәжілісте облыс аумағыынң санитарлық тазалық жағдайы талқыланды.
Облыс аумағындағы түйткілді саналатын тазалық мәселелерін облыс әкімі айтып өтіп, күн тәртібінен тазалық жұмыстары түспейтінін хабардар етті.
— Облыс әкімі аппаратының инспекторлары апта сайын облыс аумағында мониторинг жұмыстарын жүргізуде. Қорытындысы бойынша маған ақпарат ұсынылып, қала және аудан әкімдеріне тиісті тапсырма беріліп келеді. Алайда, айтарлықтай нәтиже жоқ. Тексеріс жұмыстары жүргізілген елді мекендердің барлығының дерлік тазалығы көңілден шықпайды. Елді мекендердің іші мен айналасы қоқысқа толы, демалыс саябақтары қираған, ойын алаңдары тозған, — деді Нұрлыбек Машбекұлы.
Өңірдегі елді мекендер мен мекеме, ұйымдардың сыртқы келбеті мен санитарлық жай күйі туралы облыс әкімі аппаратының басшысы Шахмардан Байманов баяндап өтті. Тексерістен өткен елде мекендердің барлығының тазалығынан, кейбір мекемелердің сыртқы қасбеттерінен кемшіліктер анықталып отыр.
Сапасы сын көтермейтін үйлердің баршылық екендігін облысымыздан бөлек, республика аумағында үлкен мәселе екендігін көріп отырмыз. Мердігер компаниялардың асығыстығымен, тиісті қаражаттардың керек жерлеріне жетпеуі салдарынан жаңадан соғылған тұрғын үйлердің жылға жетпей сыр беріп, сыртқы көркіне сызат түсіп жатқанын байқауға болады. Қаланың көркіне сын келтіретін сапасыз үйлердің сиқын дұрыстау үшін мердігер компаниялардың өздерін жұмылдыру лайықты іс.
Аймақ басшысы қала, аудан әкімдеріне көрсетіліп, айтылған кемшіліктермен жұмыс жасау керектігін ескертті, шұғыл түрде қалпына келтіру жұмыстарын тапсырды. Аталған жерлердің ішінде баса назар аудару керек жерлерді айтты. Мысалы, жазғы лагерьлердің санитарлық жағдайын тез арада жақсарту, адамдар көп жүретін темір жол және автовокзалдың тазалығына ерекше назар салу керектігін айтты. Салынып бітіп, халыққа берілген ғимараттардың уақытына жетпей тозығы жеткен нысандардың қайта жөндеу жұмыстарымен мердігер мекемелер айналысуы тиіс. Сонымен қатар, облыс әкімі барлық басқарма, департамент, аумақтық инспекция басшыларына қарамағындағы мекемелердің жағдайына күнделікті бақылау жүргізу керектгін ескертті.
Сыр шаһарының сұлулығын жазудан Сыр өңірінде туған барша перзент шаршамайды. Бірақ, шешімін таппайтын мәселелерді, аймақ көркін былғайтын дүниелерді жариялап солармен күресу туған жерге деген құрметтің белгісі. Көзге көрініп тұрған кемшілікті түзеу арқылы болашақта олқылықтардың қайталанбауына да атсалысу керек. Басшылыққа ғана бәрін ысырып қойып, тек нәтиже күтіп отыруға болмайтынын тұрғындар түсінуі шарт. Аймақтың негізгі басымдығы тұрғындарда болған соң тазалықтың да жауапкершілігі солардың мойнындағы жұмыстар. Себебі, әрбір тұрғын өзіне тиесілі аумақты өз қалпында ұстап отырса, барша облыс аймағы көркейе түспек. Облысымызды гүлдендіріп, жасыл желекке бояу үшін барлығымыздың атқарар ісіміз көп. Алдағы уақытта облыс басшылығының қолдауымен көптеген жұмыстар атқарылмақ. Тұрғындар мен жергілікті баксшылықтың бірлесе отырып, шараларды жүзеге асыруы облысымыздың дамуына оң әсерін береді деп сенеміз.
Қ.ӨТЕБАЙ
