Келіссөздер инвестиция тарту мен білім сапасын арттыруға бағытталды

Облыс әкімі бастаған делегация Оңтүстік Корея мемлекетінде

Дамыған елдермен тығыз байланыс орнатып, білім мен ғылым саласында тәжірибе алмасуды мемлекетіміз басты нысанаға алған еді. Еліміздің әлемде технология саласында өзіндік орны бар мемлекеттермен қарым-қатынас жасап, әріптес­тік орнатуы – дамудың алғышарты. Қазіргі таңда ұрпағымыздың білімді болып, тәуелсіздігіміздің біртұтас­тығына кепіл бола алатын мықты мамандар даярлау – мемлекетіміздің міндеті, халқымыздың арманы. Осы орайда Сыр елінің дамуына әсер ететін, өңіріміздің түрлі бағытта өркендеуіне септігі тиетін тың жобалар жасалуда. Мемлекетіміздің ішінара дамуынан бөлек, шетелдермен де байланыс нығаю үстінде. Осындай бағыттағы жұмыстар Қызылорда облысы делегациясының Оңтүстік Корея мемлекетіне іссапарында талқыланды.

2021 жылдың 16-17 тамызындағы Корея Республикасына Президентіміз Қасым-Жомарт Тоқаевтың жасаған мемлекеттік сапары екі елдің байланысын арттырып, достық қарым-қатынастарын нығайта түскен болатын. Қызылорда облысы мен Корея Рес­публикасының өңірлері арасындағы байланыс орнауына генерал Хон Бом До сүйегін тарихи отанына қайтару рәсімі ықпал етті.

ҚР Сыртқы істер министрлігі мен ҚР Корея Республикасындағы Елшілігінен облыс делегациясының Кореяға сапарын қолдайтын хаттар келген. Соның ішінде Корея Респуб­ликасы Тэчжон қаласы мэрінің және Чоллабук-до провинциясы губернаторының шақыру хаттары да бар.

22 мамыр күні, дүйсенбіде облыс әкімі Нұрлыбек Нәлібаев бастаған облыс делегациясы Корея Республикасының Сеул қаласына іссапармен барды. Сеул қаласына аттанған делегация құрамында Қызылорда облысының әкімі Н.Нәлібаев, Қазақстан Республикасының Кореядағы Төтенше және Өкілетті Елшісі Б.Дүйсенбаев, облыстық мәслихат төрағасы Н.Байқадамов, Қорқыт ата атындағы Қызылорда университетінің ректоры Б.Кәрімова бар.

Делегация мүшелері іссапардың алғашқы күнінде білім және ғылым салаларындағы ынтымақтастықты орнату мақсатында Шинхан университетінің президенті Канг Сонг Чонг мырзамен кездесті. Қызылорда қаласында Канг Сонг Чонг мырза университет филиалын ашуға ниетті екенін айтты. Осыған байланысты болашақта, алдағы 20-30 жылдықта өңір нарығына қажетті мамандықтарды ескере отырып, екіжақты зерттей келе, жоғары оқу орнын ашу жұмыс­тары жоспарланды.

Шинхан университеті президентінің Қызылорда өңіріне іссапарын ұйымдастыру аталған жобаны пысықтау мақсатында көзделіп отыр. Мамандықтардың өңірге қажеттілігін ескере келе Шинхан университетінің филилалы қандай бағытта білім беретіні нақтыланады.

Облыс әкімі бастаған делегация іссапары Сеул Ұлттық ғылыми-техникалық университетінің Президенті Ли Донг Хун мырзамен кездесумен жалғасын тапты. Қызылорда облысының әкімі Нұрлыбек Машбекұлы, облыстық мәслихат төрағасы Н.Байқадамов, Қорқыт ата атындағы Қызыл­орда университетінің ректоры Б.Кәрімова қатысты. ҚР Ғылым және жоғары білім министрі Саясат Нұрбек вице-министрлермен бірге онлайн қатысты. Әлемдегі озық университеттердің филиалын елімізде ашуды Президент Қасым-Жомарт Кемелұлы Тоқаев білім сапасын арттыру мақсатында тапсырған болатын. Білікті мамандарды оқытып шығаруда, жоғары технологияларды игеруде аталған жобалардың маңызы зор.

Жоғары білім саласындағы Қазақстан мен Корея арасындағы екіжақты ынтымақтастықты дамыту үшін Халықаралық ынтымақтастық жөніндегі жетекші университеттік жоба биыл әзірленген еді. Корея Республикасының Үкіметінде жоба мақұлданып, гранттық жоба ретінде Білім министрлігінен 1 млрд. теңгедей қаржы бөлінеді.

Қорқыт ата университетінде жоба аясында жасанды интеллект мектебінің құрылуы Қызылорда облысының ғана емес, еліміздегі білім саласындағы ауқымды жетістік. IT технологиялар, киберқауіпсіздік және компьютерлік ғылымдар бойынша білім жоба нәтижесінде өңірімізде берілетін болады. Бұл жобаның өңірімізде іске асуына облыс әкімдігі жан-жақты көмек көрсетеді.

Білім және ғылым саласындағы ғылыми жетістіктерге екі білім ордасы арасындағы ынтымақтастық жол ашатынын облыс әкімі айтып өтті. Тэджон қаласының мэрі Ли Чан Ву мен облыс әкімі Нұрлыбек Нәлібаев бастаған делегация 23 мамыр күні кездесті. Қызылорда облысы мен Тэджон қаласын тарихи байланыс біріктіреді. Кореяның ұлттық батыры Хон Бом Доның сүйегі 2021 жылдың тамыз айында Қызылордадан Тэджон қаласының Ұлттық зиратына жерленген еді.

Кездесуде екі өңірдің өзара байланысын нығайту мақсатында қос тарап келіссөздер жүргізіп, ынтымақтастық бағыттарын айқындады. Тэджон қаласының мэрі Ли Чан Ву мен Қызылорда облысы әкімі Нұрлыбек Машбекұлы өңірлер арасындағы байланысты өркендету үшін бауырластық қатынастар орнату туралы Меморандумға қол қойды.

Туризм, білім және ғылым салаларында өзара ынтымақтастық дамыту басты көзделген мәселе. Тэджон қаласы жетекші білім және ғылым орталығы екендігін ескере отырып, Қызылорда облысының үздік мектеп түлектері үшін арнайы гранттар бөлу мәселелері де талқыланды. Бұл дегеніміз екіжақты байланыстарды дамытып, жаңа деңгейге көтереді. Облыс әкімдігі Меморандумда қабылданған бағыттар бойынща жұмыс жасауға ниетті.

Корея Республикасы Тэджон қаласының мэрі Ли Чан Ву мыр­замен кездесуден кейін облыс әкімі Нұрлыбек Нәлібаев Тэджон ұлттық зиратына қайта жерленген генерал Хон Бом До мемориалына барып, тағзым етті.

Хон Бом До – Кореяның азаттығы үшін күрескен бірегей тұлға. Генерал өмірінің соңғы жылдарын Қызылорда қаласында өткізгені белгілі. Туған жерінде батыр­дың ерлік даңқы ұмытылмаған. Ал, Қызылорда қаласында Хон Бом Доның құрметіне мемориал тұрғызылған және қала көшелерінің бірі оның есімімен аталады.

Тэджон қаласында орналасқан ұлттық зиратқа облыс әкімі Н.Нәлібаев бастаған делегация барып, «Отан үшін құрбан болған боздақтарға арналған мемориал» кешенінде де болды. Қызылорда халқының ыстық ықыласын білдіретін гүл шоқтарын генерал Хон Бом До зиратына қойды.

Облыс делегациясының Корея Республикасына іссапарының негізгі мақсаты – өңіріміздің өндіріс саласына шетелдік инвестиция тарту, жаңа өндіріс орындарын ашу, аймаққа озық үлгідегі технологиялар әкелу, тәжірибе алмасу. Осы мақсатта Чоллабук-до провинциясының губернаторы Ким Гван Ен мырзамен облыс әкімі Нұрлыбек Машбекұлы кездесті. Өңірдің инвестициялық мүмкіндіктерімен таныстыру жұмыстары жасалды. Ұсынылған ақпараттарға кореялықтар қызығушылық танытып, қолдау ниетін көрсетті.

Чоллабук-до аумағы – күріш өсіруден, азық-түлік өндіруден Оңтүстік Кореядағы басты ауыл шаруашылығы аймағы. Осы саладағы озық инновациялық технологияларды зерттеуге, «ақылды» фермалар құруға, ауыл шаруа­шылығы өнімдерін терең өңдеу бағытында бірлескен жобаларды іске асыруға облыс әкімі қызығушылық танытты. Сонымен қатар, Қызылорда қаласында Корей күріш егу технологияларын зерттеу әдістері жасалатын демонстрациялық алаң құру ұсынылды.

Қызылорда облысының ауыл шаруашылығы және жер қатынастары басқармасы мен Чоллабук-до провинциясының Халықаралық ынтымақтастық орталығы арасында бастамалардың барлығын жүзеге асыру үшін Меморандумға қол қойылды.

Корея мемлекетінде жүрген делегация бірқатар шаруалардың шетін шығарып, мемлекетімізге пайдасы бар жобаларды көтерді. Сыр өңірінде алдағы уақытта білікті маман даярлайтын білім ордасының филиалы ашылып, ауыл шаруашылығының дамуына жаңаша леп әкелетін жұмыстар атқарылмақ. Осы жұмыстар түбегейлі қолға алынса, қос елдің ынтымақтастығы мен татулығы еліміздің қарқынды дамып, алпауыт елге айналуына ықпалы зор болмақ. Қызылорда облысында болашақта тың жобалар жасалып, аймағымыздың көркейіп, әлеуеті жоғары өлкеге айналатынына сенім білдірейік.

Қазақбай ӘНДЕШҰЛЫ