Облыс әкімін аралдықтар қалай қарсы алды?

Облыс әкімі Нұрлыбек Нәлібаевтың аудандарға кезекті сапары басталды. Сапарды Арал ауданынан бастаған өңір басшысы аудандағы «Жайлы мектеп» ұлттық жобасымен салынатын 300 орындық мектеп құрылысының іргетасын қалау рәсіміне қатысып, аралдықтарды құттықтады.

«Мемлекет басшысының бас­тамасымен қолға алынған «Жайлы мектеп» ұлттық жобасы аясында облыста 12300 орындық 21 мектеп салынады. Соның төртеуі Арал ауданында бой көтереді. Бүгін біреуінің іргетасын өздеріңізбен бірге қалаймыз. Өткен аптада Жаңақорған ауданы мен Қызылорда қаласында, бүгін міне, Арал ауданында білім ошақтарының құрылысын бастадық. Бүгінгі шара – интеллектуал ұлт қалыптас­тыру жолындағы ортақ ісіміздің жалғасы. 300 орындық білім ордасы озық ойлы, өнерге құштар, спортқа бейім дарынды балалардың шамшырағын жағатын мекен болғай. Ұлтымыздың дамуында маңызды рөл атқаратын бұл жобаның басы-қасында жүрген азаматтарға ісіне жауапкершілікпен қарап, құрылысты сапалы жүргізуді халық атынан аманаттаймын», – деді аймақ басшысы.

Биыл облыстағы 4 мектептің 1850 орындық қосымша ғимараты және 5 мектеп пайдалануға берілуде. «Жайлы мектеп» ұлттық жобасы аясында салынатын 21 мектептің 10-ының құрылысы басталуда, қалған 11 білім ошағы алдағы жылға жоспарланған. Сонымен қатар, облыс орталығында физика-математика бағытындағы мектеп-интернат пен Оқушылар үйін салу жоспарда.

Одан кейін әкім Қамыстыбас ауылдық округіндегі 130 орындық балабақшаның ашылуына қатыс­ты. «Аралда балабақша салуда кәсіпкерлер аса белсенді,- деді облыс әкімі жаңа нысанның ашылу рәсімінде. – Өткен жылы кәсіпкерлердің бастамасымен 4 жеке балабақша пайдалануға берілсе, биыл да бұл жұмыс жалғасын табуда. Бүгін – кішкентай бүлдіршіндер мен ата-аналар үшін қуанышты күн. Осы ауылдың тұрғыны, жеке кәсіпкер Азат Балмырзаева жеке қаржысына 130 орындық заманауи жабдықталған балабақша салды. Туған жерді түлетуге үлес қосқан кәсіпкерге алғысымды білдіремін. Алдағы уақытта бұл орталықтан талантты, дарынды, елдің ертеңі болатын жас ұрпақтың тәрбиеленіп шығатынына сенемін».

Нұрлыбек Машбекұлы балабақшаны аралап көрген соң ауыл тұрғындарымен, ақсақалдармен кездесіп, олардың ұсыныс-пікірлерін тыңдады. Аймақта қолға алынған, атқарылған жұмыстар туралы, Арал ауданындағы игі бас­тамалар жайлы айтты.

Өткен жылы Арал ауданының Тоқабай, Жақсықылыш, Бөген елді мекендері мен Арал қаласында жаңа балабақшалар салынды. Ал, бүгін бүлдіршіндерге есігін айқара ашқан тәрбие ұясы – осы елді мекендегі алғашқы балабақша. Мекемеде 41 адам жұмыспен қамтылады.

Тағы бір дерек, облыс бойынша мектепке дейінгі тәрбие берумен айналысатын 680 ұйымға 54 мыңнан астам бала барады. Өңірде 2-6 жас аралығындағы балалардың балабақшамен қамтылуы 89 пайыз­ды құрайды.

Аралдағы мектеп пен балабақша туралы айтқанда, Ақшатау ауылындағы бастауыш сыныпқа арналған мектептің ауыр жайы еске оралады. Бізбен байланысқан ауыл тұрғыны Нұртай Әбенов ауыл әкімімен бір күн бұрын сөйлескенін, бірақ облыс әкімінің келетінін айтпағанын айтты. «Біздің ауылдың жағдайы күрделі. Бірақ облыс әкімін ауылға жолатпайды. Ақшатаудан Аманөткелдегі мектепке балалардың қатынауы үшін берілген жаңа автобус бізге бұйырмады ақыры. Орнына тозығы жеткен, 2011 жылғы автобус берілді. Сол ескі көлікпен ақшатаулық балалар Аманөткелге дейін 70 шақырым жол жүріп барады. Таңертең дүйсенбіде сағат жетіде алып кетеді. Сабаққа кешігіп барады. Бұл оқу процесіне кедергі келтірмей ме сонда? Оны ойлап, бас қатырып жатқан адам көрмедім. Облыс әкімі осындай мәселелерді уақытылы неге шешпейді? Ақшатаудың балалары тоқалдан туылған ба сонда?» деп ашына айтты ақсақал. «Қазір алты айдың жүзі болды, Сырдария өзеніндегі судың түбіне батып кеткен қалқымалы көпірдің жұмысы әлі анықталмай жатыр» дегенді де айтып қалды.

Дегенмен Аралда құрылыс жұмыстары қызу жүруде. Әкім ауданға келген күні Арал қаласында бой көтерген екі пәтерлік 50 тұрғын үйде қоныс той тойланды. «Қуатты өңірлер – ел дамуының драйвері» ұлттық жобасы аясында былтыр 683,2 мың шаршы метр тұрғын үй пайдалануға берілсе, биыл 692,3 мың шаршы метр баспана табысталмақ. Жақында Жаңақорған ауданында 50 отбасыға баспана кілті берілсе, Арал ауданында да 100 отбасы баспана қуанышына кенелді. Бұл – тұрғындардың әл-ауқатын арттыруға бағытталған мемлекеттік қолдаудың нақты көрінісі», – деді аймақ басшысы.

«Қуатты өңірлер – ел дамуының драйвері» ұлттық жобасы аясында сатып алынатын пәтерлер әлеуметтік осал топтағы азаматтарды тұрғын үймен қамтамасыз етуге арналған. Жаңа үйлер қараша айында толық пайдалануға беріледі екен.

К.Масин

Пікір үстеу

Э-пошта мекенжайыңыз жарияланбайды. Міндетті өрістер * таңбаланған