Халықаралық балаларды қорғау күніне орай 1 маусым күні Қызылорда қалалық мәдени және демалыс паркінде бүлдіршіндерге шаттық сыйлаған ғажайыпқа толы мерекелік шара өтті. Тақырыпқа сәйкес безендірілген парк аумағы тұтастай мерекелік көңіл-күйді білдіріп, балалар мен ата-аналар осы жерден табылды. Шараға арнайы қатысқан қала әкімі Серік Қожаниязов кіреберіс қақпадан бастап жолдың екі бетіне жағалай орналасқан жас суретшілер мен қолөнер бұйымдары көрмесін, робототехниктердің жобаларын, балалар кітаптарымен әдіптелген кітап көрмесімен танысты. Жасөспірімдер арасында түрлі спорт түрлерінен өтіп жатқан сайыстарды да тамашалап, қолдау білдірді.
Парк сахнасындағы мерекелік кеш А.Тоқмағамбетов атындағы қалалық мәдениет үйі жанынан құрылған «Сыр сандуғаштары» вокалды тобының мерекелік әнімен басталып, жүзден астам бүлдіршін көңілді әнді бимен көркемдеді. Алғашқы сөз алған қала әкімі Серік Салауатұлы балаларды жаздың алғашқы күнімен тұспа-тұс келген шуақты мерекемен құттықтады.
— Қазіргі таңдағы баршамыздың алдымызда тұрған зор міндет – ұрпаққа сапалы әрі заман талабына сай білім беріп, салауатты өмір салтын ұстануға жағдай жасау. Сондықтан да қаламызда балалардың жан-жақты білім алып, шығармашылықтарын шыңдауға бағытталған жоспарлы жұмыстар жүзеге асырылып келеді.
Шаһарымызда бой көтеріп жатқан Оқушылар сарайы, Шығармашылық академиясы, физика-математика мектеп-интернаты, музыкалық колледж, ішінде бокс, күрес, ауыр атлетика, футбол, йога, жаттығу залдары бар 10 мың орындық жаңа стадион, үстел теннисі орталығы және жабық бассейні бар көпсалалы дене шынықтыру-сауықтыру кешенінің құрылыстары балаларымыз үшін ерекше сый болмақ,- деп, Серік Қожаниязов балаларға жарқын болашақ тіледі.
Мерекелік шара ары қарай жыл көлемінде түрлі бағыт бойынша үздік атанып жүрген өнерлі, спортшы, білімді оқушыларды марапаттау рәсіміне жалғасты. Бүгінде қаламыздың балғын балалары үшін жасалып жатқан игілікті істердің ауқымы кең. Ел Президентінің тікелей қолдауымен «Жайлы мектеп» ұлттық жобасы қарқынды жүргізілуде. Биыл жоба аясында 5, келер жылы тағы 3 мектеп пайдалануға беріледі. Бұл игілікті істердің қаламызда зейінді де зерек балалардың көптеп шығуына әсер ететіні даусыз.
Каникулға шыққалы бері балалардың жазғы демалыстарын тиімді өткізуіне арналған қала мектептері жанынан тынығу лагерьлері жұмыс жасауда. Олардың ішінде этнолагерь, археологиялық лагерь, спорттық лагерьлер бар. Түрлі атауды иеленген лагерьлер балаларды қызықтыра түсуде. Мұнан бөлек, Түркістан облысындағы «Қуаныш», Жаңақорған ауданындағы «Талды су» тынығу лагеріне балалар кезекпе-кезек демалысқа жіберілуде. Қалай болғанда да, 1 маусымнан басталған қалалық мәдени және демалыс парктегі көтеріңкі көңіл-күй балалардың жазғы демалыстарын қызықты да тиімді өткізулеріне сеп болғалы тұр.
Б.Бағдатұлы
