ҚАЛАНЫҢ ӨЗЕКТІ МӘСЕЛЕЛЕРІ АППАРАТТЫҢ МӘЖІЛІС ОТЫРЫСЫНДА ҚАРАЛДЫ

Қызылорда қаласында қолға алған жұмыстар жетерлік. Бірі жүзеге асса, екіншісі күн тәртібінде тұр. Әр аптада қалада атқарылатын мәселелер пысықталып, тиісті сала басшыларының есебі тыңдалады. Қала әкімі Асылбек Шаменовтың төрағалығымен өткен кезекті аппараттық мәжілісінде сала басшыларына нақты тапсырмалар берілді.

Аппараттық мәжілістің күн тәртібіндегі бірінші мәселе бойынша қалалық тұрғын үй-коммуналдық шаруашылығы, жолау­шылар көлігі және автомобиль жолдары бөлімінің басшысы Жеңісбек Файзуллаев қаланың санитарлық тазалығы, көркейту-көгалдандыру және абаттандыру бойынша атқарылып жатқан жұмыстарға тоқталып өтті. Асылбек Өмірбекұлы тиісті сала басшысына қала аумағындағы көшелерге, көппәтерлі тұрғын үйлердің ауласы, әсіресе шет аймақтағы тұрғын аудандарға тұрақты түрде тазалық жұмыстарын жүргізіп, ойын алаңдары мен сквер-аллеялардың тазалығын күнделікті қадағалауды талап етіп, бұл жұмыстардың қатаң бақылауында болатындығын жеткізді. Себеп те жоқ емес. Көктем басталып, тіршілік енгелі қызу жұмыс басталмақ. Тазалық пен көгалдандыру қала үшін маңызды. Облыс орталығының жасыл желекке бөленіп, тап-таза болуы қала тұрғындары мен қонақтарына көңіл-күй сыйлайды.

Күн тәртібіндегі екінші мәселе бойынша қалалық сәулет және қала құрылысы бөлімінің басшысы Ғабит Қожахметов қаладағы «қызыл сызық» талабын сақтамай салынған нысандар туралы баяндады. Қала әкімі қала аумағында «қызыл сызық» нормаларының сақталуын қатаң бақылауға алуды, ал «қызыл сызық» нормаларын бұзған тұлғаларға қолданыстағы заң аясында айыппұл салу жұмыс­тарын жүргізуді міндеттеді.

Кәсіпкерлік саласының мәселелері де мәжіліс отырысында жан-жақты талқыланды. Қала әкімі Асылбек Шаменов қалалық кәсіпкерлік, өнеркәсіп және туризм бөлімінің басшысы Бағлан Аманкелдиевке қаржы ұйымдарымен бірлесіп, кәсіпкерлік саласын дамыту мақсатында қабылданған мемлекеттік бағдарламалардың мүмкіндіктері мен шарттарын түсіндіру, өз кәсібін жаңадан ашқысы келетін бастамашыларды кәсіпкерлік негіздеріне тарту мақсатында түсіндірме жұмыстарын тұрақты түрде жүргізуді және мемлекеттік қолданыстағы барлық кәсіпкерлікті дамыту бағдарламаларының мүмкіндіктерін тиімді пайдалана отырып, қаланың несие портфелін арттыру бағытында нақты шараларды қабылдауды тапсырды. Бұл өте маңызды. Кәсіпкерлік саласы арқылы қаншама адам жұмысқа тартылса, бюджет тайқазанына да қаржы құйылады. Ал, ол үшін кәсіпкерлерге тиісті деңгейде қолдау керек.

Аппараттық мәжілісте ауыс-түйістер болды. «Орталық­тан – өңірге» ротация тәртібімен Қазақстан Республикасы Президенті Әкімшілігінен келген Дінмұхаммед Ермеков Қызылорда қаласы әкімдігінде экономика және қаржы, ауыл шаруашылығы мен жер, кәсіпкерлік салаларына жетекшілік ететін қала әкімінің орынбасары қызметіне тағайындалды. Ал, осы салаға жетекшілік етіп келген қала әкімінің орынбасары Жанмұрат Сейілов енді мәдениет және спорт, қоғамдық даму мен әлеуметтік мәселе, сонымен бірге білім салаларына басшылық ететін болады.

З.Қонысжан

Пікір үстеу

Э-пошта мекенжайыңыз жарияланбайды. Міндетті өрістер * таңбаланған