Бүгінгі қоғамдағы басты тақырыптың бірі – берекелі отбасы, саналы ұрпақ. Осы бағытта жақында Әкелер күні аталып өтіп, шаңырақтағы әкенің бейнесін үлгі етіп көрсеттік. Ынтымағы жарасқан отбасындағы әке мен ананың тәлім-тәрбиесінен қоғамда тұлға бола алатын саналы ұрпақ өседі. Ал, салауатты да саналы ұрпақ – мемлекеттің тірегі. Бұл қаймағы бұзылмаған қазақтың қағидасына айналуы тиіс.
Қазалы аудандық Роза Бағланова атындағы мәдениет орталығында «Қоғам. Тұлға. Отбасы» атты аудандық отбасы форумы өтті. Аудан әкімдігінің қолдауымен, аудандық қоғамдық даму бөлімі, аудандық әйелдер мен аналар кеңесі және Басықара ауылдық клубы бірлесіп ұйымдастырған шараға келген қонақтарды отбасылық ансамбльдер әсем әнмен қарсы алды. Мұнан соң жергілікті кәсіпкерлердің көрмесі ұйымдастырылды.
Форумды аудан әкімі Мұхтар Оразбаев ашып, қай заманда, қай елде болмасын отбасының адамзат ұрпағына ықпалы мен әсерін өмірдегі еш нәрсенің күшімен салыстыруға келмейтінін айтты. Мұнан соң облыстық әйелдер кеңесінің төрайымы Райкүл Байназарова мен Қызылорда облысы қоғамдық даму басқармасы басшысының орынбасары Айбек Дайрабай сөз алып, форумның ерекшелігіне тоқталды.
Тағылымды шараға Қазақстан халқы Ассамблеясы жанындағы облыстық Аналар кеңесінің мүшелері Галина Щербакова, Галия Гизатуллина және Светлана Крюгер, облыс әкімі жанындағы әйелдер істері, отбасылық-демографиялық саясат жөніндегі комиссия хатшысы Қаламқас Каримова мен “Сенімен Болашақ” РҚБ қоғамдық бірлестігінің психологы Сымбат Абдрахманова арнайы келді.
Форумда белсенділік танытқан Қазалы қаласындағы №16 мектеп-лицейдің «Әкелер» кеңесінің төрағасы Ертай Алғашбаев, «Рауан» инклюзивті білім беру орталығының директоры Қуанышкүл Дәулетиярқызы, «Kaussar Koldau» жекеменшік мекемесінің директоры, психолог және медиа-тренер Жания Бисенова қоғамдағы отбасының маңыздылығын тілге тиек ете келе, бала тәрбиесі үшін әке мен ана орнының ерекшелгін айтып берді. Басқосуда қатысқан өзге де қонақтар ұсыныс-пікірлерін ортаға салып, отбасы туралы тебірене сөйледі.
Шара соңында аудан әкімі Мұхтар Оразбаев үздік отбасыларды марапаттады. Атап айтар болсақ, «Үздік дәрігерлер әулеті» бағамы Наршабаевтар отбасына берілсе, «Үздік кәсіпкерлер әулеті» номинациясына Қаниевтер отбасы лайық деп танылды. Рзалиевтер отбасы «Үздік теміржолшылар әулеті» атанса, «Ынтымағы жарасқан әулет» бағамын Өтегеновтер отбасы иеленді. Сонымен қатар, «Үздік спортшылар әулеті» Сидоренколар отбасына және «Үздік өнерпаздар әулеті» бағамы Изеевтер отбасына табысталды. Ал, «Талды-аша» шаруа қожалығының жетекшісі Гүлсім Бодықова «Еңбекқор әйел», Ақмарал Жанұзақова «Қайсар ана» атанды.
Шарада өзге де үздік отбасылар облыстық әйелдер кеңесінің, Қазақстан халқы Ассамблеясы жанындағы Аналар кеңесі мен облыс әкімі жанындағы әйелдер істері, отбасылық-демографиялық саясат жөніндегі комиссияның «Алғыс хатын» иеленді.
Мұнан бөлек, форумға ауданда өнегелі отбасылар қатарынан көрініп жүрген шаңырақ иелері, аналар кеңесінің төрайымдары мен мүшелері, мемлекеттік қызмет саласында жүрген әйелдер, ауданның белсенді аналары қатысты.
Н.Меңдібай
