Ұлт ұстазы Ахмет Байтұрсынұлының: «Газет – халықтың көзі, құлағы һәм тілі» деген сөзі, бұл – теория. Дамыған елдердегі журналистердің функциясына қайшы емес. Өткен ғасырдан бері журналистика әлеуметтік дербес институт ретінде өз аудиториясына қызмет етіп келеді. Ақпараттандырады, сараптама жасайды, талдайды. Ел ішінде және әлемде болып жатқан оқиғаларды шынайы баяндап, халықты құлағдар етеді. Идеологиялық бағыты жақсыдан үйренуге, жаманнан жиреніп, бойды аулақ ұстауға ой салады. Халықтың сенімді бір өкілі ретінде билік пен бизнестің әр қадамын бақылап, көпшілікке ақпарат жеткізіп отырады.
Рас, қазақ журналистикасының өміршеңдігін бүгінгі қоғамдағы ақпарат ағынының салмағынан бағамдауға болады. Бүгінгі журналистика Міржақып Дулатов айтқандай, «қай елдің баспасөзі мықты болса, сол елдің болашағы зор» қағидатына сай келеді.
Қызылорда қаласы бүгінде ақпараттың мегополисіне айналды. Облыс бойынша жарық көретін басылымдардың 95 пайызы және 2 телеарна мен интернет-сайттар Қызылорда қаласында орналасқан. Қызылорда қаласы әкімдігі биылғы бұқаралық ақпарат құралдары қызметкерлері күнін жоғары деңгейде ұйымдастырды. Шаһар төріндегі қайта жаңарып, ажары айшықталған «Қаламгерлер» аллеясында БАҚ өкілдерінің мерейлі мерекесіне арналған салтанатты шара өтті.
Сыр бойы әдебиетінің үш алыбы ескерткішінің жанына жиылған қаламгерлер ең әуелі қалам құдіреті мен қасиетін бейнелейтін қалалық Жастар театры әртістерінің тақырыптық қойылымын тамашалады. Сонымен бірге мерекеге орай ұйымдастырылған шарада шырқалған әндер де тақырыпқа сай болып, шығармашылық өкілдеріне шабыт сыйлады.
«Бұл аллея – қалам ұстаған шығармашылық қауымына көрсетілетін шексіз құрметтің бір парасы ғана. Өйткені қалам ұшындағы құдіретті жүрегімен түйсінген сіздердің әрбіріңіз қандай сый-мәртебеге болса да лайықтысыздар»,- деген шаһар басшысы Асылбек Шаменов журналистердің қоғамдағы орны мен халық жүрегіндегі беделі туралы тілге тиек етіп, айшықты мерекемен құттықтады.
— Бүгінде ақпарат құралдарының ықпалымен әлемнің келбеті өзгерді. Бұл ретте, ел Президенті Қасым-Жомарт Кемелұлы Тоқаевтың рухани астанамыз — Түркістан төрінде өткен ұлттық Құрылтайда «Масс-медиа — елімізді жаңғырту ісіне ерекше ықпал ететін сала. Сондай-ақ, билік пен қоғам арасындағы пәрменді байланыс құралы. Ақпарат құралдарында түрлі көзқарастар тоғысады. Оны қоғам тынысының барометрі деуге болады»- деп, заманға сәйкес ақпарат саясатының тиімділігін арттыру, креативті индустрияны дамыту туралы тілге тиек еткені баршаңызға мәлім.
Қазір бұқаралық ақпарат құралдарындағы дәстүрлі ақпарат тарату үлгісіне өзгерістер енді. Сыр бойы журналистикасы цифрлы технологиялар кезеңіне тез бейімделіп, жаңа медианың ағымына ілесті. Қос телеарнамыз бен мерзімді басылымдарымыз сапалы контентті, уақыт шежіресін, таңдамалы тақырыптарды кәсіби шеберлікпен жеткізіп, қоғамдық сананы қалыптастыруда жүйелі жұмыстар атқаруда.
Әрине, журналистикадағы мықтылық — ашықтық, баламалы пікір, жылдамдық әрі дәлдікпен өлшенеді десек, сіздерге тынымсыз кәсіптеріңізге деген адалдықтарыңыз, болып жатқан жаңалықтардың жігін бұзбай бұқараға жеткізіп, маңызды әлеуметтік міндеттерді шешуге зор үлес қосып келе жатқандарыңыз үшін шынайы алғысымды білдіремін,- деді қала әкімі Асылбек Шаменов. Қала басшысы алдағы уақытта «Қаламгерлер» аллеясын жаңғырта беретінін де жасырмады.
Содан соң шаһардың тыныс-тіршілігін, өзекті мәселелері мен жарқын жетістіктерін ақпараттандырып, халық пен билік арасында алтын көпір бола білген бірқатар сала үздіктеріне қала әкімінің арнайы алғыс хаты мен естелік сыйлықтары табысталды. Сондай-ақ, халықаралық «Алаш» әдеби сыйлығының иегері, Қазақстан Жазушылар Одағы Қызылорда облыстық филиалының төрайымы, белгілі ақын, тележурналист Қаршыға Есімсейітоваға қаламыздың ең жоғарғы марапаты «Құрмет» грамотасы табысталды.
Өз кезегінде Қаршыға Құрмашқызы мен «Қызылорда қоғамдық теледидарының» құрылтайшысы Шаһизада Өтетілеуұлы барша қаламдастарын мерекемен құттықтап, алғаусыз пейілін білдірсе, «Сыр бойы» газетінің журналисі, ақын Дүйсенбек Аяшұлы жүрекжарды жырын оқып, көпшілік құрметіне бөленді.
Қала әкімдігінің журналистерге құрметі түстен кейін жалғасты. Журналист жігіттер бильярдтан, журналист қыздар боулингтен сайысқа түсіп, мереке жалғасын тапты. Бильярд бәсекесі қазақ руханиятына еңбегі сіңген, ақпарат айдынында өзіндік қолтаңбасымен дараланған ардақты ағаларымыз бен журналистика саласындағы орта және қазіргі жас буын арасында өзара шығармашылық үндестікті бекемдеу мақсатында ұйымдастырылды. Тартысты өткен турнир нәтижесінде 1-орынды «Қызылорда» телеарнасынан Жалғас Әлібеков жеңіп алса, 2-орын «Сыр бойы» газетінен Қуаныш Оразбаевқа бұйырды. Ал, «Сыр медиа» намысын қорғаған Дүйсенбек Аяшұлы мен «Қоғам ТВ» телеарнасы сенім артқан Сәдуақас Ізімбаев 3-орынды өзара бөлісті.
Боулингтен ұйымдастырылған журналист қыздар арасында өткен байрақты бәсеке қорытындысында «Қызылорда» телеарнасының командасы 1-орынға қол жеткізсе, 2-орынды «Қоғам тв» телеарнасының қыздары еншіледі. «Сыр медиалық» арулар мен «Меншікті тілшілер» командасы 3-орынды қанағат тұтты. Жеңімпаздар мен жүлдегерлер қала әкімінің алғыс хатымен және арнайы естелік сыйлықтарымен марапатталды.
Қ.ӘНДЕШҰЛЫ
