Н.Бекежанов атындағы Қызылорда облыстық қазақ академиялық музыкалық драма театрында 27 наурызда халықаралық театр күні мерекесіне орай «Сахна әлемі» атты шығармашылық кеш болып өтті. Облыс әкімінің орынбасары Нұрымбет Сақтағанов театр ұжымын төл мерекесімен құттықтап, өнер саласына еңбегі сіңген қызметкерлерді облыс әкімінің алғыс хатымен марапаттады. Сонымен қатар, Астана қаласында өткен Қазақстанның халық әртісі, Халық қаһарманы, Мемлекеттік сыйлықтың иегері Әзірбайжан Мәмбетовтің 90 жылдық мерейтойына арналған II халықаралық «TEATPALL» театр фестивалінде өнер көрсеткені үшін «Театр өнерін дамытуға қосқан үлесі үшін» номинациясын жеңіп алған Қазақстанның еңбек сіңірген артисі, «Құрмет» орденінің иегері Бақытбек Алпысбаевты арнайы құттықтады. Облыстық мәдениет және спорт басқармасының басшысы Мира Қазбекова басқарманың Алғыс хатымен театр қызметкерлерін марапаттаса, Қазақстан Театр қайраткерлері одағының, Кәсіподақ ұйымының Құрмет грамотасымен театр артистері мен қызметкерлерді және “Еңбек даңқы” төсбелгісін Күләш Жанмұратоваға табыстады. Сонымен қатар облыстық Кәсіподақ ұйымының Алғыс хаты, “Ең үздік көрермендер”номинациясы, «Ең үздік театр өнерін насихаттаушы» номинациялары табысталды.
Шығармашылық кеште театрда жыл бойына тынбай еңбек еткен Мирамбек Әбілахұлы, Ләззат Жұбандыққызы, Дина Михатқызы, Қайрат Темірханұлы, Нұржан Ұзақұлы, Асқар Қайратұлы “Үздік қызметкер” номинациясымен, марапатталса, «Үкілі үміт» номинациясымен Ердаулет Мамуов, Нұрсейіт Сыздықбаев марапатқа ие болды. “Екінші пландағы жыл актері» номинациясы Жүзбай Санат, “Екінші пландағы жыл актрисасы» номинациясы Айгүл Байдалиеваға табысталды. «Эпизодтық табысты ер бейнесі үшін» номинациясымен Қуаныш Құрманбеков марапатталса, “Эпизодтық табысты әйел бейнесі үшін» номинациясы Аягөз Дүйсенқызына табысталды. Ал, “Балалар қойылымындағы табысты ролі үшін” номинациясымен Ерден Нұрбек, «Жылдың актерлік дуэті» номинациясымен Әзидолла Әзімтай және Жауһар Еркінова, «Ең үздік қойылым жасағаны үшін» Нұрсұлтан Төреәли марапатталды. «Жыл жаңалығы» Анураг Кашьяптың «Кім?» мистикалық трейлерінің режиссері Қанат Архабаев, Рахымжан Отарбаевтың «Нарком Жүргенов» драмасындағы Темірбек Жүргенов ролі үшін «Мемлекет және қоғам қайраткері Темірбек Жүргенов атындағы арнайы жүлде» Сырым Әбдразақов иеленді. «Жыл актері» Аманжан Шегебаев, «Жыл актрисасы» Зарина Кенжеәлі марапатталды.
Биылғы шығармашылық кеште Сыр әртістерінің жұлдызы жанды. Көрермендер өздерінің сүйікті өнер иелеріне қошемет көрсетті. Театр ұжымының тер төге еткен еңбегі еленіп, жыл бойы сахналанған 11 жаңа қойылым бойынша сараланды.
З.Қонысжан
