Театр қоғамды адамгершілік пен рухани құндылыққа бастайтын бірден бір жол екені сөзсіз. Әдеби шығарманы сахналық қозғалыспен, яғни, өзіне ғана тән театрлық бояумен жаңа күйге енгізіп, ондағы өзара қарым-қатынастарды тірілтеді. Әрбір іс-қимыл, ашу-ыза, сезім дірілі, шаттық-күлкі, қуаныш пен қайғы тікелей көрерменге әсер етіп, түрлі күйге түсіреді. Театр өнері көрерменнің өмірге, коғам тыныс-тіршілігіне деген өзгеше көзқарасын қалыптастырады.
А.Тоқмағамбетов атындағы мәдениет үйінде М.Мәметова атындағы Қызылорда педагогикалық жоғары колледжінің «Ассорти» студенттер театры мен «Харизма» вокалдық тобының «Бәріміз де бір дәуірдің жастары едік» тақырыбындағы оқу жылын қорытындылау концерті өтті.
Өнерпаз жастардың жылды қорытындылау кешіне Н.Бекежанов атындағы Қызылорда облыстық музыкалық драма театры ұжымынан және қалалық «Жастар» театрынан бірқатар актерлер мен актрисалар келді. Сондай-ақ, «Рухани жаңғыру» орталығының бөлім басшысы Ш.Қаратайұлы, директордың оқу ісі жөніндегі орынбасары Г.Бахадурова, тәрбие ісі жөніндегі орынбасары Г.Исаева және колледж оқытушылары, студенттер және ата-аналар көрермен қатарын толықтырды.
Шығармашылық жиында «Біз де перваш болғанбыз» комедиялық қойылымы және «Поколение» спектаклі сахналанып, «Харизма» вокалдық тобы бірнеше әндер орындады. Студент жастардан құралған қос өнер шаңырағы сынаптай сырғыған уақыттың ең әдемі кезеңі студенттік күндердің қызығын, ерекше естеліктерін, айқын мақсаттан тұратын асқақ армандар мекені екенін түсіндіре білді. Сахна төріндегі әр қойылым көрермен жүрегіне жетіп, жанарға жас, езуге риясыз күлкі сыйлады.
Шара соңында директордың оқу ісі жөніндегі орынбасары Г.Бахадурова оқу мен тәрбие процесін қатар алып, талантын шыңдап жүрген әр өнерпазға алғыс білдіріп, сәттілік тіледі. Сондай-ақ, колледж әкімшілігі атынан «Ассорти» студенттер театрының және «Харизма» вокалдық тобының бітіруші түлектеріне арнайы сый-сияпат сыйлады. «Рухани жаңғыру» орталығының бөлім басшысы Ш.Қаратайұлы қос шаңырақтың жетекшілеріне Қызылорда қаласы әкімдігі, қоғамдық даму басқармасының арнайы Алғысын табыстады.
«Ассорти» студенттер театрының жетекшісі, бітіруші түлек Б.Ешмұратов қолдау білдіріп келген көрермен қауымға ризашылығын білдіріп, алдағы уақытта театр тізгінін ұстайтын жаңа жетекші мен қоюшы режиссердің есімін атап, ресми түрде жариялады.
Расымен де, театр дем алатын орын ғана емес екендігін ескеру керек. Алдымен ол – мәдени орта қалыптастыратын мекен. Өнерсүйер қауым театрға рухани баю үшін келеді. Жан-дүниесін күйбең тіршіліктен бір сәтке болсын арашалап, құлан таза рухани түрде тазару үшін барады. Театр – халықты эстетикалық адамгершілік пен ізгілікке тәрбиелеудің аса маңызды құралы. Театр өнері көрерменнің өзгелерге деген, басқа халықтар өмірі мен қоғам тіршілігіне деген ынта-ықыласын арттырумен қатар, достық сезімін де күшейте түсуге әсер етеді.
М.Мәметова атындағы Қызылорда педагогикалық жоғары колледжінің «Ассорти» студенттер театры да аз уақытта көп көрерменнің көңіліне жылылық ұялатып, жүрегіне жол тапқан ұжым. Осы бір қос өнер шаңырағы ұжымына шығармашылық жолда жетістіктер, кәсіби өрлеу тілейміз.
А.Әділжанұлы
