«Шіркін уақыт десеңші» деп шамырқанып отыратын, «Өмір есікті ашып-жапқанмен тең» деп тебіретенін қариялар қатары әлі бар. Бірақ, сол бір ғазиз ғұмырын ғанибетке арнаған ақсақалдардың көптігі де көңіл қуантады. Бүгінде осылайша ортамызда жүрген қарияларымыздың бір кезде елі, халқы, келешек ұрпағы үшін жасаған игі істері, төккен тері, еткен еңбегі елене қалса марқайып қаламыз. «Қартқа қандай құрмет көрсетсең, ол сенің алдыңа келеді» деген тәмсілді ұмытпаған ұрпақ жоқ емес. Қазіргі кезде біздің мемлекетімізде қарттарға үлкен мән беріліп, көңіл аударып, үкімет тарапынан жан-жақты қамқорлық жасалуда. Қазақстанның өсіп-өркендеуіне, еліміздің бейбітшілік тыныш өмір кешуіне өз үлестерін қосқан ардақты да аяулы қарттарымыздың арқасы екені даусыз.
Қазыналы қарттар – саналы ғұмырларын Отан деп, тынымсыз еңбектерімен мемлекетіміздің негізін салуға жол ашқан алдыңғы буын аға-апаларымыз. Олардың өмір жолдары бүгінгі ұрпаққа ұлағатты қазына. Ардагерлердің көпшілігі өз жастарына қарамастан өскелең ұрпақты тәрбиелеуде белсенділік көрсетіп, еңбек етті. Олардың бай тәжірибелері әрдайым жоғары бағалануы тиіс.
Қазақылықтың қаймағы бұзылмаған Қызылорда облысы тұрғындары қарияларын қашанда қадір тұтқан халық. «№1 Қызылорда арнаулы әлеуметтік қызметтер көрсету орталығында» ем алып жатқан үлкендердің батасынан-ақ жүрек жылуын сезінуге болады. Аталған мекемеде 1 қазан «Халықаралық қарттар күні» мерекесіне орай 2022 жылдың 30 қыркүйек күні «Қарттарын қадірлеген ел ардақты» атты мерекелік іс-шара өтті. Салтанатты шараға облыс әкімі Нұрлыбек Нәлібаев, облыстық мәслихат хатшысы Наурызбай Байқадамов, Қызылорда қаласы әкімі Асылбек Шаменов, облыстық ардагерлер кеңесінің төрағасы Серік Дүйсенбаев, облыстық қоғамдық кеңесінің төрағасы Әріп Хожбанов, мемлекет және қоғам қайраткері Бақберген Досманбетов, Қызылорда облысының жұмыспен қамтуды үйлестіру және әлеуметтік бағдарламалар басқармасының басшысы Ғабит Жаңабаев, сонымен қатар орталықта қызмет атқарған ардагерлер мен бұқаралық ақпарат құралдарының өкілдері, орталық қызмет алушылары мен қызметкерлері қатысып, мерекелік іс-шараны тамашалап, тағылым алды.
«Алтын күз-2022» жәрмеңкесінде күзгі науқанға орай, халыққа, орталықтың қызмет алушыларына мекеме ауласында молынан көрініс тапқан азық-түлік өнімдері ұсынылып, қызметкердің даярлаған дәм, сыйы таратылды. Сонымен қатар, сегіз қанатты киіз үйде облыстық өлкетану мұражайының қазақтың ұлттық көне жәдігерлерінен көрме ұйымдастырылып, мерекелік іс-шара облыстық филармония өнерпаздарының концерттік бағдарламасымен жалғасын тауып, орталықтан зейнетке шыққан ардагерлерге сыйқұрмет көрсетілді. Мерекелік іс-шара соңында қызмет алушылар мен келген қонақтарға «Бауырсақ пати» шарасы ұйымдастырылып, ыстық бауырсақтар мен палау тағамы ұсынылды.
Қызылорда өңірінде 78 мыңнан аса зейнет жасындағы ардагер бар. Олардың әрқайсысы мемлекеттің қолдауын сезінеді. Аймақта қариялардың лайықты деңгейде өмір сүруі үшін зейнеткерлерді сауықтыру және спорттық шаралармен қамту жұмыстары ұдайы жүргізіледі. Иә, халықаралық қарттар күнінде №1 Қызылорда арнаулы әлеуметтік қызметтер көрсету орталығына арнайы барған облыс әкімі Нұрлыбек Нәлібаев мұндағы қызмет алатын ардагерлердің жағдайын біліп, пікірлесті.
— Біз «Қартын сыйлаған елде қасиет бар» деген аталы сөзге бас иген дана халықтың ұрпағы ретінде ардагерлерімізді ардақтап, сый-құрмет көрсетуді перзенттік парыз санаймыз. Абыз ақсақалдыққа, қадірлі қариялыққа жету – өмір мектебінен өткен әрбір адамның мерейлі кезеңі. Сіздер қай уақытта болмасын, орамды ойларыңызбен елді берекелі бірлікке, тату тірлікке үндеп келесіздер. Мен өздеріңізбен орайы келгенде жиірек жолығып, еркін пікірлесіп, кесімді ойларыңыз бен ұтымды ұсыныстарыңызды тыңдауға қашанда әзірмін. Сіздер аман болыңыздар,- деді облыс әкімі Н.Нәлібаев.
Бүгінде бұл орталықта 250-ге жуық ардагер және мүгедектігі бар азаматтар қызмет алады. Заман талабына сай жабдықталған ғимаратта өткен жылы спорт алаңы салынып, пайдалануға берілсе, биыл қызмет алушылардың рухани демалыстарына ерекше көңіл бөлінбек. Бұл ретте еліміздің тарихи, мәдени орындарына саяхат жасауға шағын автобус сатып алу үшін бюджеттен 21 млн. теңге қаржы қаралыпты. Оған қоса, осы басқосуда облыс әкімі қариялардың игілігіне арнап, әлеуметтік орталыққа арнайы сыйлығын табыс етті.
Өңір басшысы айтқандай, расымен, даналықтың алтын кілті – ата-бабаларымыздың өнегесінде. Ата жолын жалғап келе жатқан бүгінгі күнгі ақсақал аталарымыз бен ақ жаулықты әжелеріміз. Қария деген сөз елдің басы болу, ақылын айтар дана болу, ел төрінде құрметке бөлену, ас бергенде немерелерінің үлесін бөлер қамқоршысы емес пе?! Олар – шаңырақтың шаттығын сақтап, бірлігін бекем етуге ақылын айтар елі мен жерінің кеңесшісі. Қазақтың әр отбасында арқа тұтар ата-әжелері бар. Олардың әрбір айтқан гауһар тасқа бергісіз ақылдары жас ұрпақтың өсіп-өркендеуіне өте мол үлесін тигізеді.
Ата-әжесі бар үйдің балалары да өзгеден ерек, ортасындағы ерекшелігі қариялардың ыстық алақанынан дәм татып, жауһар сөздерін саналарына сіңіріп өскендігі білінеді. Ата дәстүр салтымыздан таймай, ескі ғұрыптармен немерелерін нағыз қазақтың салтын сақтар бабалардың жолыменен жүретін өр рухты қазақты тәрбиелеп өсіреді. Сондықтан да болар, қарты бар үйден қазақилықтың иісі ұрып тұрады. «Қарты бар үй, қазыналы үй» деп бекер айтылмаса керек. Үйдің берекесі мен мерекесі, есігіміздің ажарын кіргізіп тұратын үйдің үлкендері бастаған әр қадамымызға дұрыс жол сілтеп, ата-бабамыздан қалған нақыл сөздермен сусындатып отыратын абыз кеуде ақсақалдар ғұмырлы болғай.
Айдар САЙЛАУОВ
