Қазір сиқырдың соңынан жүгіретіндер көп. Бақсы-балгерлікті былай қойғанда, сандарды сөйлетіп, тағдыр жазмышын тауып беретін нумерология да шықты. Тіпті, мұның жарнамасы желіде желдей таралып, жұрттың бәрі нумерологтардың кеңесіне жүгінуді жөн көреді. Олар жолға шығып, шықпау керектігін, қандай кедергілер кездесетіндігін де алдына жайып салады екен. Туған күннің саны сәуегейлік танытып, тағдырдың қалай боларын болжап біледі-мыс. Тіпті, жұлдыз-жорамал да алдағы күннің барысын баяндап, жамандыққа аса қатты жорымаса да, сәттілікпен астарлап қисынын келтіреді. Бұған сенім артатындар көп. Бірақ, мұны кейбірі қолдан жасап, ойына келгенін бөсіп айтуды шығарған. Соған қарамастан, апталық болжамды асыға күтіп, тағаты таусылатындар да баршылық. Қысқасы, бұл жөнінде ислам не дейді? Олай болса, назарларыңызға 1hsan.kz сайтының мәліметін ұсынамыз.
Ғаламторда не көп? Астрологиялық болжамдар жасап беретін сайттар көп. Астрологтардың Күн мен Айдың, планеталардың адам тағдырына ықпал ететініне күмәні жоқ. Өкінішке қарай көпшілік соған сенеді. Ал, олардың мақсаты біреу-ақ – атын шығару, ақша табу.
Шариғат үкімі
Тек Алла Тағала ғана болашақты біледі және Одан басқа ешкім мұны біле алмайды. Құбылыстың да, себеп пен салдардың да, ой мен істің де жаратушысы – Алла. Орын алғанның, жүзеге асқанның бәрі – Алланың қалауымен және жүзеге асыруымен болады. Пайғамбарымыздың (с.ғ.с) мына хадистеріне зер салайық:
«Иман (Сенім) – Аллаға, Оның періштелеріне, Оның пайғамбарларына, Қиямет күніне, Тағдырға дәне жақсылық пен жамандықтың Алладан екеніне сену».
«Біліп қой, егер барлық адам саған жақсылық жасау үшін жиылса, олар Алланың саған белгілегеніндей ғана көмек көрсете алады. Егер барлық адам саған зиян келтіру үшін жиылса, Алланың саған белгілегеніндей ғана жамандық келтіре алады…».
Зиян мен пайданы да, жамандық пен жақсылықты да Алла жаратқан. Қазіргі уақытта орын алып жатқан және болашақта орын алатын істің бәрі Алланың қалауымен және білімімен ғана жүзеге асады. Мұны астролог, көріпкел немесе балгер білмейді. Әр істің Алланың қалауымен ғана болатыны көптеген аяттарда айтылған. Мысал үшін. «Әл-Фуркан» сүресінің 2-аятында: «Алла әр затты жаратты және оның тағдырын белгіледі» делінген. Сондай-ақ, «Әл-Камар» сүресінің 49-аятында: «Шынында, тұрмыста пайда болғанның бәрін Алла тағдырмен жаратқан» делінеді.
Планеталардың, Күн мен Айдың орналасуы тағдырға әсер етпейді. Және астрологтар қандай әдіс-тәсіл қолданса да, болашақ пен тағдырды біле алмақ емес. Құранда: «Айт: «Шынында, көк пен жердің тұрғындарының ешқайсы жасырынды (болашақты) білмейді, Шынында тек Алла ғана біледі…» — делінген.
Күн, Ай, планеталар — Алла жаратқан объектілер. Олар Алланың шексіз құдіретін көрсетеді. Алла Тағала оларды өзінің хақ екенін көрсету үшін жаратқан. Сондай-ақ, «Ан-Нахл» сүресінің 16-аятында жұлдыздарды қараңғыда жол көрсету үшін жаратқаны айтылған.
