Шөмішбай Сариев – ақын, аудармашы, «Барыс», «Парасат» ордендерінің, Франц Кафка атындағы халықаралық Алтын медаль, «Платиналық Тарлан» сыйлықтарының иегері, 300-ден астам ән-өлеңдердің және 15-тен астам кітаптың авторы. Шығармалары орыс, украина, қырғыз, өзбек, тәжік, румын, чех, үнді, француз тілдеріне аударылған. Ол қазақ әндеріне сөз жазған ақындардың көш басында.
Биыл туған өлкесінде Ш.Сариевті еске алуға арналған шығармашылық кеш өтті. Алдымен Ә.Тәжібаев атындағы әмбебап ғылыми кітапханасында әдеби кеш болды. Кешке ақынның жары Жұмагүл Сариева балаларымен келді. Сонымен бірге Қазақстан Жазушылар одағының мүшелері Қатира Жәленова, Сайлаубай Жұбатырұлы, Мақсат Дауылбай және Сайлаубай Әбішев қатысып, естеліктерімен бөлісті.
Әдеби кеш барысында «Теңіз тудырған талант» атты кітап көрмесі таныстырылғаннан кейін ақынның өлеңіне жазылған, халық арасында кеңінен таралған әндер орындалып, жас толқын теңіз толқытқан таланттың өлеңдерін оқыды. Кеш қорытындысында «Әлімсақ» журналының бас редакторы, филология ғылымдарының кандидаты Нұрлан Нұрмаханов Шөмішбай Нағашыбайұлының 2009 жылы Арал ауданына шығармашылық сапармен келгенде жазған «Ақ кеме» өлеңін оқып берді. 14 жылдан бері жеке архивінде сақтап келген қолжазбаны ақынның жары Жұмагүл Сариеваға табыс етті. Түстен кейін Н.Көбегенұлы облыстық музейге барып, осы өлеңнің көшірмесін Ш.Сариевке арналған бұрышқа табыстады. Жұмагүл Сариева бастаған қонақтар да облыстық тарихи-өлкетану музейіндегі Шөмішбай Сариевке арналған экспозициялық бұрышпен танысты.
Қазақстанның еңбек сіңірген қайраткері, ақын Шөмішбай Сариевті еске алу кеші Н.Бекежанов атындағы қазақ академиялық музыкалық драма театрында жалғасты. Еске алу кешіне ақынның жұбайы Жұмакүл Сариева, ұлы, Қазақстан Республикасы Президенті Кеңсесінің басшысы Бақытжан Сариев және немерелері қатысты.
Облыс әкімі Нұрлыбек Нәлібаев кеш қонақтарын құттықтап, Шөмішбай Сариевтің ел мәдениетіне қосқан зор үлесін атап өтті. «Сырда туып, аты алты Алашқа танылған дарын иелерінің қатарында ақын Шөмішбай Сариевтің есімі ерекше. Мемлекет басшысы Қасым-Жомарт Кемелұлы Тоқаев ағамыздың көзі тірісінде-ақ «Ол – өзіндік өлең өрнегі арқылы ел құрметіне бөленген қаламгер» деп баға берген болатын. Сыр жұрты өз перзенттерін әрдайым құрмет тұтып, еңбегін ешқашан ұмытпайды. Дарынды тұлғаның өнегелі өмірін ұрпаққа насихаттап, қазынасын алтын қорда сақтайды. Қазақ өнерін өрге жүздірген Сыр перзенті Шөмішбай ағамыздың рухы шат, ұрпағы аман болсын» – деп, тілектестік білдірген аймақ басшысы Нұрлыбек Машбекұлы ақынның жұбайы Жұмакүл Сариеваға Мемлекет басшысының арнайы құттықтау хатын табыстады.
Шөмішбай Сариевтің лирикалық жырларының, жұртшылық құлағына сіңген әсем әндерге жазылған өлеңдерінің өрнегі ерекше. Ол туған жеріне деген сүйіспеншілігін «Айналдым сенен, Атамекен-ай», «Сәлем саған, туған ел», «Аралдан ұшқан аққулар» сияқты туындыларына арқау етті. Бұл әндердің жарыққа шыққанына 30-40 жыл өтсе де, әлі күнге дейін сахна төрінде шырқалып, тыңдарманның жүрегіне жақын орын тепкен.
Кеште Қазақстанның Халық әртісі, Қазақстанның Еңбек Ері Роза Рымбаева, Қазақстанның Халық әртісі, Мемлекеттік сыйлықтың иегері Мақпал Жүнісова, Қазақстанның еңбек сіңірген қайраткері Жеңіс Ысқақова, «Құрмет» орденінің иегері, әнші Сүлеймен Ибрагимов, Мәдениет қайраткері Жұбаныш Жексенұлы өнер көрсетіп, ақынның өлеңдеріне жазылған әндерді орындады.
А.Сырлыбай
