Барша спорт әлемі үшін маңызды спорттық дода ХІХ жазғы Азия ойындары өз мәресіне жетті. 15 күн бойы тартысты да таласты өткен байрақты бәсекеге еліміздің 524 спортшысы спорттың 30 түрінен ел намысын қорғаса, Сыр өңірінен 25 спортшы, спорттың 13 түрінен өнер көрсетті.
Азия ойындарының алғашқы күндерінде Сыр елінен үш бірдей спортшымыз Мағжан Шамшадин, Абылайхан Жұбаназар, Шархан Нұрлыхан дзюдодан қола медаль иеленсе, артынша стенд атудан жерлесіміз Айжан Досмағамбетова қола жүлде жеңіп, төрт бірдей жүлде жерлестерінің төбесін көкке жеткізді.
Бокстан Токио Олимпиадасының қола жүлдегері Қамшыбек Қоңқабаев Азия ойындарының күміс жүлдесін иеленіп, «Париж-2024» олимпиадасының жолдамасын жеңіп алды. Азиаданың соңғы күнінде өз мықтылығымен бәрін тамсандырған Мөлдір Жаңбырбай каратэден керемет өнер көрсетіп, күміс жүлде еншіледі.
Е.Ерболұлы
