Қазақ күресі – қыздардың да қаруы

Спорт – денсаулық кепілі. «Тәні саудың жаны сау» демекші, салауат­ты өмір салтын ұстанып жүру – әр адамның міндеті. Түрлі аурумен татуластырмайтын, дәрігермен достастырмайтын да – спорт. Бала айтқанды емес, көргенін жасайтыны секілді, тұлға болып қалыптасқан қайбір азамат кейінгі толқынға үлгі болуы үшін спортпен шұғылданып тұрғаны дұрыс. Баланың басы біліммен, тәні спортпен «ауырған кезеңі» болашақтағы жетістіктерінің емі болмақ. Көк жәшіктен көк туымыз­ды көтерген спортшыларымызды көрген балалар спортқа қызығып, чемпион аға-әпкелерінің жолын жалғап жатса жетістік. Тұрғын үйлердің жанынан спорттық алаңқайларды көбейту баланың үнемі қимыл қозғалыста жүруіне септігін тигізеді. Үнемі қозғалыста жүретін тәннің шымыр болатыны, шымыр дененің спортта шыңға шығаратыны да белгілі. Еңбектері еленбей қалып жатқан спортшылары­мыз туралы жиі ақпарат беріп, өскелең ұрпаққа жүрген жолдары туралы, спорттағы әр жетістіктің ащы маңдай тердің нәтижесі екенін айтар болсақ, баланың психологиялық мықты болуына да септігі тиер еді. Спорттық шараларды жиі өткізіп тұру, оған лайықты сыйақы тағайындау спортшының тыңғылықты жаттығуына әсер етеді. Сол себепті жағдайы жасалған спорттық нысандардың көп болуы мықты спортшылардың да көбеюіне әкеледі.

«Өмірдің өзі күрес» деген аталы сөз бар. Қазақ халқының тарихына үңілер болсақ, оңай келген ешқандай олжа жоқ. Біз басып жүрген ұлан байтақ жер, тәуелсіз аспанның астында өмір сүріп жүргеніміздің бәрі де – ата-бабамыздың күресінің жемісі. Жастайынан атқа қонған қазақтың баласы, биік­те жүруді әдетке айналдырып, тұлғалық жағынан да, рух жағынан да төмендеп көрмеген. Кең байтақ даланың құшағында, шек­сіз­дікке көз тастаған қазақтың перзенттері бізге осы тәуелсіздікті қалдырғаны да тарихта баяндалады.

Ұлт ретінде қалыптасқан әр халықтың ұлттық спорты бар. Жауынгер халықтың жанына жақын спорты білекке, айқасқа негізделеді. Қазақ халқының ұлттық спорты дегенде күрес ойға оралатыны жасырын емес. Қазақ халқы балуандарды қатты құрметтеген. Халық қарасы көбейген шақта, мерекелерде қос мықтыны күрестіру – біздің халықтың әдеті. Ел тарихымызда есімдері алтын әріппен жазылған Қажымұқан, Балуан Шолақ, Иманжүсіп секілді аталарымыз күрес спортының аты аңызға айналған тұлғалары. Қазіргі тәуелсіздік жылдарында да қазақ күресі кенже қалған жоқ. Республикалық жарыстар ұйымдастырылып, балуандардың қазақ күресін көтеріп жатқаны қуантарлық жағдай. Қазақ күресінен өтетін жыл сайынғы дәстүрге айналған «Қазақстан барысы» жобасы – соның дәлелі.

Балуан десе ойға жігіт спортшылар оралады, алайда күрес өнеріне өзіндік үлес қосып жүрген қыздарымыз да жетерлік. Сыр өңірінің спортындағы өткен аптадағы қуанышты жаңалықты айталық. Шымкент қаласында ақпан айының 24-28 күндері аралығында Қазақ күресінен Қазақстан Республикасының чемпионаты өтті. Облысымыздың абыройын асқақтатқан тұсы Самал Мәлікқызының алтыннан алқа тағынған сәті. 52 кг салмақ дәрежесінде өнер көрсеткен жерлесіміз барлық қарсыластарынан басым болып, Сыр спортының мерейін көтеріп тастады. Сонымен қатар Самал ҚР спорт шебері нормативін сәтті орындады. Жаттықтырушылары К.Туленов, Б.Байтабынов, С.Тілеубайларға да алғыс айтамыз. Алдағы уақыттарда Самал Мәлікқызының Сыр спортының дамуына өз үлесін қосып, жеңіс тұғырынан көрінетініне сеніміміз мол. Қазақ қыздарының тектілігі мен намысы оза шабатынын, белдесудің қыз­дарға жат емес екендігін көрсеткен Самал жерлесімізге толағай табыстар тілейміз.

Қазақбай ӘНДЕШ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған