Өткен аптада Сыр медицинасында ұмытылмас күн болды. Аймағымызда араға 9 жыл салып бүйрек ауыстыру отасы жасалды. Сәл шегініс жасасақ, мұндай ота түрi өңірімiзде алғаш рет 2014 жылы жасалған болатын. Ал, қазіргі уақытта Қызылорда облысында 85 трансплантацияланған науқас бар. Бүйрек ауыстырған қызылордалық азаматтардың бүйрек қызметі әлі күнге дейін өз жұмысын жақсы атқаруда.
Бүгінгі хирургияда донорлық бүйректі сәтті трансплантациялау созылмалы бүйрек жеткіліксіздігі бар науқастардың өмір сүру сапасын қалпына келтіріп, олардың толық медициналық және әлеуметтік оңалуын қамтамасыз етеді. Ал, аурудың дамуын болдырмаудың жолы – скрининг арқылы бүйрек ауруын ерте анықтау.
Көпбейінді облыстық ауруханасында 25 жастағы еңбекке қабілетті азаматқа жасалған бүйрек трансплантациясы отасы сәттi аяқталды. Донор пациенттің ағайыны болды. Үш жыл бойы жасанды бүйрек аппаратына тәуелді болып жүрген науқас үшін бұл көптен күткен қуанышты оқиға еді. Ендi ем алушы азамат бұрынғы толыққанды өмірiне оралғандай күй кешті. Диализ орталығынан тәуелсіздікті, уақыт пен тамақтануға байланысты шектеулерден босап, жұмыс істеуге, еркін саяхаттауға және белсенді өмір салтын ұстануға мүмкіндік алды.
Осы ретте трансплатацияның Қызылордада жасалуына қолдау білдірiп арнайы келген А.Н.Сызғанов атындағы Ұлттық ғылыми хирургия орталығының басқарма төрағасы, медицина ғылымдарының докторы, профессор, жоғары санатты дәрігер Болатбек Баймаханов пен жетекшілік ететін трансплатологтар командасы қолдау білдірді. Көпбейінді облыстық аурухананың дәрігерлері де отаға қатысып, тәжірибе алмасты. Бүйрек ауыстыру отасын алдағы жылы да жалғастыру жоспарда бар.
Б.Бағдатұлы
