БЕЛКӨЛДІКТЕР БОЗКІЛЕМДЕ БИІКТІ БАҒЫНДЫРДЫ

Қызылорда қаласынан білекті де жүректі спортшылар шығып жүргенін жақсы білеміз. Спорттың қай саласы болсын, өз бағыты бойынша белес биігінен көрінуде. Қала жастарының спортқа құмарлығы, салауатты өмірге сүйіспеншілігі байрақты бәсекеде жеңімпаз болуға дейін жетектеп келеді. Расымен, спорттың адам өмірінде алатын орны зор екенін бәріміз білеміз. Спортпен айналысқан адамның денсаулығы мықты, өзі шыдамды болады. «Тәні саудың жаны сау» деп бекер айтылмаған. Спорттың қай түрімен болсын айналыса білу адамның қабілетіне байланысты.

Спортшыларымыздың әлемдік деңгейдегі беделді жарыстарда қол жеткізген жетістіктері спортшыларды даярлаудағы қазіргі жүйе ықпалды да тиімді екенін аңғартады. Жоғары жетістіктер спортындағы рекордтар, халықаралық, ұлттық және басқа да ресми спорттық бәсекелердегі жеңістер бұқаралық спорттың дамуына моральдық тұрғыдан игі ықпалын тигізеді. Бұқаралық спорт дегеніміздің өзі – спортпен жүйелі шұғылданатын адамдар мен спорт түрлерінің дамуы. Экономикалық тұрғыдан дамыған елдер бұл көрсеткішті жоғарғы пайызға жеткізуге ұмтылуда. Саламатты өмір салтын насихаттап, халықты спортқа тарту аса маңызды. Мұның адамның бойына күш-қуат құйып, рухани болмысын жаңғыртатын бірден-бір амал екені даусыз. Қазір бізде, Қазақстанның барлық өңірлерін қосқанда, жыл сайын көптеген спорттық шаралар өткізіледі. Бірақ, бұл – аз, жер-жерде: ауылдарда, үлкендікішілі қалаларда, сондай-ақ, кәсіпорындар мен ұйым-мекемелерде тың бастамаларға жол ашу қажет.

Ал, Қызылорда қаласына оралар болсақ, қала жастарының жалыны жоғарыда айтқан әлем бәсекелерінде топ жарып, тайбурыл текті екендерін дәлелдеп жүр. Нақты айтар болсақ, ағымдағы жылдың 1-3 шілдесі күндері Қырғызстан мемлекеті Ыссық көл облысында WSF каратэден Азия чемпионаты өткізіліп, Белкөл спорт кешенінің спортшылары жоғары жетістіктерге қол жеткізіп, Сыр елінің мерейін асқақтатты.

Дүбірлі додада өнер көрсеткен Рамазан Махаметжан, Данияр Жарылқасын, Мансұр Қали алтыннан алқа тағынып, Азия чемпионы атанса, Даниал Мұрат, Данабек Нұрасыл, Жәнібек Кәрімжан қола жүлде иемденіп, әлемдік аренада көк туымызды желбіретті.

Чемпиондарды қабылдаған кент әкімі Жасұлан Сәду оларға ыстық ықыласын жеткізіп, жас өрендерді спортқа баулып, кентте спорт саласының дамуына үлес қосып жүрген жаттықтырушы Талапберген Абдрамановқа шынайы алғысын білдіріп, Алғыс хатпен марапаттады.

– Жарыстар, спартакиадалар мен универсиадалар, басқа да спорттық бәсекелерді бір мезгілдік шара күйінде қалдырмай, жүйелі, тұрақты, жыл сайын өтетін дәстүрге айналдырғанымыз абзал. Және мұны әркім өзінен, өз шаңырағынан бастауы керек. Спортты дамыту үшін бизнестің әлеуметтік жауапкершілігі механизмін іске қосып, қаржылы кәсіпорындарды спорт нысандарын салуға, спорт саласын қаржыландыруға тарту қажет. Спорттың дамуы, оның ішінде маңызды спорттық жетістіктер мемлекеттің әлеуметтік-экономикалық ілгерілеуіне де байланысты. Мемлекет спорт саласына тиісті деңгейде қолдау көрсетсе, спортшылар да тиісті дәрежеде дайындалып, соның арқасында жоғары спорттық нәтижелерге қол жеткізе алады. Бүгінгі жетістік соның айқын дәлелі. Жеңімпаздар енді Әлем бәсекесінде бақ сынайды,- деді жаттықтырушы Талапберген Абдраманов.

Спорт – қоғамдағы жалпы мәдениеттің бір бөлігі, адамның дене қабілеттерін дамыту мен денсаулығын нығайтуға бағытталған әлеуметтік қызметтің бір саласы. Жастардың жан-жақты дамуын спортсыз елестету мүмкін емес. Сол үшін де қала жастарын спортқа тарту басты бағыт болып отыр. Денесі жақсы дамыған деп күн режиміне спортпен жүйелі айналысуды енгізген, ағзаның шынығуы үшін табиғи факторларды тұрақты пайдаланатын, жұмысты белсенді демалыс пен ауыстырып отыратын жас адамды айтамыз. Cпорттың түп қазығы – қозғалыс, ал қозғалыссыз тіршілік жоқ. Бірінші байлық — денсаулық, ал сол денсаулықтың кепілі – спорт. Сондықтан қала тұрғындарын спортпен айналысуға шақырып, балаларыңызды спорттық үйірмелерге табыстауға кеңес береміз. Ал, белкөлдік жампоздарға әлемдік додада да сәттілік серік болсын деп тілейміз.

Айдар САЙЛАУОВ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған