Білімді ұлт – мемлекеттің болашағын жасайтын басты фактор. Заман талабына сай мамандық иелері үнемі прогрессте болып, ел дамуына жоғары үлесін қосады. Қазіргі таңда әлем елдерінен бөлек, біздің мемлекетіміз де білім саласына үлкен жауапкершілікпен қарайды. Мектеп, басқа да білім ордаларына қолдау көрсетіп, жаңа нысандардың бой көтеруі осыған дәлел. Мектеп табалдырығын аттаған сәтінен бастап, мектептен түлеп ұшқанға дейін білімге ден қойған шәкірттердің болашағы баянды болмақ.
Мектеп маусымы аяқталып, оқушылар жазғы демалысқа шықты. Бүлдіршіндер жазғы демалыстарын қызықты етіп өткізуі үшін лагерьге бару жұмыстары ұйымдастырылған. Ал, мектеп түлектері үшін жауапты кезең ұлттық бірыңғай тестілеуге дайындық күшейеді. Жинаған білімдерін көрсетіп, білім грантын жеңіп алуы үшін оқушылар барын салмақ. Еліміздің барлық қалаларында орналасқан жоғары оқу орындарынан шәкірттеріміз үмітті. Осы орайда жоғарғы нәтиже көрсеткен Нұрсұлтан Баймырзаұлы Рысқалиевті айтып өткіміз келеді. Ұлттық бірыңғай тестілеуде Қызылорда облысы түлектерінің арасында ең жоғары балл жинаған Аралдың 11-сынып оқушысы Нұрсұлтан Баймырзаұлы дәрігер болғысы келеді екен.
Нұрсұлтан Арал ауданы №220 орта мектебінің үздік оқушысы, «Алтын белгі» үміткері. Дәрігер болуға талпынысы ерекше түлек тестілеудің алғашқы мүмкіндігінде 137 балл жинаса, екінші тестілеуіне 23 маусым күні тапсырып, 140 баллды еншілеуді көздеп отырғанын жеткізді.
«Болашақта әкемнің жолын қуып, медицина саласында еңбек етсем деймін. Ақ халатты абзал жан атанып, еліме адал, абыройлы қызмет атқарғым келеді. Ойлаған армандарым, алға қойған мақсаттарым жетерлік. Болашаққа нық қадам басып, арманым орындалады деген сенімдемін», – дейді үздік оқушы.
Н.Рысқалиев ұлттық бірыңғай тестілеудің екі рет тапсыру мүмкіндігі әр түлекке білім грантын алуға үлкен үміт сыйлап жатқанын ерекше атап өтті.
Нұрсұлтан Баймырзаұлы биология пәні бойынша республикалық олимпиада жүлдегері, бірнеше мәрте облыстық, республикалық конкурстардың жеңімпазы атанған. Пән мұғалімі Гүлбану Абатова мен сынып жетекшісі Гүлмира Алибекова шәкірттері үшін қуанышты.
Облысымыздың барлық мектеп түлектері жоғары балл жинаудан дәмелі. Қаншама жыл жинаған білімді көрсететін сәт ұлттық біріңғай тестілеу кезеңі. Ұстаздардың берген білімі, шәкірттің талпынысының бәрі дерлік сыналатын шағы. Ұстаз оқушы үшін үлкен құрметке лайықты тұлға. Алғашқы әріптен бастап, мектептен қоштасқанға дейін қажетті білімді беріп, бар білгенімен бөліседі. Міне, ұстаз бен оқушының арасындағы тығыз да нәтижелі байланысты аралдық шәкірт көрсетіп отыр. Ұстаз бен оқушы үшін ұлттық бірыңғай тестілеудің жүгі ауыр. Сол себепті, Сыр өңірінің барша түлектеріне грант иегері болуына тілектестік білдірдік.
Қазақбай ӘНДЕШ
