Жаңа қазақстандық әрбір жастың көкейінде бір сұрақ болу керек секілді. Ол — «Елімнің дамуы үшін мен не істей аламын?» деген сұрақ. Оның жауабы да белгілі. Ел ертеңі үшін алаңдап, өз болашағын елдің болашағымен ұштастырғысы келген жастың жалғыз амалы – білім алу.
Өз дәуірінің білгірі һәм ойшылы болған Жиренше шешен адам баласының әр уақыттағы жасының мәнін талдап, түсіндіріп, келер ұрпаққа ой қалдырған екен. «Он бес жас – құйын қуған желмен тең, жиырма жас – дауыл ұрған көлмен тең, отыз бес – ағып жатқан селмен тең, қырық бес – аю аспас белмен тең, жетпіс бесте — өр көңілің жермен тең. Сексенде селкілдеген шал боларсың, тоқсанда сексенге де зар боларсың, жүзге келсең дүние қызығынан күдеріңді үз: өлмей тірі жүргенге мәз боларсың»,- дейді. Шешеннің әрбір сөзі қыздың жиған жүгіндей жинақы, жұп-жұмыр. Айтқанындай, бала шақ пен жігіт жасының арасында адам баласы құйын қуған желдей, алып-ұшпа көңілмен, жастыққа тән аңғалдықпен, бейқамдықпен өмір кешеді. Азаматтық көзқарасы мен қоршаған ортасына деген түсінігі де осы шақта қалыптасады. Осынау толқымалы сәтте сыннан сүрінбей, қайта келмес қуатты мезгілді сан соқтырмай өткізу үшін тағы да білім жинау керек. Сонда жастық шақ – білім алатын уақыт. Жай ғана уақыт емес, дауыл ұрған көлде, ағып жатқан селде, аю аспас белде кезігетін бұрылыстарға қам жасайтын сәт. Сонымен қатар білім мен білікті бірге игеру қажеттігін де сөз еткеніміз абзал. Бұл теория мен тәжірибені қатар шыңдау керек деген сөз. Оқу орнына түскен студент білім алатындығы түсінікті, ал «болашақ маман қалай тәжірибе жинақтайды?» деген сауалдың жауабы – жастар ұйымдары дер едім.
Колледж қабырғасында жастар саясатын қалыптастыруға және іске асыруға, жастарды білім беру және тәрбие процесі аясында өткізілетін іс-шараларға қатыстыру, перспективалық қоғамдық маңызы бар жастар бастамаларын әзірлеу және іске асыру бағытында Жастар ісі жөніндегі комитет жұмыс істейді. Комитет жанынан студенттердің түрлі бағыттағы қызығушылықтарын қанағаттандыру үшін жастар ұйымдары құрылған. Олар білім алушының бос уақытын тиімді жоспарлауда, түрлі кәсіби дағдыларға үйретуде, дарынды, сапалы жастар легін қалыптастыруда, студенттердің функционалдық сауаттылығын арттыруға таптырмас, теңдессіз механизм деп толық айта аламыз. Қазіргі уақытта тоғыз ұйым-клуб, сонымен қатар бөлімдер жанынан үйірмелер жұмыс істейді. Жастар ұйымдарына толығырақ тоқталатын болсақ, 2021 жылға дейін жастардың саяси сауатын арттыру және мемлекеттік жастар саясатын жүзеге асыру бағытында «Jas Otan» Жастар қанаты, сыбайлас жемқорлыққа қарсы үндейтін «Sanaly urpaq» клубы, әзілкештерден құралған «Manshuk.kz» жайдарман клубы, пікір-сайыс және шешендік өнерді үйретіп, ораторларды қалыптастырып келе жатқан «Шаңырақ» дебат клубы, «Мейірім акселераторы» еріктілер ұйымы, Студенттік Парламенті жұмыс жасаған. 2021-2022 оқу жылы комитет бірнеше жастар ұйымымен толықтырылып, жаңа бағытта жұмыс өрнегін көрсете бастады. Олар «Ассорти» студенттер театры, Студенттік Альянс ұйымы, «Manshuk Business Startup» бизнес клубы.
Оқу орындарындағы жастар саясатын жүргізуді оңтайландыру мақсатында Білім және ғылым министрлігінің «JASTAR KZ» жобасы жасалған. Жоба құрылымы түрлі бағыттарға бөлінген кіші жобалардан тұрады. Ендеше назарларыңызға М.Мәметова атындағы Қызылорда педагогикалық жоғары колледжінде атаулы жобалар аясында атқарылған жұмыстар жайын баяндаймын.
1. «ҚР колледждерінің 100 студенті жобасы» – өңірлік және республикалық кезеңдерді қамтитын «ТОП 100 – үздік студент» сайысынан тұрады. Бұл бағыт бойынша колледжіміз жыл сайын жақсы жетістікке жетіп келеді. 2019-2021 жылдар аралығында Досбол Нұрылла, Әлия Тоқмырза, Ақбота Тұрсынбай, Айзат Сламбекова, Бекзат Ешмұратов, Бексұлтан Санақұл секілді студенттеріміз әр уақыттарда республикалық байқаудың жеңімпаздары атанып, еліміздегі ең үздік студенттер тізіміне еніп келеді.
2. «Ашық жүрек» жобасы – колледждерде еріктілер клубын құру, мүгедектер, жалғыз басты қарттар, үйсіздерге көмек көрсету мақсатында еріктілер базасын құрудан тұрады. Бұл бағытта Жастар ісі жөніндегі комитет жанынан «Мейірім акселераторы» еріктілер клубы құрылып, қазірде өз жұмысын істеп келеді. Еріктілердің бастамасымен қайырымдылық жәрмеңкесі, тазалық жұмыстары, волонтерлерге арналған тренингтер, жатақхана кештері, әлеуметтік аз қамтылған отбасыларға қайырымдылық себеттерін тарату, қарттар үйіне концерт, көмектер секілді бірнеше жұмыстар ұйымдастырылып келеді. Ерекше айта кеткен жөн, еріктілердің бастамасымен «Сәуір айын – мейірім айы» етіп жариялап отырмыз. Ай ашылуы “Әлемді мейірім құтқарады” тақырыбындағы қайырымдылық жәрмеңкесімен басталды. Жастар қолдан ас әзірлеп сатты, түскен қаражат та жақсы. Мейірім айы аясында “Біз де перваш болғанбыз” комедиялық қойылымы көрерменге жол тартты. Екі сеансқа да билет апта жарым уақыт бұрын сатылып, зал толық болғаны туындының сәтті сомдалғаны болса керек. Одан қалды Ж.Шанин атындағы Шымкент қалалық театрының, Н.Бекежанов атындағы Қызылорда облыстық драма театрының, Жастар қалалық театрының ұжымы қатысып, оң баға бергені көңілге қуаныш сыйлайды. «Жақсылық жасап жарысайық» деп ұрандатқан жастар, ұстаздар мен білім алушыларға ауызашар бокстерін таратып, көпшілік сауабы мен батасын алды. “Қартым – қариям, ақыл – дариям” атты қарттар үйінің тұрғындарына арналған концерттік бағдарламасы да ізгілікке үндеген айда игі істің бірі болды. Балаша қуанған қария мен бабасын құрмет тұтқан жасты көріп қуанасың! Жатақхана тұрғындарына арналған ауызашар ас дайындалып, шараға 150-ден астам Рамазан айында ораза ұстаушы жас тартылды. “Мейірім — мәңгілік сәуле” тақырыбында фото көрмесі өтті. Атаулы бастамаға атсалысқан 10-нан аса әуесқой суретшінің туындылары көрме тақырыбын аша білді. Бұл келушілердің бағасы. Сондай-ақ, «Досыңа кітап сыйла» акциясы бастау алып, колледж ғимаратының ішіне жастардың кітап алмасуы үшін буккроссинг сөресі орналастырып, жұмыс істеп тұр. Қайырымды колледждің басшылығы өз қызметкерлерімен қашан да бірге. Ауыз бекіткен қызметкерлерге арнап 150 адамға ауызашар себеттерін әзірледі.
3. «50 табысты бизнес идеялар жобасы» – колледж студенттерін старт-ап жобаларға тарту, кәсіпкерлік білім беру бағыттарынан тұрады. Бұл бағытта колледжімізде «Мәншүк стартап бизнес» кәсіпкерлік клубы құрылып, осы кезге дейін Атамекен ҰКП жанындағы Іскер әйелдер кеңесінің төрайымы, бизнес-коуч Анна Нұрланқызымен, “Мансап” мектебінің негізін құрушы, директоры, бизнес-тренер Наталья Валентиновнамен, «Бітім» медиация орталығының аға психологы, коуч-тренер, бизнес-тренер Назира Кенжебекқызымен, жеке кәсіпкер Анар Қожаниязовамен, бизнес–тренер Асия Кирбаевамен, жеке кәсіпкер, интернет-продюсер, маркетолог Ақгүл Абдрасулмен шеберлік сағаттарын, оқыту, кәсіпкерлермен еркін форматта кездесу, интеллектуалдық қасиеттерді арттыратын сайыстар ұйымдастырылды. Клуб мүшелері ҚР Тәуелсіздігінің 30 жылдығына арналған «Мен кәсіпкермін» республикалық гранд турнирінде 3-орын иеленіп, Білім және ғылым вице-министрінің грамотасымен марапатталды. Болашақта өзі педагог, өзі кәсіп иесі болған мамандарды қабырғамыздан түлете алсақ, бұл бағытты толық жүзеге асырған болар едік. Бизнес идеялардың да басты мақсаты осы.
4. «Көшбасшы» жобасы – дебат және КВН жастар қозғалыстарын жастар арасында насихаттауға бағытталған жоба. Атаулы бағыт бойынша Жастар ісі жөніндегі комитет жанынан «Шаңырақ» дебат клубы және «Мәншүк.кз» жайдарман клубы жұмыс істейді. Шаңырақ дебат клубында қазақ тілді студенттер лигасы және төрешілер мен жаттықтырушылар лигасы клубтың қызметінің жандануы үшін еңбек етеді. Пікір-сайысшыларымыз облыс көлемінде жүлдегер атанып, «Үздік төреші», «Үздік ойыншы» номинацияларымен үздіктер көшін бастап келеді. КВН бағыты бойынша өңірлік «Супер лигада», республикалық «Ашық лигада» «Мәншүк құрамасы» квн командасы колледж намысын қорғайды. Наурыз айында колледжішілік «Көңілді көктем – 2022» жайдарман ойындарынан Мәншүк кубогі жоғары деңгейде ұйымдастырылды. Командамыз ақжолтай жаңалықтарымен әзіл сүйер көрермендерін қуантып келеді. Қазіргі уақытта «Мәншүк құрамасы» өңірлік лиганың ақтық мәресіне жолдама алса, сәуір айында техникалық және кәсіптік білім беру ұйымдарының арасында ойнатылған «Бірлік кубогін» жеңіп алды. Сондай-ақ, республикалық «Ашық лига» ойындарына қызу дайындық үстінде.
5. «Жас сарбаз» жобасы – колледждерде «Жас сарбаз» мамандандырылған топтарды құруды көздейтін жоба. Бұл бойынша Ондасын Ембергеновтің жетекшілігімен әскери-патриоттық клуб жұмыс істейді. Қазірге дейін клуб сапындағы жас сарбаздар бойында елжандылық, отансүйгіштік қасиеттерін арттыру үшін түрлі деңгейдегі жобалар жасалған. Ерекше айта кету керек, клуб мүшелерінің қатысуымен жыл сайынғы дәстүрлік Мәншүк қыздар маршы өткізіледі. Өңіріміздегі көршілес оқу орындарында ғана емес, республика аумағындағы барлық білім мекемелерінде баламасыз жоба деп білемін.
6. «Sanaly urpaq» жобасы – колледждерде «Sanaly urpaq» клубын құру, студенттерді парасаттылыққа насихаттайтын шаралар өткізуді көздейді. Бұл бағыт бойынша колледжімізде клуб құрылған, 2021 жыл бойынша Қызылорда облысының клубтары арасында «Ең үздік клуб» атанды. Ұйым жетекшісі Ақжайық Бақытбек «Ең үздік белсенді» номинациясымен марапатталды. Қазірде клубтың «Адалдық әлеуметтік дүкені», «Таза сессия», «Сыбайлас жемқорлықсыз болашақ» атты жобалары жемісті жұмыс істеп тұр деп толық айта аламыз.
Сөз соңында барлық жастардың атынан сүйікті білім ордамыздың 90 жылдық мерейтойымен құттықтаймын. Бұл күнге дейін білімнің биігінде келген колледжіміз абыройынан аласармай, дамудың даңғылында қарқындай түссе деген тәтті тілегіміз бар және сол жолда өзіндік үлесімді қосқым келеді. Колледж қабырғасынан ел-халқының қызметін қылып жүрген қаншама мамандар түлеген оқу орнының болашағы жарқын болсын деймін.
Шернияз ЖАЛҒАСБЕКҰЛЫ,
Жастар ісі жөніндегі комитет төрағасы
Ұлылар дәстүрін ұлықтаған, ғасырға жуық тарихы бар оқу орнымызда озық ойлы, сергек көңілді білім алушыларымыздың жаңа деңгейге өтуіне тілектеспіз. Сонымен қатар, осы мерекемізге тұспа-тұс келіп отырған қазақтың батыр қызы, қайсарлық пен өр рухтың символына айналған Мәншүк Мәметованың 100 жылдығымен «Jas Otan» ұйымының атынан құттықтаймыз! Жастар комитеті жанынан құрылған колледжіміздегі “Jas Otan” ұйымында мен 2021 жылдан бастап жұмыс жасап, “Тұғыры биік Тәуелсіздік” атты TedX форматында ақын Айтбай Мөлдірмен жастар арасында кездесу ұйымдастырып, 8 наурыз халықаралық әйелдер күніне қала тұрғындарын құттықтауға шықтық. Сонымен қатар 15 сәуір – Қозы Көрпеш Баян сұлу күніне поэзиялық кеш ұйымдастырылды. “Jas Otan” ұйымы колледж ішінде ғана жұмыс істемей, облыстық деңгейде қызметтер атқаруда. Осы жасалып жатқан жұмыстар колледждің атын биіктетіп, бізден кейінгі буындарға рухани азық пен тәрбиенің озық үлгісі боларына сенім мол.
Айнұр ЖҰМАҒАЛИ,
JAS OTAN ЖҚ бөлімше төрағасы
Биыл Шығыстың шоқжұлдызы деп бағаланған, есімі ел есінде мәңгі сақталатын мизам шуағымыз – Мәншүк Мәметованың 100 жылдығы. Сонымен қатар, қазақ білімінің қара шаңырағына айналған оқу орнымыздың 90 жыл мерейтойын атап өтпекшіміз. Қос қуанышымыз колледж студенттері мен ұстаздар, барша колледжге еңбегін сіңіріп жүрген жандардың мерейін үстем етпек. Оқу орнымыздың жаны нәзік болса да сұрапыл соғыс жылдарында сайдың тасындай сарбаздардан кем түспей, қайтпас қайсар қайратымен қан майданда ерлік көрсеткен қазақтың батыр қыздарының бірі Мәншүк апамыздың атымен аталғаны біз үшін үлкен абырой! Біз – Мәншүк жастары тарихы тереңге бойлаған, өңірімізде ойып тұрып орын алатын оқу орнының білім алушылары екендігімізді мақтан тұтамыз. Өз кезегінде ерлікті ту еткен Мәншүк апамыздай батыл қыздың жолын қуған аруларымыз көп болғай деген ізгі ниет білдіре отырып, барша ұжым мен студенттерді елеулі күнмен шын жүректен құттықтаймын!
Гүлназ СЕРІК,
Студенттік Парламент төрағасы
Құрметті колледж ұстаздары мен студенттері! Отандық жоғары білім беру жүйесінде өзіндік орны бар іргелі оқу ордасы М.Мәметова атындағы Қызылорда педагогикалық жоғары колледждің 90 жылдық мерейтойымен сіздерді шын жүректен құттықтаймыз! 90-жыл әрбір оқу орны үшін мерейлі мезет, ал М.Мәметова атындағы колледж үшін бұл жоғары сапалы білім беру, білікті және атақты тұлғалардың тәрбиеленіп шығуы, сонымен қатар мемлекеттік деңгейде қадірінің артуымен белгіленген тарихи кезең. Осындай мерекелік сәтте ең бірінші білікті мамандар даярлауға атсалысып келе жатқан білім ордасының барша ұстаздарына ілтипатымызды білдіреміз. Айтулы мерейтойларыңыз баянды болсын! Колледж қабырғасындағы жетістіктеріңіз бен алар асуларыңыз көп болсын. Колледж ұжымына толағай табыстар тілейміз.
Еркемай БЕКЗАДАҚЫЗЫ,
Қазақстан студенттер Альянсының бөлімше төрағасы
