Бүгінгі ғылыми-техникалық прогрестің қарыштап өскеніне ілесе дамып келе жатқан жаһандану заманында адамзаттың лайықты өсіп жетілуі білім беруге тікелей байланысты. Ғылым негіздерін меңгеруде білімді əлемдік стандартқа жақындату, оқытудың мазмұны мен əдістерін жаңарту арқылы білім сапасын көтеру мемлекеттік мəселе болып отыр.
«Халық бірлігі және жүйелі реформалар – ел негізі» тақырыбындағы Жолдауында президентіміз Қ.К.Тоқаевтың: «…Еліміздің білім беру және ғылым саласының алдында кезек күттірмес ауқымды міндет тұр. Бұл – уақыт талабына сай болумен қатар, әрқашан бір адым алда жүріп, тың жаңалықтар ұсына білу деген сөз»,- деп қорытқан пікірі арқылы білім беру саласына баса назар аударып отырғанын байқатады.
Осы талап үдесінен шыға біліп, жаңа заманның ізденімпаз жаңашыл мамандарын даярлауда Мәншүк Мәметова атындағы Қызылорда педагогикалық жоғары колледжінде барлық мүмкіндіктер қарастырылғандығын атап өтуге болады.
Колледждің 90 жылдық, оқу орнына есімі берілген Кеңес Одағының батыр қызы Мәншүк Мәметованың 100 жылдық мерейтойына орай колледж ұжымы ауқымды шаралар ұйымдастырып, республика көлемінде атап өткелі отыр. Іргелі білім ордасы батыр қыздың есімі берілген 70 жылда жетістіктер биігінен танылып, мәртебелі атауын абыроймен иеленіп келеді.
Осындай айтулы мерейтойларда киелі білім ордасының осы күнге дейінгі жеткен белестері мен шыққан биіктерінің жолына зер сала қарасақ, ерен еңбек пен тыңғылықты ізденістің нәтижесін көреміз. Ел болашағы білімді жастардың қолында екенін ескере отырып, кәсіби құзыретті, заман талабына сай функционалдық сауаттылығы жоғары жас мамандарды дайындап шығаруда жоғары жауапкершілік жүктеліп отыр.
Оқу-тәрбие жұмысын басқару, оқытушыларды әдістемелік жоғары мәдени рухта бағдарлау, өз еңбегінің сапасы мен нәтижесіне талап қоя білу, оқыту тәжірибесінде ұтымды, тиімді әдістерді шығармашылықпен игеру, білім алушылардың ғылыми-танымдық, ойлау қызметін жандандырып, терең, берік білімді болуына ықпал жасау, іскерлік пен дағдыны қалыптастыру – оқытушылар басты бағыт етіп ұстанған әдістемелік жұмыстың басты мақсаттары. Оқытушылар құрамы білім беру саласындағы жаңалықтарды меңгеріп, өзгерістерді білу және инновациялық тәжірибелерді меңгеру мақсатында үнемі білім жетілдіріп отырады.
Қазіргі таңда кәсіби білім мазмұнын арттыру үшін біліктілікті үздіксіз жетілдіруге үлкен мән берілуде. Колледжде оқытушылардың ғылыми-ізденіс жұмыстарына және біліктілігін көтеруіне үлкен назар аударылады, өйткені заман талабы оқытушының білімді де білікті болуын, бір емес бірнеше технологияны кіріктіріп меңгеруін қажет етеді. Колледж оқытушыларының халықаралық, республикалық ғылыми-практикалық конференцияларға қатысу деңгейі де жыл сайын артып келеді.
Колледж оқытушыларының құрамында «Ы.Алтынсарин» төсбелгі иегерлері 13, «Білім беру ісінің құрметті қызметкері» төсбелгісінің иегерлері 10 болса, Білім және ғылым министрлігінің Құрмет грамотасын 12, Алғыс хатын 9 оқытушы алған.
Оқу орнының әлеуметтік серіктестермен тығыз байланыста жұмыс жасауы арқылы болашақ мамандық иелерінің кәсіби біліктілігінің арта түсуіне қол жеткізіп отырмыз. Білікті маман даярлауда өндірістегі өткізген тәжірибе жинақтау барысының маңыздылығы зор.
Колледждің дуалдық білім беру жобасын қолдану тәжірибесі базалық мекемелер тарапынан оң баға алуда. Колледж студенттері нақты жұмыс дағдыларына, ұжымда жұмыс жасау білігіне ие болуға, әлеуметтік құзыреттілігінің қалыптасуына, таңдаған мамандығының қыр-сырын тікелей жұмыс орнында танып, психологиялық және кәсіби бейімделуден өтуге мүмкіндік алады.
Дуалдық оқыту технологиясы бойынша білім беру білім алушылардың кәсіби біліктері мен дағдыларды, іскерліктерді тікелей жұмыс орнында меңгеріп, жан-жақты кәсіби дамуына мүмкіндік беріп, түрлі жүйелердің – білім, ғылым, өндірістің өзара байланысын, әсерін, кірігуін қамтамасыз ету арқылы кәсіптік білім беру жүйесінің сапасын арттыратындығы сөзсіз.
Колледжде 13 мамандық және 23 біліктілік бойынша білім алушылар жақсы нәтижелерге қол жеткізіп, биіктерден танылып жүр.
Студенттердің кәсіби құзыреттілігін саралап, бағалайтын «WorldSkillsKazakhstan» ұлттық чемпионатында «Мектепке дейінгі тәрбие және оқыту» мамандығының студенті А.Сарманова жүлделі ІІ орын алып, күміс медаль иеленді. Биылғы жылы да осы мамандықтың 3-курс студенті К.Сақтапберген аймақтық байқаудың жеңімпазы атанып, республикалық ұлттық чемпионатынан ІІ орын иеленіп, күміс медальмен қуантты. Республикалық ұлттық чемпионатқа «Бастауыш сыныптарды оқыту» құзыреттілігі бойынша Ақселеу Арленкеева қатысып, «Үздік маман» медалімен марапатталды.
Білімді ұрпақтың спортқа бейім болуы да жақсылық белгісі. Оқу орнында 25 студент – ҚР спорт шебері болса, 64 студент спорт шеберлігіне кандидат атанып отыр. Осы күнге дейінгі әлем, халықаралық деңгейлердегі чемпиондар қатарын биылғы жылы «Дене тәрбиесі және спорт» бөлімінің студенті Нұрсұлтан Алтынбек бокстан жастар арасында өткен Азия чемпионатынан алтын медаль алып толықтырды.
Жан-жақты өнерімен танылып жүрген «Нұргүл» халық ән-би ансамблі мен «Япурай» хоры қазақ өнерін халықаралық және республикалық деңгейде дәріптеп жүрген шығармашыл ұжым. «Өнер» бөлімінің оқытушылары мен студенттерінің тынбас еңбектерінің нәтижесінде ансамбль өнерпаздарының елімізге танымалдығымен мақтануға болады.
Оқу орнымызда мақтан етер жастарымыз аз емес. Бірнеше жыл қатарынан «Қазақстан Республикасы колледждерінің ТОП 100 студенті» жобасының жеңімпазы атанған Әлия Тоқмырза, Ақбота Тұрсынбай, Досбол Нұрылла, Айзат Сламбекова, Бекзат Ешмұратов, Бексұлтан Санақұлды атап өтуге болады. Осы орайда айта кететін жайт, «Қазақ тілі мен әдебиеті» бөлімінің студенті Бексұлтан Санақұлдың ақындық қадамына демеу білдіріп, «Поэзия – сезім патшасы» атты тұңғыш жыр жинағын колледж әкімшілігі қолдау көрсетіп шығарып берді.
Жыл сайын колледж түлектерінің ЖОО түсуі мен жұмысқа орналасу пайызы артуда.
Үш ғимараттан тұратын оқу орнының материалдық-техникалық базасы жоғары талғаммен, уақыт талабына сай ерекше дизайнерлік үлгілерде жабдықталып, жаңартылды.
Электронды оқу залы мен кітапхана, дыбыс жазу және фото-видео студиялары, «Робототехника», «Цифрлы 3D», «Цифрлық білім беру», «Мектеп физикасының цифрлық зертханасы», «IT hub», «Дуалды оқыту алаңы», «Педагогикалық мамандықтар бойынша құзыреттілік орталығы», «Дуалды оқыту алаңы», «Студенттерге электрондық қызмет көрсету», «Coworking»орталықтары, «Технология» шеберханасы, «Схематехника», «Электроника және электротехника» кабинеттері бар. Колледждің осы кезге дейінгі тыныс-тіршілігі, жетістіктер қоры колледж мұражайында заманауи үлгіде жаңартылып жабдықталды. «Білім нұры» педагогикалық сабақтастық галереясы — колледж оқытушыларының ізденіс пен саралау жұмыстарының нәтижесі. Жыл сайын оқу орнының материалдық-техникалық базасы компьютерлермен, заманауи техникалармен толықтырылып отыр.
Бүгінгі күнде оқу процесінде 372 компьютер қолданылып отыр, бұл білім алушылар санына шаққанда бір компьютерге 5 студенттен келетінін көрсетеді. Барлық оқу ғимараттарында соңғы үлгідегі интерактивті тақталар мен панельдер, мультимедиалық сандық подиум, «BILIMBOOK» жеке мультимедиалық компьютерлері оқу үдерісінде тиімді қолданылып жүр. Колледждегі студенттер жатақханасы мен асхана, М.Мәметова атындағы әскери-спорттық кешені, КАБИС бағдарламасымен жұмыс жүргізетін оқу залы, жаңа заман талабына сай жабдықталған мәжіліс залы, спорт залы және би залдары екі ауысымда білім алушылар игілігіне қызмет етеді.
Колледждегі кітап қоры 4031 данадан 133535 данаға артуын да үлкен мақтанышпен айтуға болады.
Жастарға сабақ үдерісінде кәсіби білім беріп қоймай, олардың интеллектуалды-үйлесімді болып қалыптасуы мен білімді өз бетінше зерделеуін, технологиялар мен инновациялардағы жаңалықтарды жүзеге асыра білу бейімділігін қалыптастыру мақсатында еңбектенетін ұжым еңбегі нәтижесіз емес. Колледж әкімшілігінің жұмысты шебер ұйымдастыруының нәтижесінде оқу орны 2021 жылдың қорытындысы бойынша «Үздік идеялар жаршысы» марапатына ие болды.
Еліміздегі ертеңгі тізгін ұстар, Отанын ғаламдық дамудың көшінен қалдырмай өрге шығарар азамат тәрбиелеу ұстаздарға жүктелген аса маңызды да жауапты міндет. Жеткен жетістіктермен мақтана отырып, болашақтағы атқарылар жұмыстарды көрегендікпен жоспарлап, ұтымды әрекет етуіміз керек. Жаңаша өрлеуіне негізі бар ұжым әр оқу жылында болашақ мамандарды заманауи бағытта дайындаудағы мол мүмкіндіктерді тиімді қолданып, алдағы уақытта да жоғары деңгейде көріне береді.
Жақсыгүл Қоханқызы ТОҒАНОВА,
М.Мәметова атындағы Қызылорда педагогикалық
жоғары колледжінің директоры
