ҚР Ғылым және жоғары білім министрі Саясат Нұрбек алдағы уақытта қандай мамандықтар сұранысқа ие болатынын айтып берді. Министрдің сөзінше, ел экономикасын дамыту үшін мықты инженерлік кадрлар тәрбиеленуі керек.
Қазақстандағы инженерлік кадрлар Қ.И.Сәтбаев атындағы ҚазҰТЗУ, академик Әбілқас Сағынов атындағы ҚарТУ, Ш.Есенов атындағы Каспий технология және инжиниринг университеті, Қарағанды индустриалды университеті, Ғ.Дәукеев атындағы Алматы энергетика және байланыс университеті, Д.Серікбаев атындағы Шығыс Қазақстан техникалық университеті сияқты техникалық жоғары оқу орындарында дайындалатыны баршаға мәлім.
«Техниктер» аграрлық, энергетикалық, металлургия, құрылыс, машина жасау және т.б. көптеген салаларда сұранысқа ие. Қазір министрлік техникалық мамандарға білім беру тәсілін стратегиялық өзгерту бойынша жұмыс жүргізіп жатыр, сондай-ақ шетелдік жоғары оқу орындарының тәжірибесін зерделеп, жоғары оқу орындарының базасын жақсартып, бейімдеуге күш біріктіріп отыр.
Мысалы, аймақтық Д.Серікбаев атындағы ШҚТУ-да өткен жылдың соңында Тяньцзинь кәсіптік институтымен (ҚХР) бірлесіп, заманауи оқу платформаларында инженерлік практиканы қолдана отырып, инновациялық әдістер бойынша көлік инженер-студенттер оқытылатын бірегей Лу Бань шеберханасы ашылды. Шетелдік серіктес жоғары оқу орындарымен бірлескен жұмыс отандық жоғары оқу орындарының кәсібилігі мен жоғары білім деңгейін көрсетеді»,- дейді Саясат Нұрбек.
Биыл ШҚТУ базасында металлургия және пайдалы қазбаларды өндіру саласындағы Қазақстан-Германия ғылым және технологиялар институтын ашу жоспарда бар екен. Сондықтан министр мектеп түлектері мен ата-аналарды мамандық таңдағанда техникалық мамандықтарға назар аударып, беделі күннен күнге артып келе жатқан техник мамандарға назар салуын сұрады.
Н.Естемес
