Білім беру жүйесінің жоғары деңгейде болуы – педагогтардың озық, шәкірттердің білімді болуының кепілі. Қызылорда қаласындағы Т.Есетов атындағы №264 мектеп-лицейінде жағымды жаңалықтардың көп болуы осы қағиданың іске асуынан болса керек. Бірде ұстаздары жетістікке жетіп жатса, бірде оқушылардың түрлі сайыстардан жүлделі оралып, қуаныштарымен бөліседі. Білім ордасының директоры Бек Тумурзаев оқушылардың терең білім алуы жолында тынымсыз еңбек сіңіріп келеді. Соның бірі Жапон Үкіметінің Жапон елшілігі арқылы ұйымдастырған «Шөп тамыры» гранттық жобасынан балалар үшін автобустың ұтып алғаны.
Сәуірдің бірінде мектеп-лицейде гранттық жобадан ұтып алған автобустың лентасы кесіліп, оқушыларға пайдалануға берілді. Шараға Қызылорда қаласы бойынша білім бөлімінің басшысы Ерлан Теңізбайұлы мен қалалық кәсіподақ төрайымы Орынша Міржақыпқызы қатысып, жылы лебіздерін жеткізді. Қуанышты хабарды мектеп-лицейдің педагогтері, ата-аналар мен оқушылар бірге тамашалады.
Шараның екінші кезеңінде білім ордасына көрік беру негізінде «Мектебіңе бір тал сыйла» акциясы аясында мектеп-лицейдің ауласына көшеттер мен гүлдер отырғызылды. Аталған акцияға мектеп директоры Бек Сұлтанбекұлынан бастап ұстаздар мен ата-аналар қатысты. Акция барысында «Есетов саябағы» ашылып, саябаққа терек, жеміс ағаштары отырғызылды. Барлығы 1500 ағаш көшеттелді. Игі шараға ерекше білім беруді қажет ететін оқушылардың ата-аналары да қатысты. Көшеттер отырғызылып, абаттандыру жұмыстары мектепті көгалдандыру мақсатында жүргізілді.
Расында, «бір тал кессең, он тал ек» деген ұстанымға сай, қаламыздың әрбір тұрғыны өздері мекен еткен жердің әдемі боп көкпен көмкеріліп, жайқалып тұруына атсалысқаны жөн. Байқасаңыз, мектеп ғимаратына көрік беретін мектеп ауласына түрлі ағаштардың егілгенінде үлкен мән жатыр. Оқушылардың таза ауамен тыныстап, шығармашыл оқушылардың табиғатпен байланысын нығайтатын жасыл желекті мектепке айналды. №264 мектеп-лицейдің бұл бастамасы басқа да білім ошақтарына үлгі болары сөзсіз.
Қазақбай ӘНДЕШҰЛЫ
