Сыр өңірінде ауылдық тұрғындардың жағдайын жақсарту назардан түскен емес. Алыс шалғайдағы ауылдан бастап қалаға жақын елді мекендерді толық жағдаймен қамтамасыз ету мемлекеттің басты міндеттерінің біріне айналды. Мал шаруашылығымен, егіншілікпен айналысатын ауыл тұрғындарының әл-ауқатын көтеру үшін түрлі жұмыстар атқарылуда. Көгілдір отынмен қамтамасыз ету мәселесі облысымызда оң шешімін табу үстінде. Қазіргі таңда Сыр аумағындағы ауылдық жерлерге газ құбырларын тарту жұмыстары тоқтаусыз атқарылуда. Ауылдардың жағдайы жылдан-жылға көтеріліп, даму жолында келе жатыр. Жергілікті биліктің атқарып жатқан жұмыстарының арқасында көгілдір отынмен қамтамасыз ету жұмыстары Ақсуат ауылдық округінде де жасалып бітті. Облыс әкімі Нұрлыбек Нәлібаев шараға қатысып, ауыл тұрғындарын құттықтады.
— Мемлекет басшысы Қасым-Жомарт Кемелұлы: «Аса маңызды мәселелердің бірі – ауылды кешенді түрде дамыту. Ауылдарға нақты қолдау көрсетіп, заманауи инфрақұрылымды дамытуымыз керек» деген болатын. Өткен жылы 14 газдандыру жобасын жүзеге асыруға 8,7 млрд. теңге бөлініп, нәтижесінде 6 ауылды газға қостық. Осылайша өңірдің газдандыру деңгейі 70 пайызға жетті. Биылға республикалық бюджеттен 7,4 млрд. теңге бөлініп, 2022 жылы басталған 7 жоба жалғастырылады. Оған қоса 12 жаңа жобаның құрылысы басталады. Оның ішінде, Қосшыңырау ауылдық округінің Абай, Досан елді мекендеріне де газ жеткізу жобалары бар. Демеушілердің қаржы көздерінен 100 млн. теңгеге Сабалақ саяжайына табиғи газ желісін тартудың жоба-сметалық құжаттары әзірленуде,- деді аймақ басшысы.
Қоғам қайраткері Айтбай Көшербаев пен ауыл ақсақалы, қоғамдық кеңес төрағасы Өмірсерік Әбуов ауыл тұрғындарына тілегін білдіріп, құттықтады. Шараға жиналған қонақтар зейнеткер Сейітқасым Тәуірбаевтың үйіне табиғи газ қосу сәтіне куә болып, тамашалады.
Аймақ басшысы содан кейін Ақсуат ауылдық округі тұрғындарымен кездесіп, көкейде жүрген сұрақтарға жауап берді. Ауылдық округті газдандыруға республикалық және жергілікті бюджет тарапынан 4,9 млрд. теңге бөлініпті. Жауапты мердігер мекеме «Алия Сервис» ЖШС.
«Ауыл – ел бесігі» жобасы аясында Ақсуаттың инфрақұрылымын дамыту үшін жұмыстар атқару үстінде. Қазірдің өзінде 79,9 млн. теңгеге 3 көшеге орташа жол жөндеу жұмыстары жүргізілуде. Ұлттық қорда 5 көшеге орташа жол жөндеу жұмыстары үшін 350,9 млн. теңге қарастырылуда. 32 көшеге жаңа қоныстанушылар үшін электр желілерін жүргізу үшін жоба-сметалық құжаттар әзірленіп, республикалық бюджетке 1 млрд. теңге бөлу жөнінде өтінім ұсынылды. Осы сапарында «Бәйтерек» тұрғын ауданындағы су жинағыш құрылғының жұмысымен облыс әкімі танысты. 2022 жылдың тамыз айында басталған құрылыс биыл сәуір айында аяқталған болатын. Мұнда тереңдігі 440 м 7 ұңғыма мен 3 резервуар бар. Құрылғы қуаттылығы 7200 м3 құрайды. Аймақ басшысы шағын аудан тұрғындарымен де кездесті.
Аймақ басшысы жоспарда облыстың басқа ауылдарына да көгілдір отын жұмыстарын жасау көзделіп отырғанын жеткізді. Республикалық, облыстық бюджеттің ықпалымен Сыр шаһары ауылдарының жағдайын жақсарту жұмыстары жалғасын таппақ. Қысқы уақытта көмірмен арпалысатын ауылдың саны тағы бір ауылға қысқарды. Ақсуат елді мекеніндегі қуанышты хабар тұрғындар үшін маңызды мәселенің шешімін тапқандай. Қаладан жырақ орналасып, өз тіршілігін күйттеп отырған ауылдарға көңіл бөлу және ауылдардың жағдайын толық жасап, дамыған елдердің қатарына кіре алатын қуатты мемлекет қалыптастыру еліміздің негізгі жоспары екенін айтқан облыс әкіміне тұрғындар ризашылығын білдірді.
Қазақбай ӘНДЕШ
