Биыл «Ұстаз мәртебесі» газеті мектеп оқушыларының шығармашылығына қолдау көрсету мақсатында «Кәусар» атты жаңа жобаның тұсауын қаңтар айының соңғы жұмасында Т.Есетов атындағы №264 мектеп-лицейінде кескен болатын. Сол кезде жиналған оқушыларға редакцияға да келіп, шығармашылық байланыс орнатуды айтқанбыз. Және оқушылардың ұсыныстарына да құлақ тостық. Жастарда негізі идея көп. Оларды тек тыңдай білуіміз керек. Сол кездесуде оқушылар өлеңдері мен эсселерін оқыды. Жобада тек поэзия мен проза емес, мәнерлеп оқу мен журналистикаға қатысты мақалалар жазып, жөн сілтеп, бағыт-бағдар беруімізді сұрады. Біз құп көрдік.
Кездесу өз нәтижесін бере бастады. Өткен жұмада редакциямызға бір топ оқушы келді. Келе жатқандарын алдын ала айтқаннан кейін біз де қарап отырмай, Сыр өңірі журналисткасына қатысты көрме жасадық. Көрмеге 25 жыл бұрынғы журналистер тұтынған заттар мен кітаптар, газеттер, журналдарды қойдық.
Редакцияға келген Абылай хан атындағы №140 қазақ орта мектебінің 9-сынып оқушылары Камила Есет, Аружан Ахметова, Айназым Жұмаділ, Алина Қуантхан өз өлеңдерін бізге оқып берді. Ақын, газеттің жауапты хатшысы Айдар Сайлауов әр өлеңге жеке тоқталып, өлеңнің құрылысы мен мағынасына, ойы мен түйініне байланысты пікірін білдірді. Артынша өзі де өлең оқып, шабыт сыйлады. Содан соң оқушылар бізге қызықты сұрақтар қойып, журналистиканың, ақындық өнердің қыр-сырына қанықты. Еркін пікірлесіп, арасында әзілдесіп те алды. «Ұстаз мәртебесі» газеті мен «Әлімсақ» журналын алып, оқырман болатынын жеткізді. Осылайша оқушылар редакцияның тыныс-тіршілігімен танысып, шабыттанып қайтты.
З.Қонысжан
