Қазақтың тарихында киелі отбасының қасиетті ұрпақтары туралы, олардың ел өміріндегі алатын орны, сіңірген еңбегі, қалдырған рухани байлығы, үлгі боларлық тірліктері, өнегелі өмірлері туралы мысалдар көп. Уақытында бізге бай, феодал ретінде оқытылған Құнанбайдың өзі тегін адам болмағандығын еліміз егемендікке жеткенде ғана білдік. Кішкене артық сөйлеп кетіп: «Мен сізден оздым әке, мені бүкіл қазақ таниды» деген Абайға: «Е, Абай, сен менен оздым деуің үшін әуелі мен құсап өзің сияқты ұл тудырып ал» деген сөзі ұрпақтан-ұрпаққа жалғасатын өнегелі сөз емес пе? Осы қасиетті де қастерлі отбасы деген ұғым мерейге ұласып, үлгілі шаңырақтар насихатталып келеді.
Қазалыда «Мерейлі отбасы» ұлттық байқауының аудандық іріктеу кезеңі өтіп, үздіктер анықталды. Ұлттық байқаудың аудандық кезеңінде жеңімпаз атанған отбасыларды аудан әкімі Мұхтар Оразбаев құттықтап, жылы лебізін білдірді.
Роза Бағланова атындағы мәдениет орталығында өткен салтанатты шарада Мұхтар Әуесұлы байқауға қатысқан отбасыларды түрлі номинациялармен марапаттап, сый-сияпат табыстады.
Қазалы ауданы бойынша іріктеу кезеңінің қорытындысы бойынша бас жүлдені жеңіп алған Сүлейменовтер отбасы мен бірінші орын иегері Ықыласовтар отбасы Қызылорда қаласында өтетін облыстық байқауға қатысуға жолдама алды. Салтанатты шарада байқауға қатысқан өнерлі отбасылар әннен шашу шашып, көпшілікке көтеріңкі көңіл күй сыйлады.
Қазалылықтар сахна төріне көтерілген белгілі айтыскер ақын, елімізге танымал сазгер, әнші Шынберген Сүлейменовке ерекше қолдау білдіріп, қошемет көрсетті. Облыстық, кезеңге жолдама алған отбасыға сәттілік тілейміз. Айта кетейік, өнегелі құндылықтарды жаңғыртуға және отбасы мәртебесін арттыруға бағытталған «Мерейлі отбасы» ұлттық конкурсы жыл сайын ұйымдастырылып отырады. Биылғы жылы Қазалы ауданы бойынша байқауға 18 отбасы өтінім беріп, комиссия отырысында қаралған.
«Ұстаз-ақпарат»
