Арынды ақындар қызылордаға жыр арнады
«Сырдария Қызылорда жеріне жеткенде жыр-дария болып ағады». Сыр ақындары бұл сөздің сүйектілігін әлі күнге дәлелдеп келе жатыр.
Иә, нендей заманда, қандай қоғамда болсын, адамның алдында тұрған зор міндеттердің бірі – болашақ ұлағатты етіп ұрпағын тәрбиелеу. Жан-жақты жетілген, ақыл парасаты мен мәдениеті мол, саналы ұрпақ тәрбиелеуде әр халықтың салт-дәстүрі мен әдебиеті, өнеріндегі бағалы байлықтың нәрін біртіндеп сіңіру арқылы ғана жүзеге асыруға болады. Басқа халықтар сияқты қазақ елінің де ұрпақ тәрбиелеуде мол тәжірибесі, жиған-тергені, озық ойлары мен өзіндік ерекшеліктері жетерлік. Осындай мол мұраның «дәнегін мәпелеп екпейінше» жастарды ізгілік пен парасаттылыққа тәрбиелеу мүмкін емес.
Міне, осы ұғымды бағдаршам еткен шаһар төріндегі Қорқыт ата кешенінде орналасқан амфитеатр алаңында жыр мерекесі өтті. Қала күніне арналған кезекті тағылымды шарада жергілікті ақындар сұлу сөз мөлдір маржанын төгіп, сүйікті қаламыздың келбетін жырмен әдіптеп, өлеңмен өрнектей білді.
Аттары алты Алашқа белгілі ақындар Оңталап Нұрмаханов, Серік Ыдырысов, Қаршыға Есімсейітова, Қазына Өзденбаева, Елубай Әуезов, М.Байдәулетовтер бастаған жыр көшін Толқын Қабылша, Назгүл Бердіқожа, Мөлдір Айтбай, Ғабит Кәдірбаев, Ұлықбек Бекұзақұлы, Биболат Сәтжанов, Айдар Сайлауов сынды талантты жас ақындар шоғыры жалғастырып, Ақмешіт аспаны ән-жырға бөленді. Поэзия кешін Сыр елінің талантты жас ақыны Ақжол Түменбай жүргізіп, өлең сүйер көрерменге өзгеше жаңа леп сезіндірді.
Келелі кеш барысында сөз алған қала әкімі Асылбек Шаменов:
— Әлімсақтан «Сыр елі – жыр елі» деген айдар тағып, қаймағы бұзылмаған қазақ халқының қасиетті мекеніне айналған Сырдария жағалауындағы шырайлы шаһардың өткені мен бүгіні тарихта алтын әріптермен жазылып келеді, жазыла да бермек,- деп, ақындарға шексіз ризашылығын білдіре келе, ақындарға алғыс хат және естелік кәдесыйлар табыс етті. Жыр мерекесінде “Құрмет” орденінің иегері, жыршы Шолпан Бейімбетова, Үкітай Ерниязов, Әл-Фараби Бекарысұлы бастаған жергілікті өнерпаздар ән-жырдан шашу шашып, жиылған жұртшылық ерекше әсермен тарқасты.
Желегі көзді жаулаған, ауласы жанды баураған
«Адамның денсаулығы – қоғам байлығы» деп мың мәрте айтылған шығар. Бұл рас сөз. Әрбір адам өз денсаулығының мықты болу жолдарын қарастыру керек. Дені сау адамның көңіл-күйі көтеріңкі болып, еңбекке әрқашан құлшына кіріседі. Халқымыз «Дені саудың – жаны сау» деп орынды айтқан. Отанымыздың келешегі, көркеюі – салауатты өмір салтын сақтаумен тығыз байланысты. Қараңғы үйге кіріп келіп шам жақсаңыз, шам үйді жарық қылады. Көп қызыл гүлдің ішінен бір ақ гүл көрсең, көзің соған түседі. Біздің де өмірімізді жарық қылатын, жан-жағымызға тамаша сәулесін шашатын, өмірдегі басты байлық – денсаулық пен тазалық. Денсаулық – бұл адамның еңбекке белсенді болуы әрі ұзақ өмір сүруі, тәннің саулығын және рухани саулығын сезіну. Ал, денсаулық тазалық бар жерде ғана бар.
Осындай ұстаныммен қала күні мерекесі аясында шаһарды жасыл-желекке айналдыру бағытындағы жұмыстарға өз үлестерін аянбай қосып келе жатқан қала тұрғындарын ынталандыру мақсатында «Үздік аулалар» байқауын ұйымдастыру дәстүрге айналған.
Ауласын мұнтаздай таза ұстаған, аталған байқаудың жеңімпаздарын марапаттауға қала әкімінің орынбасары Ақзира Қасымова арнайы қатысып, аула бағбандарына қала әкімінің дипломын және қаржылай сыйақыларын табыстады.
Биыл бесінші мәрте өткізілген «Үздік аула» байқауына қатысуға 17 аула өтінім білдірді. Байқау үздіктерінің ішінен мүмкіндігі шектеулі жан екеніне қарамастан көгалдандыру ісін қолға алған «Сәулет» мөлтек ауданы №12 үйдің тұрғыны Нина Константиновнаның ауласы комиссия шешімімен басым дауысқа ие болып, жеңімпаз атанды. Ал ІІ орынды атасының бағбандық ісін жалғастырған Жаппасбай батыр көшесі №4 үйдің тұрғыны Сабина Сәбитқызы иемденсе, ІІІ орын көршілердің ауызбіршілігі үзілмеген «Ақмешіт» мөлтек ауданы №7 үй тұрғыны Мереке Серікболқызына, ІV орын зейнеттегі бос уақытын жұбайымен бірге көгалдандыру ісіне арнаған «Титов» шағын ауданы №30 үй тұрғыны Бисенбек Дүйсенбекұлына бұйырды.
— Көпқабатты тұрғын үй ауласын өз еңбектерімен жасыл-желекке айналдырып, сүйікті қаламыздың көгалдануына белсенді үлесін қосып жүрген барлық қатысушыларға алғысымызды білдіреміз, — деді А.Бақтыбайқызы.
Шара барысында Қызылорда қаласының тазалығын қамтамасыз етуде тынбай еңбек етіп жүрген тазалық қызметкерлері де марапатталып, қала әкімінің Алғысы мен қаржылай сыйақылары табысталды. Жеңімпаз атанған тұрғын үй ауласына «Үздік аула – 2022» тақтайшасы ілінді.
Сұлу Сырдың гауһар тәжі
Биыл қала күні мерекесі шаһарымызда түрлі бағыттағы шараларға ұласып, сұлу Сырдың гауһар тәжі – Қызылорда жарқын болашаққа жаңа қадам жасап, онысын ұлағат пен мазмұнға толы шаралармен атап өтіп жатыр.
Ашық аспан астындағы сахнада біздің жастық шағымыздың куәсі, ата-аналарымыз шырқаған, бүгінде жаңа буын, жас толқынның жүрегінен орын алған ретроәндер вокалды-аспапты ансамбльдердің орындауында шырқалды. Қала күніне арналған «Жастық шағымның куәсі – Қызылорда!» атты ретрофестивальге эстрада жұлдыздары келіп ән шырқап, қала тұрғындарын көтеріңкі көңіл күйге бөледі.
Тағылымды тақырыппен өткен облыстық ретро-фестивальде өнер көрсеткен «Мереке», «Сыр самалы», «Яксарт», «Экспресс», «Ритм», «Қазалы», «5 аймақ» секілді аймақтағы белді өнер ұжымдарының ерекше қойылымдары, ән шашулары, от шашулары кешке жиналғандарды тәнті етті.
Бұл кеш өткен шаққа саяхат. Шынайы махаббат пен іңкәр сезімге, достыққа, адалдық пен құрметке, туған жерге сүйіспеншілік пен адалдыққа толы уақыт жастардың жүрегінде. Осынау шақтан ұмытылмас естеліктер, әсем әндерін қала тұрғындары да «еркін микрофонға» келіп айтып, тіпті ән де шырқап берді. Иә, тарихтан сабақ алмай, өмірден де сабақ алу қиын. Сондықтан өлмес өнердің өрнегін жаққан кеш өз миссиясын толық орындап шықты.
Айдар САЙЛАУОВ
