Биыл халық батыры Жанқожа Нұрмұмедұлының туғанына 250 жыл. Осы айтулы датаға байланысты Қызылорда облысы батырдың рухын асқақтатып, ерлігін ұрпақ жадында жаңғырту үшін жоспар құрды. Шындығын айтайық, құрылған жоспардан көпшілік бейхабар. Екі ғасырдан астам уақыттан бері мойындалған қазақ батырына келгенде қазақ мемлекеті тарылып қалды. Бұған дейін Жанқожа батыр туралы кітаптардың авторы Молдахмет Қаназ билікке қарата Жанқожаның мерейтойын мемлекеттік деңгейде атап өту жөнінде мақала жазғанымен нәтиже болмады. Қызылордалық үлкендер үнсіздік танытты. Облыс ауданмен бірлесе екі шараны өткізуді мойнына алды. Облыстық бюджеттен Жанқожа батырдың 250 жылдығына орай «Халқының туған бағына, батыр баба Жанқожа» атты кешенді шаралар мен «Жанқожа батыр» дастанын орындаушылардың байқауын өткізуге қаржы сұралған. Өткізу уақытын қазан-қараша айларына белгілеген. Мерейтой Қазалы ауданында өтпек.
Негізі Қазалы ауданына бар салмақ артылмақ. Осы тұста Қазалы ауданының азаматтары қаржы жинап, басқаша айтқанда, халық батырын халықтың өзі көтеруге бел буған болатын. Бірақ оның арты шу болып, әлеуметтік желіде «ақша жиналып жатыр» деген мазмұнда жазба шықты.
Енді биылғы жоспарға келейік. Қазалы ауданының әкімдігі 1-10 маусым аралығында Жанқожа батырдың 250 жылдығына арналған деректі фильм түсірушілер фестивалін өткізу керек еді. Бүгін, міне, тамыздың бірі, екі ай уақыттан бері жоспар бойынша бекітілген шара өтпеді. Оның себебін сұрастырсақ, сорақы жайларға тап болдық. Шараға жауапты Қазалы ауданының әкімдігі болса да, біз сөйлескен аудан әкімінің орынбасары Дәурен Тілеуімбетов бұл жайдан хабарсыз болып шықты. Облыстық мәдениет басқармасы да бейхабар. Сөйтсек, бұл аудандық мәдениет және тілдерді дамыту бөлімінің ұсынғаны екен. Оны ешкім білмейді. Қандай мақсатта жоспарға енгізілгені түсініксіз. Осы орайда облыстық қоғамдық даму басқармасына хабарласқанымызда жауапты бөлім басшысы Ернұр Бихожаев шараның жоспарға енгізілгенімен орындалмағанын, соған байланысты аудандық мәдениет және тілдерді дамыту бөліміне қарасты Р.Бағланова атындағы аудандық мәдениет орталығының директоры Ғ.Дарамағамбеттің бөлім басшысы Б.Жолтаевқа жазған хатын ұсынды.
Хатта 1-10 маусым аралығында өткізу керек Жанқожа батырдың 250 жылдығына арналған деректі фильм түсірушілер фестивалі қаржылық мәселеге байланысты 2024 жылдың қыркүйек айының соңғы онкүндігіне өткізу жоспарланғаны жазылған.
Осыдан он жыл бұрын, батырдың 240 жылдығы Қызылордадан басталып, Қазалыда жалғасын тапқан еді. Сол кездегі облыс әкімі Қырымбек Көшербаев 250 жылдықты жоғары деңгейде атап өту үшін дайындықты бүгіннен бастау керектігін айтқан болатын. Қазір Қызылордада Көшербаевтың өзі жоқ, сөзі де ұмытылды. Ал, биылғы мерейтойда батырдың рухын көтеру бүгінгі қызылордалықтар мен билікке сын болғалы тұр.
Н.Нұрмаханов
