Сақтық – саулықтың кепілі

Әлем аймағын түгел жайлаған кесірлі кеселдің кедергісі көп-ақ. Енді ғана саябырсыды-ау деп сабырға келгенде, қайта өршуі көпшілікті құлазытып жіберді. Еңкейген кәріден, еңбектеген балаға дейін есеңгіретіп, жалмап жатқан дерттің дауасы – екпеге егілу боп тұр. Тәжді вирус табалдырықтан аттағалы бері сақтықтықтың маңызды екені айтылып келеді. Яғни, арнайы сала мамандарының түсіндірмелеріне құлақ түріп, кеңестеріне немкетті қарамау керектігін қаперде ұстаған жөн. Оы тұста Өңірлік коммуникациялар қызметінде облыстық денсаулық сақтау басқармасы басшысының орынбасары Жангелді Шайымбетов тұрғындарды індеттен сақтану шараларына шақыру бойынша үндеу жолдады.

– Бірнеше жылдан бері коронавирус індетімен тайталасып келеміз. Көріп отырғандарыңыздай, содан бері коронавирус қарқынының басылар түрі жоқ. Бүгінде өңірімізде коронавирус инфекциясы тіркелгеннен бері 24502 науқас індетті жұқтырып ауырса, жыл басынан бері 5068 науқас анықталған. Осы ретте індеттен айығудың жалғыз жолы – сақтық шараларын қатаң сақтау болып табылады. Яғни эпидемияны түбегейлі жеңудің жолы – вакцина салдыру екенін тағы да айта өткім келеді. Екпе әрине, әдеттегідей ерікті түрде жүргізіледі. Әлемді жайлаған індетті жұқтыру, таралу қаупін сейілтуді тек – екпе салдыру, сақтық шараларын сақтау арқылы ғана төмендете аламыз. Сол себепті барша халықты коронавирус инфекциясынан қорғану үшін сақтық шараларын сақтауға, екпе салдыруға шақырамын,- деді Ж.Мырзагелдіұлы. Өңірімізде соңғы уақытта тұрақталған эпидахуалдың шілде айынан шырқы бұзылды. Басқарманың мәліметіне сәйкес, 1-20 шілде аралығында коронавирус инфекциясымен 382, пневмониямен 8 жағдай тіркелген.

Қазіргі таңда облыс бойынша 205 төсек орындық инфекциялық стационарда 64 науқас ем қабылдап, амбулаториялық жағдайда 290 науқас бақылануда. Реанимациялық төсек-орында 5 науқас ем қабылдап жатыр. Облыста ұжымдық иммунитетті қалыптастыру мақсатында екпе алуға қабілетті тұрғынның I компонентімен 95%-ы (425923 адам), II компонентімен 94,6%-ы (423395 адам) вакциналанды.

Пфайзер (Pfizer) вакцинасымен бүгінге I компонентімен 85910 адам, ал II компонентімен 85698 адам вакциналанды. Сонымен қатар, 2021 жылдың 22 қарашасынан ревакцинация жұмыстары басталып, қазірге 231773 тұрғын қайта екпе алды.

Замира АХМЕТ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған