«Білекті бірді жығар, білімді мыңды жығады» деген ойдың түпкі негізі жеңіске деген жол екені түсінікті. Білім мен білек қатар шапқаны жетістіктің шыңына шығып, жекелей болсын, мемлекеттің имиджі үшін де үлкен мәртебе. Еліміз білімге үлкен мән беруі құптарлық іс, алайда спортқа көңіл бөлуді де қолға алғаны жөн. Мемлекеттің жаһанға танылуы үшін елдің беделін арттыратын азаматтардың дамуына, өсуіне үлкен жағдай жасауымыз керек. Елді танытатын адамдардың әлемдік сахнада көптеп танылуы, елге келетін турист адамдардың санының артуына әкеледі. Қазіргі үлкен танымалдыққа ие спорт түрлерінің қатарынан қазақстандық спортшыларды да кездестіреміз. Жастайынан шыныққан жігіттердің жанын салып көк байрақты көтеріп жүргенінің өзі еліміз туралы ақпараттың шет мемлекеттерде таралуына септігін тигізеді. Спортшылардың сыртқы жарыстарда атой салуы ішкі біріншіліктердің жиі өткізіліп тұруына байланысты. Әр облыс әр түрлі жарыстар ұйымдастырып, спортшылардың іріктеліп, саралануына, бәсекенің артуына ықпал етсе, бәсеке артқан жерде сапа да артатыны дәлелденген тәжірибе.
Мемлекетіміздің дамуына жан-жақты үлесін қосып отырған Сыр өңірі де спорттан алыс емес. Қазақ күресінің облысымызда қарқынды дамуы – төл спортымыздың қазақы санада жоғары деңгейде қалыптасқанының бір көрінісі. Додалы жарыстар ұйымдастырып, спортшыларға көңіл бөлуде де облысымыз алдыңғы қатарда. Өткен аптада Қызылорда қаласында «ҚР Ұлттық Қауіпсіздік комитеті барысы» республикалық турнирі өтті. Жарыстың ашылуына облыс әкімі Нұрлыбек Нәлібаев қатысты. Сыр өңірінде осындай дәрежедегі турнирдің бастау алуы аймақ үшін үлкен мәртебе екенін атап өтті.
— Балуан Шолақ, Қажымұқан, Иманжүсіп бабаларымыздың ізі қалған Сыр жерінде батырлар сабақтастығы үзілген емес. «Қазақстан барысы-2022» турнирінде жеңімпаз атанған жерлесіміз Мақсат Исағабылов «Қазақстан барысы» жүлдесін үшінші рет туған жерге әкелді. Өткен жылы грек-рим күресінен Сербияның Белград қаласында өткен Әлем чемпионатында Ұлттық құрама сапында жерлесіміз Айдос Сұлтанғали қола жүлдені олжалады. Осынша жетістік күш-қуаттың ғана көрсеткіші емес, ол – ұлттық рухтың көрінісі. Спортшыларымыздың дайындығы, жеңіске деген жігері арқасында өткен жыл Сыр спорты үшін нәтижелі әрі табысты болды. Аймақ спортшылары Қазақстан Республикасы чемпионаты мен кубоктарында 1078 медаль жеңіп алса, Әлем және Азия чемпионаты мен кубоктарынан 218 медальға қол жеткізді. Осылайша Сыр спортшылары соңғы бес жылдықтағы рекордты жаңартты,- деді Н.Нәлібаев.
Өз кезегінде ҚР ҰҚК Қызылорда облысы және Байқоңыр қаласы бойынша департаментінің бастығы Болат Қалмырзаев турнирге қатысушы спортшыларды құттықтап, сәттілік тіледі.
Сыр өңірінде спорт инфрақұрылымын дамытуға ерекше үлкен мән берілген. Қазірдің өзінде облыс бойынша 10 денешынықтыру және спорт кешенінің құрылысы жүргізілу үстінде. Биыл облыс орталығынан 6,9 млрд. теңгені құрайтын көпсалалы спорт кешенінің құрылысын бастау жоспарлануда. Сондай-ақ, «Қайсар» футбол клубы үшін салынатын заманауи жабық стадион салу жұмыстары демеушулер есебінен жүзеге асырылмақ. Балалар жылында демеушілердің көмегінің арқасында 1,6 млрд. көлеміндегі қаржыға салынған 80 спорт-ойын алаңы балаларға тарту етілді.
Өткізіліп жатқан турнирге 24 құрамадан тұратын, 120-дан астам спортшы балуандар қатысты. Спортшылар жарысқа тіркеліп, жеребе тартып, этноауыл көрмесінде ұлттық спорт ойындарына қатысты. Командалық жарыстар өткізіліп, түйе палуандардың жекпе-жектері турнирге өзіндік көрік берді.
Қазақ халқының жекпе-жек өнерін жетік меңгеруі, әр баласының намысшыл, өр мінезділігі ұлттық геннің әсерінен. Қолына қару ұстап, жерімізге жаудың аяғын аттап бастырмаған батырларымыздың намысы, қазіргі қазақ жастарының қанында тасып жатыр. Сыр жері батыр бабаларымыздың мекені десек артық айтпаған болар едік. Батырларымыздың ізін жалғап жүрген спортшыларымызды да Сыр өңірінен табасыз. Осындай көңілге қуаныш сыйлайтын нәтижелер қазақ жігіттерінің бойында ұлттық рухтың сөнбегендігін көрсетеді. Ұлттық рухты көтеретін спорт ойындары еліміздің әр өңірінде ұйымдастырылып тұрса нұр үстіне нұр. Өз болмысын жоғалтпаған ұлт қана мемлекеттің өсіп-өркендеуінің басты негізі бола алады. Сыр өңіріндегі спортшылардың мемлекеттен қолдау табуы да қуаншыты жаңалық. Үлкен жарыстарда топ жару шағын қолдаудан бастау алады. Ал, шағын қолдау кең пейілден екені анық. Сыр спортшыларын қолдаудан шаршамасақ екен.
Қазақбай ӘНДЕШ
